1 Ba:bene Ya:suti eta iya:tulame uwi ebe ta:matapa:tamo nolamagiya:, mabu ebe ubihinola iba:te hiliyonomo tetelo Godotamo toetoe tabo ga:la ipuwalo iba:te huiya tabo tiyolo laweheno heloha:ma: eda:hakapoma:. 2 Ebete na:goiya:, “Eta habalo tabo anagilamedawa dubuti nemedenami, ebete Godotamo kapapamiwatanakuiha: ba:gala ebete tawakalubi kamalemalelatelenakuiha:. 3 Ba:be atu habalo eta hamole kamenate na:kemedenami, ebete hiliyonomo tetelo tabo anagilamedawatamo penakui ba:ma ka:na pegoenakui, ‘Ama:le nago dalaholohona, ba:be lumagitamo kuba huiya nikama:!’
4 “Ba:bene tabo anagilamedawate tete ga:ga:dopolo ebeno tabo kulinakuiha:, huiyatiya galane ebete ebeno ukuilo ba:ma ka:na goi, ‘Na Godotamo a:kapapamiwatalemo ba:gala na tawakaluba:tamo malemale a:kihata:lemo, 5 huiyatiya ba:moe kamenate tete ga:ga:lo natamo ko temeteme bikanamena. Nale ebe owalubihino ba:moe temeteme komote a:kekelamene, ba:bema: wadiyala nale ebeno ubi komamo papamiwatalo eba:go alaholohodawatamo kuba huiya kikamema:nemo!’ ”
6 Ba:bene Kodawa Ya:suti na:goiya:, “Ba:moe tabo anagilamedawa ebe ba: kuba lumagila, huiyatiya ebete da:goi, wadiyala la: ba:be tabo hidamo nemalagidolala:. 7 La:eno ukui keba ka:nala:ka:? Godokono tawakalubi ipuwalo puya:te du tetelo ba:gala hegela tetelo ebetamo toetoeholo dihimina, ebete iba:tamo huiya ikalameha:ma: ba:keda:mene? Ba:gala ebete ibi owalubili ubiha:ma: eda:lo tete ba:ka:ga:gima:tepamene? 8 Ao! Nale la: begoelamemata, ebete ibi owalubililo iba:go dalaholohona ba:bi tawakaluba:tamo kuba huiya tiyonomo kopikalamema:ne, huiyatiya Tawakalubino Naniwiti da:pemene, ba:ba tetelo ebete hopo habanapa:godolo hibima: midi komo ba:ka:pumimini?”
9 Ya:suti ba:moe eta iya:tulame uwi komo tawakaluba:tamo kolamagiya:, mabu ibi ha:kiya ibi tuputupupima: ba ga:lana komopi tawakalubiha:ma: ga:lanakuya:. 10 Ebete na:goiya:, “Dubu netewate Godoko Adikumino Hiya: Genamamo nodoluya: Godotamo toetoehoma:, eta Pa:lisi kapiyuimidawa dubula, eta ta:kese mani ha:da amiholo uwatedawala. 11 Ba:bene Pa:lisi dubuti ebe ha:kiya utiti ebeno komoma: ba:ma ka:na goi, ‘Godo, na ama:tamo kalakala tabo bolamagimo, mabu na ba:moi komo tawakalubidopoha:. Ba:ma ka:na na ilina pilolo a:kuwata:lemo, ha:da gabodo a:kapata:lemo, ba:gala eta dubuino kamena pilolo kalaweha:. Ba:gala ba:moe ta:kese uwatedawate hiya:hiya: kuba dododilina, na eba ka:naha:. 12 Na kapiya wuiki ipuwalo nale netewa hegelalo amia:no oko owatima: baa: naheno lutanakomo, ba:gala nale duwatenakomo ba:bi ilina hiliyonomo anagilameholete, komo ta:ni komokomo ipuwane eta kapiya kalawe, eta kapiya kalawe, amia:no komo ama:tamo hibinomolo ikamenakomata.’
