Lom 4

Godote Yunapino Iniwa A:ibalahamakono Hibima: Midi Komodo Ebe Tuputupudawama: Da:midiya:

1 Ba:bema: wadiyala la: Yuha:pa:te a Yunapino iniwa A:ibalahamakono komo nemalagidolala:. Ebeno hibima: midi komoma: Godote bada ko komonomo kiya:tumiya:? 2 Numa:la:, A:ibalahamate kebe hidohido komo kododilinakui, Godote ba:bi ododili komodo ebe tuputupudawama: na:midiya:tale, ebe ha:kiya ebe bawagaminuya:na:. Huiyatiya Godokono umi ipuwalo A:ibalahamate ebeno hidohido ododili mabuma: ebe ha:kiya ebe awagaminama: modoboha:, 3 ba:bema: ebeno Bukalo tabote ba:ma ka:na itana, “Godote A:ibalahamakono hibima: midi komo umiti ebe tuputupudawama: ba:bo ka:miya:.”

4 Numa:la:, kebe dubuti mani oko dowatina, ebete oko namutudawagodone huiya da:lawemene, ba:be huiya lawe komo ba: namutudawoeno dito ikame komoha:. Ao, ba:be dubuti oko owati ipuwalo ebeno heloamo modobo huiya ba: a:lawe, eta lumagino malemale komodoha:. 5 Huiyatiya kebe dubuti Godoko hibima: da:midina, ebeno komo hiya:la mabu ebete ebeno oko owati heloamo hido huiya lawema: kagoenaha:. Ao, ebete Godokono oko owati helo kapiya hibima: ba midina, Godote ebe tuputupudawama: ka:milo hido huiya ba:bo kikamema:ne, mabu hibila, ba:be Kodawa iya:tawanomola puya:te ebetamo papami-la:haha:pima: deda:hana, ebete ba:bi tawakalubi ibino papamila:haha: komo ipuwane uluhukulatelete ibi tuputupupima: komidilima:. 6 Ba:bema: kebe lumagiti hidohido komo ododiliha: tetelo Godote ebe lawete tuputupudawama: dito da:ka:mimini, ebete Godokono owalubi mabuma: ko kalakalanomo kolawema:ne. Da:ibiditi ba:be komo ba emalagidolo Godokono Bukamo tabo ba:ma ka:na miya:tiya:,

7 “Godote puino kuba ododili komo malemalelo dadodoholelamemene,

ibino kalakala bada konomola:ka:,

mabu Godote ibino kuba dito egebolelame!

8 Iyo, Kodawate pokono kuba ododili komo gala emalagidolemeha:ma: da:goemene,

ebeno kalakalate konomoma: keda:ma:ne.”

A:ibalahamate Tama Itamida Kukala Laweheno Dopamo Godote Ebe Tuputupudawama: Da:ka:miya:

9 La:eno ukui keba ka:nala:ka:? Godokono ododi ipuwalo duluhukuna, ba:be kalakala komo ba: puya:te bahibahi gugudino tama itamida kukala da:lawiya: ibi kapiyatamo kitana? O ba:be kalakalate tama itamida kukala laweha:pa:tamo atumu ba:ka:itana? Numa:la:, a ya:lo a:ga:lama: ba:ma ka:na, Godote A:ibalahamakono hibima: midi komo umiti ebe tuputupudawama: ba:bo ka:miya:. 10-11 Ba:bema: ba:moe tuputupudawama: ka:mi komote A:ibalahamatamo kebako tetelo kuluhukuya:, ebe tama itamida kukala laweha: tetelola:ka:, o ebete kukala da:lawiya: gala hapunila:ka:? Iyo, ebete kukala laweha: tetelo Godote ebeno hibima: midi komodo ebe tuputupudawama: ka:miti, gala hapuni ebeno tuputupudawama: eda: komo hawakalimima:, ebete Godokono tabamo papamiwatate tama itamida kukala ba:bo lawiya:. Ba:bema: puya:te tama itamida kukala laweha: tetelo Godote ibino hibima: midi komodo ibi tuputupupima: da:ka:lamina, A:ibalahamako ba: ba:bi Yuha:pi hiliyonomoeno iniwa nabiwila. 12 Ba:gala ba:moe hopo habalo a puya:te tama itamida kukala ya:lo da:lawiya:ma:, a Yunapi ipuwalo puya:te hibima: midi gabodo da:wapata:lamena, ibi atumu ba: A:ibalahamakono hibi eyoni gugudila. Ba:bema: naeno Yunapi mabuluba:la:, aeno iniwa nabiwi A:ibalahamate tama itamida kukala laweha: tetelo hibima: midi ipuwalo keba ka:na ka:pata:nami, wadiyala ale emedena tetelo ba: ba:ba ka:na atumu ba:kawapata:lamenama:.

