Link to home pageLanguagesLink to all Bible versions on this site
9
Sie Tokosra Nu Ke Pacl Fahsru

1 Acn sin sruf lal Zebulun ac sruf lal Naphtali tuh pilesreyuk meet, tusruktu in pacl fahsru ac fah akfulatyeyuk, liki Meoa Mediterranean nu layen kutulap in Infacl Jordan, fahla na nwe Galilee, yen mwet in mutunfacl saya elos muta we.[~1~]

2 Mwet su fufahsryesr in lohsr,
Elos liye sie kalem lulap.
Elos tuh muta in sie facl na lohsr,
A inge kalem srelosi.[~2~]
3 Leum, kom akpusye mwet in mutunfacl sac;
Kom akinsewowoyalos.
Elos engankin ma kom orala,
Oana ke mwet uh engan ke pacl in kosrani,
Ku ke elos kitalik ma wap.
4 Tuh kom kotalik srenenu toasrlana faclos
Ac sukan sringsring ma sringil finpisalos.
Kom kutangla mutunfacl se
Ma akkeokye ac aklalfonye mwet lom,
Oana ke kom kutangla un mwet mweun lun Midian in pacl somla.
5 Fahluk nukewa lun un mwet mweun,
Ac nuknuk lalos ma afla ke srah,
Fah isisyak ke e.
6 Tuh isusla sie tulik nu sesr!
Ituku nu sesr sie wen!
El fah leum facsr.
Ac El fah pangpang, “Mwet Pwapa Wolana,”
“God Kulana,” “Papa Ma Pahtpaht,”
“Fihsrak lun Misla.”
7 Ku fulat lal ac fah yokyokelik ac wangin saflaiya;
Tokosrai lal fah oan in misla pacl nukewa.
El fah leum in aolulla Tokosra David;
Ku lal ac fah oakwuk ke pwaye ac suwoswos
Ingela ac nu tok.
Pwayena LEUM GOD Kulana El ac oru ma inge![~3~]
LEUM GOD El Ac Fah Kalyei Israel

8 Leum El fahkak nununku lal nu fin tokosrai lun Israel, nu fin fwilin tulik natul Jacob. 9 Mwet Israel nukewa, ac elos su muta in siti lun Samaria, fah etu lah El oru ma inge. Mweyen elos filang ac inse fulat, elos fahk, 10 “Lohm orekla ke brick mokukla, tusruktu kut fah aolla ke eot tufahl. Sak sycamore taltal uh, tusruktu kut fah aolla ke sak cedar wowo.”

11 LEUM GOD El purakak mwet lokoalok lalos — mwet mweun lal Rezin in tuku mweun lainulos. 12 Syria layen kutulap ac Philistia layen roto akola na in okomla acn Israel. Ne ouinge, kasrkusrak lun LEUM GOD tiana safla. El srakna asroela paol in kalyei.

13 Mwet Israel tiana auliyak. LEUM GOD Kulana El ne kalyaelos, elos soenna foloko nu yorol. 14 Ke len sefanna LEUM GOD El fah kalyei mwet kol lun Israel ac mwet lalos. El fah wotela sifa ac pula, lah ac sra. 15 Mwet matu ma akfulatyeyuk pa sifa‐ac mwet palu kikiap pa pula! 16 Elos su kol mwet inge elos aktafongyelosla ac arulana akfohsyalosyak. 17 Ke ma inge, LEUM GOD El tia insewowo ke mwet fusr lalos, ac wangin pakomuta lal nu sin katinmas ac tulik mukaimtal, mweyen mwet nukewa elos lain God, ac kutasrik, ac ma nukewa elos fahk uh koluk. Ne ouinge, kasrkusrak lun LEUM GOD fah tia safla, a El srakna asroela paol in kalyei.

18 Ma koluk lun mwet uh firir oana sie e ma esukak mahsrik ac kokul — sie e lulap insak uh ma fosryak oana sruen kulasr. 19 Mweyen LEUM GOD Kulana El kasrkusrak, kaiyuk lal firir oana sie e sasla fin acn uh ac esukla mwet, ac kais sie mwet fah sifacna fosrngakunul. 20 Yen nukewa in facl sac mwet uh ac alak in kang kutena ipin mwe mongo ma elos konauk, a masrinsral lalos tiana wanginla. Finne tulik natulos sifacna, elos kang pac! 21 Mwet Manasseh ac mwet Ephraim elos sroani aacnwuki, ac elos tukeni sroang ac mweuni Judah. Ne ouinge, kasrkusrak lun LEUM GOD tia safla. El srakna asroela paol in kalyei.

<- ISAIAH 8ISAIAH 10 ->