13 “Huiyatiya ta:kese uwatedawate muhuludopone nutiti, ebeno wato hopamo toda:miduimiti ba la:na ebete hilopago bodolo anagalimilo na:goi, ‘Godo, na koko kuba ama:tamo ododilimo, huiyatiya nale ama: betoemehomata, natamo kuba huiya ikanameheno na na:malemalenatena:!’ ”
14 Ba:bene Ya:suti na:goiya:, “Na la:tamo na:goemo, Godote ba:moe awagaha: lumagino kuba egebolemete ebete ebeno genamamo ba:bo tui, huiyatiya Pa:lisi dubu eba ka:na kewageleha:. Godote ebeno komo katuputupuimimiha:, ebete ebeno kubago ba:ba ka:na tui. Mabu hibila, lumagiti ebe ha:kiya ebe koma: da:midimini Godote ebe deha:potoma: komidima:ne, ba:gala kebe lumagiti ebe ha:kiya ebe deha:potoma: da:midimini Godote huiyatiya ebe koma: komidima:ne.”
15 Ba:bene tawakaluba:te gugudi hegehege Ya:sutamo na:magaheliya:, ebete ebeno kokoto iba:tamo ba emowatilame Godoko kogoemema: ebete ibi hidamo kowalubilinama:. Ba:ba tetelo ebe ta:matapa:te ba:be komo umiti tawakalubi kiyahalamelo gugudi na:duhilamiya:, 16 huiyatiya Ya:suti gugudi ebetamo ba ka:lami ebe ta:matapa:tamo na:goiya:, “Gugudi natamo pelame wadiyala. Akaduhilama:la:, mabu ba:mako tawakaluba:te Godote Ko Gawadalagima: deda:na ba:be habamo kona:pa:la:hama:na:. 17 Na la:tamo hibi tabo begoemo, kebe lumagiti gudu deha:poto huiyamo aeno Ko Gawadalagi Godoko laweheno, ba:be lumagiti ebeno Kalakala Habamo a:kana:pa:gamene.”
18 Ba:bene Yu tawakalubino eta watodawate Ya:suku ba alateda: na:goemiya:, “Hido Iya:tulamedawa, na bada komo ododiti wiboha: ka:ka: ebo na:ka:lawemo?”
19 Ya:suti ebetamo na:goiya:, “Ama:le na hidodawama: badama: ka:ka:nama:wa? Eta hidodawa puliyala, Godoko kapiyate hidodawala. 20 Ama: Godokono Tutumu Tabo iya:tawala. Eta lumagino kamena pilolo akalawa:la:, lumagi akanakapuma:la:, ilina pilolo akuwata:la:, eta lumagino komoma: ha:da tabo akolamaga:la:, ba:gala amia:no nabiwi menoko ibino tabamo na:papamiwatanakuya:.”
21 Huiyatiya ebete Ya:sutamo na:goiya:, “Na deha:poto tetene tupuimiti ba:moi hiliyonomo tutumu kodakodalo uwatete eta kapiya kadikanaliya:ha:.”
22 Ya:suti ebeno tabo uliti ebetamo na:goiya:, “Ama:godolo kapiya komote kamodobonaha:. Wadiyala komopa:te amia:no hiliyonomo ilina mana:mo uwatehomete ama:le ba:bi mani komo awaepa:tamo na:nalabahalama:. Ba:ba tetelo ama: gala kapete na na:ta:maheniya:, ba:bene amia:no ilina hiliyonomate Godokono Hunu Habalo konepola:nama:ne.” 23 Ebete ba:be tabo uliti ebeno tepo ipuwalo menemenenomoma: ediya: mabu ebe ilina dogodogodawanomola.
24 Ya:suti ebe umiti na:goiya:, “Godote Ko Gawadalagima: deda:na, ilina hiliyonomagopa:te ba:be habamo na:pa:la:hama: kodakodanomola! 25 Numa:la:, ka:molo-goete*Ya:suku tetelo Yu tawakalubino komo ba:ma ka:nala, iba:te kokonomo gelebadihole ka:molo-goegoa:mo ibino oko bowatihonakuya:. Iyo, komo hiya:hiya: tetelo ka:molo-goegoa:te ibino ilina bewatanakuya: muhulu hopamo, ba:gala komo tetelo iba:te bogema: watenama:. kaliko akohomehoeno ola gugudu nilupiga kodakodama: eda:na, gabohenola. Ba: atumu ilina hiliyonomagodawate Godokono Ko Gawadalagi habamo na:pa:ga kodakodanomola, gabote hibinomolo a:kitanamene.”
26 Ba:bene Ya:sukunu tabo ulihopa:te ebetamo na:ga:luya:, “Ama: da:gaa: ba:be tabote hibima: deda:na, puya:te modobola:ka: Godote ibino ka:ka: mula:lelamema:?”