Godote Tawakaluba:tamo Hidohido Komo Ikalamema: Hibilo Da:goiya:, Iba:te Hibima: Midi Komodo Kuwatema:na:

13 Ba:bene ya:lo tetenomolo Godote A:ibalahamako ba:gala ebeno eyoni gugudi hibilo ba:ma ka:na goelamiya:, ba:moe hopo konomo ibinoma: beda:namene. Mabu keka: ebete ba:ma ka:na da:goiya:? A:ibalahamate ebeno Tutumu Tabamo da:papamiwatanami ba:be mabuma:la:ka:? Ao, ebete A:ibalahamakono hibima: midi komodo ebe tuputupudawama: da:ka:miya:, ba:be mabuma: ebe ba:gala ebeno eyoni gugudi kowalubilinama: ba:be tabo bihatiya:. 14 Numa:la:, Godote tawakaluba:tamo ikalamema: hibilo da:goiya:, iba:te ebeno Tutumu Tabamo ba papamila:hana ba:bi hidohido komo ibi ha:kiya ibino heloamo duwatemena:, ba:ba tetelo iba:te hibima: midi komo ko komoha:ma: koga:lama:na:, iyo, iba:te daedae ukui lawete ba:ma ka:na kemalagidoloma:na:, aeno helo modobola huiyatiya Godote a owalubima: dopamo da:goiya: ba:be taboeno helote hibilo kitanaha:. 15-16 Huiyatiya hibila, Godokono Tutumu Tabo komodo iba:te ebegodone hidohido komo a:kuwata:mena:, kapiya komonomo kolawema:na:, ba:be komo ba: ibino kuba ododili huiya lawe komola.

Ba:be mabuma: Godote ebeno Tutumu Tabo tama:mo ba miya:te eta gabo a:hiduimiya: tawakaluba:te ebeno hidohido komo kuwatema:, mabu Tutumu Tabo pola:naha: tetelo tawakalubino papamila:haha: mabuma: kuba huiya lawe komote a:kitanamene. Numa:la:, Godote atamo da:hiduimiya:, ba:be gabo ba: hibima: midi gabola, iyo, ba:be malemale gabodo a A:ibalahamakono eyoni gugudi hiliyonomate Godogodone hidohido komo buwatenakoma:. Ba:bema: hibila, puya:te A:ibalahamako ba ta:matana hibima: midi komodo Godokono Tutumu Tabamo da:papamila:hana, A:ibalahamako ba: ba:bi tawakalubi hiliyonomoeno iniwa nabiwila. 17 Iyo, Godote ebeno Bukalo A:ibalahamatamo ba:ma ka:na goiya:, “Nale ama: tawakalubino kapiyuimi hiliyonomoeno iniwama: a:midimata,” ba:bema: A:ibalahamate poko hibima: da:midinami, ba:be Kodawoeno umi ipuwalo ebe ba: a hibima: midipino iniwa nabiwima: eda:na.

Numa:la:, ba:be Kodawa Godoko kapiyagodolo helo bitana ha:laha tawakalubi ka:ka:mo kowadiya:paa:latelema:, iyo, ebe kapiya modobola ebeno ubilo hiliyonomo komokomo ebeno tabo kapiyanomamo ododilima:, eta lepalamoha:. 18 Ba:bema: Godote A:ibalahamatamo ikamema: da:goiya:, ebete ba:be gudu lawema: gabo umihino huiyatiya Godoko hibima: ba:bo midiya:. Iyo, ebete hibi komo lawema: tete ga:ga:lo uliholo demedenami, ba:be gabodo ebe tawakalubi kapiyuimi hiliyonomoeno iniwama: ediya:, mabu Godote ebetamo dopamo hibilo a:goiya:, “Amia:no galanepa:te hiliyonomoma: keda:hama:na:.” 19 Ba:bene A:ibalahamate 100 gogo tetema: ba eda:na, ebeno ape dumiya: ebe tatalila hoe, huiyatiya ebete ba:be komo ba:gala Selakono hogoha:ma: eda: komoma: ukui bilibilima: eda:heno hibima: midi ipuwalo kodakodalo la:nami. 20 Iyo, Godote ebetamo ikamema: hibilo da:goiya:, ebete ba:be komo hibima: midi gabone kelehegatepanakuiha:, ba:bema: ebete hibi komo laweheno ebeno tepo ipuwoeno ukui ba kodakoduimi Godoko ba:bo milimihonakui. 21 Ebete ebeno tepo ipuwalo iya:tawanomo niya:tawanami, Godote kebe komo ododima: hibilo da:goiya: ebegodolo helo bitana ba:be komo kododima:. 22 Iyo, ba:moe ba:be mabuma: Godote A:ibalahamakono hibima: midi komodo ebe tuputupudawama: ba:bema: ka:miya:.

23 Huiyatiya eta ko komo ba: ba:ma ka:nala. A:ibalahamakono tuputupudawama: eda: komo Godokono Bukalo ditana, ba:be tabote ebe kapiya mabuma: kagoenaha:, 24 ao, ba:be tabote a mabuma: atumu na:kagoena, mabu kebe dawate aeno Kodawa Ya:suku hoe ipuwane dadipatiya:, a puya:te ebe hibima: da:midinama: ebete ba:be komodo a atumu ebeno tuputupupima: kaka:mina. 25 Ba:bema: kalakala konomola, mabu Godote aeno kuba ododili komoma: Ya:suku ebe anakapumipa:tamo ikalamiya:, huiyatiya ebete da:hoiya: Godote ebe hoe ipuwane gala a:kadipatiya:, ebete ba:be gabodo a ebeno tuputupupima: koka:minama:.

<- Lom 3 Lom 5 ->