1 Yu tawakalubino eta okoha: talona hegelalo Ya:suti ebe ta:matapa:go kona pali ipuwado ba petolamenato, ebe ta:matapa:te kona kapiyakapiya kubakubadopo newakalamiti iba:te konahama: tama ba:bo wehohuya:. 2 Ba:bema: komo Pa:lisi kapiyuimipa:te Ya:sutamo na:ga:luya:, “Numa:, ama: ta:matapa:te aeno tutumu tabamo kapapamila:haha:. Iba:te okoha: talona hegela badama: kadikanalita?”
3 Ba:bene Ya:suti iba:tamo ba huiya na:goiya:, “Wadiyala Godote ebeno Bukamo da:miya:tiya:, la: ba:be komo nemalagidolala:. Da:ibiditamo kuba tete da:piya:, ebete ebeno wapata:lamepa:go baa:ma: da:kapemitiya:, ba:bene ebete bada komo kododiya:? 4 Ebete Godokono Genamamo nodolote, ba:be Genamoeno okopa:te Godotamo da:miya:tenakui ba:be talona baa: ebete a:nenahuya:. Numa:la:, aeno tutumu tabote a biya:tua:mena Godotamo hawa:goeno ikamehopa:te ba:be baa: ha:kiya nahanaka, komo tawakaluba:te naha talonala. Huiyatiya Da:ibiditi ba:be baa: nahate eba:go wapata:lamepa:tamo dikalameholiya:, Godote ba:be komo kubama: kagoiya:ha:.”
5 Ba:bema: Ya:suti iba:tamo na:goiya:, “Ba: hibila, na Tawakalubino Naniwiti okoha: talona hegela namutudawama: eda:namo.”
6 Eta okoha: talona hegelalo Ya:suti Yu tawakalubino baidi ibubulamehole genama guamo nodolote tawakalubi ba niya:tulamita, kokoto tu hapu hoeme dubuti ba:bolo na:lutiya:. 7 Ba:bene komo Pa:lisi kapiyuimipi ba:gala Godokono Tutumu iya:tulamepi iba:te Ya:suku baidi kodakodalo umitiya:, ebete okoha: talona hegelalo ba:be dubu da:hiduimimini, iyo, iba:te ubila Ya:suti ba:be komo ba ododi kubama: ba:bo koga:lama:. 8 Huiyatiya Ya:suti iya:tawuya: iba:te ibino tepo ipuwalo bada komokomo kemalagidolitiya:, ba:bema: ebete ba:be dubutamo na:goiya:, “Ama: mahigate dopo hapuamo na:pa:,” ba:bene ba:be dubuti mahigate dopo hapuamo pete ba: dito putiya:. 9 Ba:bene Ya:suti iba:tamo na:goiya:, “Nale la: balateda:lemata, aeno tutumu tabote kebe talona komo kiya:tua:mena? Ale okoha: talona hegelalo hido komo o kuba komo ba:kododima:? Tawakalubi ba:ka:hiduilamema: o ba:ka:kubahilamema:?” 10 Ba:ba tetelo Ya:suti ibi hiliyonomo ba pulameholenato ba:be dubutamo na:goiya:, “Amia:no kokoto na:hogamina,” ba:bene ebete kokoto da:hogaminuya: ebeno kokotote ba:bo hiduya:.
11 Ba:be mabuma: Pa:lisi kapiyuimipa:te konomamo maubahalo ibi ipuwalo tabo ba:bo ga:luya:, “A ba:moe dubu Ya:suku keba ka:na na:kamitima:?”
12 Ba:be dulu Ya:suti Godokoba: tabo ga:lanama: eta haka hunamo nodoloniya:, ba:bema: ebete du ga:ga:nomolo Godokoba: tabo ba ga:lana hegelate ba:bo powalohuya:. 13 Ba:bene hegelate da:puluhukuya: ebete ebeno ta:matapi ebetamo ka:lamiti, ibi ipuwalo 12 dubu ba uwate ibi na:goelamiya:, “La: ba: naeno oelamepilata.”
14 Ya:suti 12 dubu duwatiya:, ba:moi ba: ibino mahilola.
17 Ba:bene Ya:suti ebe ta:matapa:go haka hununi eta apotami hopamo da:nepalaguya:, ba:ba tetelo komo ta:matapi ba:gala hiya:hiya: tawakalubi hiliyonomate iba:go ba:bo paluguya:. Komo iba:te Yelusalema ko habane ba:gala Yudiya hopoeno komo habahabane pelamiya:, ba:gala komo iba:te kehaha: kolomo dodo hapuni kapelamiya:, ibi ba: Taya ko habalo ba:gala Saidono ko habalo demedehonama: ba:bi tawakalubila. 18 Ba: hibila, ba:bi tawakalubi hiliyonomate pelameholiya: Ya:sukunu tabo ulihoma: ba:gala ebete ibino temetema:gopi kohiduilamelelamema:, ba:gala kuba gobogobagopa:te ebetamo atumu a:kapelamiya:, ba:bene ebete ibi hiliyonomo ba:bo hiduilamiya:. 19 Ba:bema: ba:bi tawakalubi hiliyonomate ubila Ya:suku kologihoma:, mabu iba:te iya:tawahuya: Godokono helote ebe ipuwane da:puluhukunakui ba:ba tetelo ebete temetema:gopi ba:bo hiduilamenakui.