27 Ya:suti iba:tamo ba huiya na:goiya:, “Tawakaluba:godolo da:kodakodahana ba:bi komokomo huiyatiya Godogodolo kodakoda hibiha:.”
28 Ba:bene Pitate Ya:sutamo na:goiya:, “Ama: numa:, aeno genamoeno ilina hiliyonomo miya:palete ama: na:ta:mahenata.”
29 Ya:suti iba:tamo gala na:kagoiya:, “Na la:tamo hibi tabo begoemo, kebe lumagiti ebeno genama, o ebeno kamena, o ebeno nani ekaki ba:gala ebeno menokobi nabi gugudi, ba:bi komo Ko Gawadalagi Godoko mabuma: da:miya:palemene, 30 ebete ba:ma tetelo huiyatiya Godogodone ba:bi atu hiliyonomo komokomo gala kakuwatema:ne, ba:gala galane ebete wiboha: ka:ka: kakalawema:ne.”
31 Ba:bene Ya:suti ebeno 12 ta:matapi dubu ebetamo ka:lamiti iba:tamo na:goiya:, “La: nulia:la:, a Yelusalemamo tolamitama:. Ba:bolo Godokono ukui hawakalimipa:te Tawakalubino Naniwi mabuma: Bukamo da:miya:tiya: ba:bi hiliyonomo komate kopikulihoma:na:. 32 Iyo, Godote ebe Yuha:pa:tamo kikalamema:ne, ba:bene iba:te ebe iduduputimilo ba iya:da:te ebetamo kowe komehoholema:na:, 33 ba:gala iba:te giya:pa:pa:mo ebe a:na:miga:titi ba:bene ebe dito kanakapumima:na:, ebe huiyatiya netewa-kapiya hegelalo hoene gala kakamahigama:ne.”
34 Huiyatiya Ya:suti dolamagiya:, ebe ta:matapa:te ba:be taboeno ipuwa hidamo kalawiya:ha:. Ba:be komote awalelalo itanuya: ba:bema: iba:te hidamo kemalagidoluya:ha:.
35 Ba:bene Ya:suti Yeliko ko haba tama:mo ba penape, baidi tamihome dubuti gabo tamelo emedete manima: tawakalubi betoelameholitiya:. 36 Ebete tawakalubi hiliyonomo gabodo da:petolamitiya:, ba:be komo uliti komopi ba:bo alateda:liya:, “Bada komote ka:pita?”
37 Iba:te na:huiyuya:, “Nasaletenapi dubu Ya:suti pita.”
38 Ba:bene ebete tabo konomamo goelo na:goiya:, “Ya:su, Da:ibidikono Hogo! Ama: na na:malemalenatena:!”
39 Ba:ba tetelo dopamo da:petolamitiya: ba:bi tawakaluba:te ebe kiyahamelo na:duhimiya: ebete tatabalo kolutama:, huiyatiya ebete gala ibulunomamo na:kagoiya:, “Da:ibidikono Hogo! Ama: na na:malemalenatena:!”
40 Ba:bene Ya:suti ba:bamo utiti baidi tamihome dubuino komoma: na:goiya:, “Ebe na:magaha:la:.” Ebete tama:mo da:piya:, ba:ba tetelo Ya:suti ebe nalatediya:, 41 “Ama: bada ubi kihatiuta nale ama:tamo kododima:?”
42 Ba:bene Ya:suti ebetamo na:goiya:, “Ama: baidi na:gahima:! Amia:no hibima: midi komote ama: a:hiduima:ta.”
43 Ba:bema: hibila, ba:ba tetenomolo ebeno baiditi da:hidohidohuya:, ebete Godoko ba milimiho Ya:suku ba:bo ta:matuya:, ba:bene hiliyonomo tawakaluba:te ba:be komo umiti iba:te atumu Godokono mahilo hunamo ba:bo adipatiya:.
<- Luk 17Luk 19 ->-
a Ya:suku tetelo Yu tawakalubino komo ba:ma ka:nala, iba:te kokonomo gelebadihole ka:molo-goegoa:mo ibino oko bowatihonakuya:. Iyo, komo hiya:hiya: tetelo ka:molo-goegoa:te ibino ilina bewatanakuya: muhulu hopamo, ba:gala komo tetelo iba:te bogema: watenama:.