HEBREW 8

Jesus Mwet Tol Fulat Lasr

1 Kalmen ma nukewa ma kut fahk inge pa oasr sie Mwet Tol Fulat ouinge lasr, su muta lapo layot ke tron lun God Fulatlana inkusrao. 2 El oru orekma lun Mwet Tol Fulat in acn Mutal Na Mutal, aok, ke iwen aktuktuk na pwaye, su tulokinyukyak sin God ac tia sin mwet.

3 Mwet tol fulat nukewa srisrngiyuki in orek kisa ke kosro ac mwe sang nu sin God, ke ma inge Mwet Tol Fulat lasr uh enenu in oasr pac ma el kisakin. 4 El funu muta fin faclu el lukun tiana sie mwet tol, mweyen oasr mwet tol in oru mwe kisa oana ma sapkinyuk ke Ma Sap lun mwet Jew. 5 Ke elos oru orekma lun tol uh, elos etai na ac lumahla mukena ma orek inkusrao. Oapana ma Moses el tuh oru ah. Ke el akoo in orala iwen aktuktuk mutal, God El tuh fahk nu sel, “Srike kom in oru ma nukewa in oana srikasrak ma akkalemyeyuk nu sum fineol ah.” 6 A inge, orekma kunen mwet tol su itukyang nu sin Jesus, yohk sripa liki kunokon ma itukyang nu sin mwet tol ngia — oapana ke wuleang su el orala inmasrlon God ac mwet lal uh wo liki na wuleang se meet ah, mweyen God El oakiya wuleang se inge fin ma su ac fah akwoye moul lun mwet uh wo liki meet ah.

7 Wuleang se meet ah funu ku in orala sripa ma orekla nu kac uh, lukun tia enenu in oasr sie pac. 8 Tusruktu God El konauk tuh oasr tafongla lun mwet lal uh ke El tuh fahk,

“Len ac fah tuku

Ke nga ac sifilpa oakiya sie wuleang sasu yurin mwet Israel, ac yurin mwet Judah.

9 Ac fah tia oana wuleang se su nga tuh orala yurin mwet matu lalos

Ke len se nga tuh sruokya paolos, ac kololosla liki acn Egypt.

Elos tiana fahsr fal nu ke wuleang se su nga tuh orala yorolos,

Ouinge nga ngetla lukelos.

10 Leum God El fahk ouinge, Pa inge wuleang se ma nga ac orala yurin mwet Israel

In pacl fahsru:

Nga ac fah filiya ma sap luk in nunak lalos

Ac simusla insialos.

Nga ac fah God lalos,

Ac elos fah mwet luk.

11 Wangin sie selos ac fah enenu in fahk nu sin mwet in mutunfacl sel,

Ku fahk nu sin mwet wial,

‘Kom in etu Leum God.’

Mweyen elos nukewa ac eteyu,

Sin mwet srisrik nwe ke mwet lulap.

12 Nga fah mulkunla ma koluk lalos,

Ac tia sifil esam ma sutuu lalos.”

13 Ke God El sramsram ke sie wuleang sasu, El oru tuh wuleang se meet ah in mahi; ac kutena ma su mahi ac kulawi, ac fah sa na wanginla.

<- HEBREW 7 HEBREW 9 ->