20 Ba:bene Ya:suti ebeno hiliyonomo ta:matapi ba ulamita na:goelamiya:,
22 “Ba:gala Tawakalubino Naniwi mabuma: komopa:te la:tamo maubahalo ubiha: tabo ba ga:la la: diduduputilamena, ba:gala iba:te la:eno mahilo da:kubahilamena, wadiyala la: atumu na:kakalakalahala:! 23 Iyo, la: kalakalahalo hunamo niya:patela:tepahaliya:la:, mabu galane tetelo la:le Godokono Hunu Habalo la:eno huiya kokonomo konuwatema:nemata. Numa:la:, dopamo ibino iniwala:te ba: atu ubiha: tabo bekaga:lanakuya: Godokono ukui hawakalimipa:tamo.
26 “Ba:gala tawakalubi hiliyonomate la: da:mililameholemena:, la: hidamo, mabu galane tetelo la: ko tepo temeteme kiya:tawahama:nemata! Numa:la:, dopamo ibino iniwala:te Godokono mahilamo ha:da amiho tabo olamagimipi atumu a:mililameholenakuya:.”
27 Ba:bene Ya:suti gala na:kagoiya:, “Ba:be mabuma: na la:tamo na:goemo, puya:te la:go dalaholohona, wadiyala la: ibi malemalelo nemalagidolenala: ba:gala iba:tamo hidohido komo nododilinakuya:la:. 28 Ba:gala la:tamo mela tabo dolamagiminaka, ba:bi tawakalubino komoma: Godotamo na:toetoehonakuya:la: ebete ibi hidamo kowalubilinama:, iyo, puya:te la:tamo kuba komokomo dododilina la: ibi Godotamo na:wadiya:paa:latelenakuya:la:. 29 Ba:gala pote ama: tatakolo danagalimimina:, wadiyala hapu ebetamo na:kikamiya:. Ba:gala kebe lumagiti amia:no sete ilina heloamo da:lawememena:, ba:be atu tetelo amia:no atuino ilina akamawada:la:, ama:le ebetamo malemalelo dito na:kikamiya:. 30 Iyo, lumagiti amia:no eta ilinama: ama: da:toemehomena:, wadiyala ebetamo malemalelo nikamiya:, ba:gala kebe lumagiti amia:no ilina pilolo duwatemene, ama: tote ba:bi ilina heloamo akanuwata:la:. 31 Ba:bema: tawakaluba:te la:tamo bada komo ododima: la:le ubi dihatenakoma, la: komopa:tamo ba: ba:ba ka:na nododinakuya:la:.
32 “Puya:te la: malemalelo demalagidolena, la: ba:bi tawakalubi kapiya demalagidolenama la:eno ukui keba ka:nala:ka:? Ba:be mabuma: Godote la:tamo hido huiya ba:kikalametamena:? Ao, mabu kuba ododilipa:te atumu ibino mabulubi kapiya malemalelo emalagidolenaka! 33 Ba:gala puya:te la:tamo hidohido komo dododilina, la: ba:bakobakopi kapiyatamo hidohido komo dododilinama la:eno ukui keba ka:nala:ka:? Ba:be mabuma: Godote la:tamo hido huiya ba:kikalametamena:? Ao, mabu kuba ododilipa:te ibino mabulubi kapiyatamo atu hidohido komo bekaododilinaka! 34 Ba:bema: puya:te la:tamo gala da:kikalameholenaka, la: ibi kapiyatamo mani dikalameholema la:eno ukui keba ka:nala:ka:? Ba:be mabuma: Godote la:tamo hido huiya ba:kikalametamena:? Ao, kuba ododilipa:te atumu ibino mabulubi kapiyatamo mani ikalameholenaka mabu atu komo iba:godone gala kakuwatema:na:! 35 Huiyatiya wadiyala la:tamo alaholopima: deda:hana, la: ibi malemalelo nemalagidolenala: ba:gala iba:tamo hidohido komo nododilinakuya:la:. Iba:te manima: la: da:kiyalamemena:, wadiyala la: iba:tamo dito nikalamiya:la:, huiya komo akemalagidolala:. Ba:mako ododi komodo la: Hununomo Godokono gugudima: eda:hate galane tetelo huiya konomo kuwatema:nemata. Numa:la:, ebete kuba ododilipi ba:gala ebetamo kalakala tabo ga:laha:pi ba:bakobako tawakaluba:tamo malemale komo ododilinako. 36 Ba:bema: la: hiliyonomo tawakalubi malemalelo nemalagidolenala:, la:eno Nabiwiti ibi keba ka:na kemalagidolena ba:ba ka:na.”
37 Ba:bene Ya:suti gala na:kagoiya:, “La:le komo tawakalubino komokomo anagilamelelamelo ibi kubapima: tiyolo akaka:lama:la:, ba:bene Godote la:eno komo anagilamelelamelo la: kubapima: a:kaka:lama:mena:ta. Ba:gala wadiyala la: tawakalubino kuba egebolelamete nadodoholelamiya:la:, ba:bene Godote atumu la:eno kuba egebolelamete kadodoholelamema:na:ta. 38 Ba:gala wadiyala la: komopa:tamo ilina malemalelo nikalamenakuya:la:, ba:bene Godote atumu la:tamo ba ikalame tete hiliyonomolo ebete la: ilinamo ba:tabuilamenakomena:ta, iyo, la: komopa:tamo kebako dikalamenakoma, Godote ba: atumu la:tamo ba:bako ba:kikalamenakomena:ta.”
39 Ba:bene Ya:suti iya:tulame uwi ba olamagi na:goiya:, “Baidi tamiho dubuti eta baidi tamiho dubu gabodo hidamo a:kamagatamene. Ebete ba:ba ka:na dewagelemene ibi netewapi haka gugamo badi konegudima:na:, aba: hibila:ka:? 40 Ba:bema: ka:lo sikululu diya:tawana ba:be guduino iya:tawa komote iya:tulamedawoeno iya:tawa kagogolonaha:, huiyatiya galane ebeno sikulu da:wibomene ebeno iya:tawa komo ba:gala iya:tulamedawoeno komo atu tetelo kopola:nama:na:.
41 “Keka: mabu amia:no ekawino baidilo puhulu deha:poto umilo huiyatiya amia:no baidilo ditana ba:be ko keha tete kuminaha:? 42 Ba:gala bada mabuma: amia:no ekawitamo ba:ma ka:na da:goita, ‘Ekawi, wadiyala amia:no baidilo ditana ba:be puhulu deha:poto nale kolawemema:nemata,’ huiyatiya amia:no baidilo ditana ba:be ko keha tete ama: kalawenaha:? A:iye! Ama: ma:lapila netewa lumagilata! Wadiyala ama: dopamo amia:no baidilo ditana ba:be keha lawete, ama:le galane hidamo gahimiti amia:no ekawino baidilo ditana ba:be puhulu deha:poto ba:bo kolawemema:na:ta.”
43 Ba:bene Ya:suti gala na:kagoiya:, “Hidohido kehalo kuba gaote a:kanolohamena:, ba:gala kuba kehalo hidohido gaote a:kanolohamena:. 44 Iyo, ba: hibila, la: hiya:hiya: kehoeno gao ibino holoholamo dulamema la: ba:bo kiya:tawahama:nemata, ibi ipuwalo kebe gaote nahama: hidohidoma: keda:hana. Ba:bema: lumagiti olagoeno kehamo tote anahu kehoeno gao a:kanetapihamene, ba:gala ebete olagoeno kehalo hidohido gala:ipi gao a:kanulama:mene. 45 Ba:bema: hido lumagiti ebeno tepo ipuwane hidohido komo buluhukulatelenakomene, huiyatiya kuba lumagino tepo ipuwalo kuba komate pola:na ba:bema: ebegodone kuba komate ba:pikulinakomena:, mabu lumagino tepo ipuwalo kebe komate ka:pola:na, ba: ba:bi komate ebeno tabo olamagi komodo kopikulima:na:.”
46 Ba:bene Ya:suti gala na:kagoiya:, “Keka: mabu la: na Kodawama: dito da:ka:naminama, huiyatiya nale dolamaginakomo ba:bi komo la:le kododilinaha:? 47 Ba:bema: kebe lumagiti natamo pete naeno tabo pulihote ba:bi komokomo dododilimini, ba:be lumagino komo keba ka:na kitana nale la: hidamo kiya:tulamema:nemata. 48 Ba:be lumagi ba: hido genama detiya: ba:be dubu huiyala. Ebete haka ibulunomo aligiti kodakoda haka hunamo ebeno genama ba:bo etiya:, ba:bene hulama beyate ba odolo ba:be genama da:pemida:miya:, huiyatiya genamate kaleguya:ha: mabu etedawate ebeno genama hidamo etiya:. 49 Huiyatiya kebe lumagiti naeno tabo ulihote ododilihino, ebe ba: bula:i hakamo genama detiya: ba:be dubu huiyala. Ba:be genamoeno mabu puliyala, kitanuya:ha:, ba:bema: hulama beyate ba odolo ba:be genama da:pemida:miya: hakamo dito kaguya:. O olalati bada konomola:ka:!”
<- Luk 5Luk 7 ->