1 Ba:bene eta Yu tawakalubino okoha: talona hegelalo Ya:suti baa: nama: eta Pa:lisi kapiyuimipino watodawoeno genamamo ba nodoluta, ba:bolo da:pola:nuya: ba:bi tawakaluba:te ebe baidi kodakodalo umitiya:. 2 Ba:ba tetelo eta dubu ape alupoe temetemete duminami, ebete Ya:sukunu holoholo hapuamo da:piya:, 3 ba:bema: Ya:suti Godokono Tutumu iya:tulamepi ba:gala Pa:lisi kapiyuimipi dubatamo na:goiya:, “Aeno tutumu tabote keba ka:na kiya:tua:mena? Okoha: talona hegelalo lumagi hiduimi wadiyala:ka: o kubala:ka:?”
4 Huiyatiya iba:te eta tabo kaga:luya:ha:, ba:bene Ya:suti ba:be dubu kokotamo lawete ebe hiduimiti ebe ba:bo noemiya:. 5 Ba:bene Ya:suti iba:tamo na:goiya:, “Amia:no guduti talona hegelalo haka gugamo da:negamene, ama:le ebe tiyolo konowalubima:na:ta, aba: hibila:ka:? Iyo, ba:be atu hegelalo amia:no kau-goete beya ma:pea:mo da:negamene, ama: atumu ebe tiyolo konuluhukutima:na:ta.”
6 Ba:bema: iba:te hilopohote Ya:sutamo huiya tabo ga:lama: kamodobuya:ha:.
7 Ba:bene eta tetelo Ya:suti baa: na habalo ba luta, genama namutudawate dopamo da:ka:lamiya: ebeno poko baa: konahama:, ba:bi dubate da:pelamiya: iba:te ubila koko tawakalubino habalo pegagahidi. Ya:suti ba:be komo umiti iba:tamo eta iya:tulame uwi ba:ma ka:na kiyauya:, 8 “Eta dubuti uli kamena lawe poko tetelo ebete ama: eba:go baa: nama: da:kiyamemena:, ba:ba tetelo ama: ko habamo akanemeda:la:. Diyala, eta ko dubuti da: pemene, 9 ba:bema: poko namutudawate pete ama:tamo ba:ma ka:na kopegoema:ne, ‘Ama: eba:, nelehega! Ba:moe ko haba ba:moe dubuti kopemedema:ne!’ Ba:ba tetelo ama: ba hilopo deha:poto habanomo kolawema:na:ta. 10 Ba:bema: wadiyala ama: baa: nama: da:pemena:, ba:ba tetelo ama: deha:poto habanomote na:pelawiya:, ba:bene poko namutudawate pete ama:tamo ba:ma ka:na kopegoema:ne, ‘Hopodalagi, ba:moe deha:poto haba miya:pate, ko haba na:lawa:.’ Ba:bene baa: da:nahuta ba:bi tawakalubi hiliyonomate ama: ba umita, ebete ama: ba:ba ka:na kokalakaluimima:na:ta, 11 mabu hibila, lumagiti ebe ha:kiya ebe koma: da:midimini Godote ebe deha:potoma: komidima:ne, ba:gala kebe lumagiti ebe ha:kiya ebe deha:potoma: da:midimini Godote huiyatiya ebe koma: komidima:ne.”
12 Ba:bene Ya:suti baa: kebe genamalo ka:nutiya:, ebete ba:be genama namutudawatamo na:goiya:, “Ama:le poko dododimina: ba:ba tetelo amia:no habanapi, ba:gala amia:no nani ekaki, ba:gala amia:no komo hawi tawakalubi, ba:gala amia:no hopolo demedehona ilina hiliyonomagopi akaka:lama:la:, mabu ba:bako tawakaluba:te ama:tamo gala kakahuiyama:na:. 13 Huiyatiya ama: poko dododimina:, ba:ba tetelo ilinaha:pi, nato kubakubapi, ba:gala baidi tamiholamepi, ba:bakobako tawakalubi na:ka:lamiya: poko habamo, 14 mabu iba:godolo ilina puliyala ama:tamo huiyama:. Ama:le ba:ba ka:na dododinakomena:, Godote ama: hidamo bowalubinakomena:ta, ba:gala tuputupu tawakaluba:te hoe ipuwane da:mahila:hamena: ba:ba tetelo ebete eta hido huiya ama:tamo gala kakikamema:na:ta.”
15 Ba:bene Ya:sukuba: baa: naha habalo da:pola:nuya:, ibi ipuwalo eta lumagiti ebeno tabo uliti ebetamo na:goiya:, “Godote Ko Gawadalagima: deda:na, ba:be habalo baa: da:nahamena: ba:bi tawakaluba:te kokalakalahama:na:, kalakala bada konomola:ka:!”
16 Ya:suti huiyatiya ebetamo na:goiya:, “Eta dubuti ko poko ododi nopo ba ihate tabo dopamo komo hiliyonomo tawakaluba:tamo noemi iba:te kopelamema:. 17 Ba:bene poko hegelate da:pi, ebete ebeno okodawa ba:bo oemi ba:bi atu tawakalubi kokiyahalamenatoma:. Ba:bene okodawate tote iba:tamo na:negoi, ‘La: poko habamo na:pelama:la:, ilina hiliyonomo a:hiduilamema:,’ 18 huiyatiya ibi hiliyonomate pelamema: ubiha:ma: eda:hate etate eta tabo goenakui, etate eta tabo goenakui, ba:ba ka:na ewagelitiya:.
21 “Ba:bene okodawate ebeno namutudawatamo kapete ba:bi tawakalubino ubiha: komo ebe na:pikiyami. Ko dubuti ebeno tabo duli, ebete maubate okodawa ba:bo kiyami, ‘Ama: tiyonomo gala na:katoa. Ama: ko habamo nuluhukuti, ba:be haboeno koko ba:gala hegehege gabodo ba to, ilinaha:pi, ba:gala nato kubakubapi, ba:gala baidi tamiholamepi, ibi hiliyonomo ba:moe poko habamo na:magaheliya:.’
22 “Ba:bene okodawate gala da:kawilui, ba:ba tetelo ebete na:pegoi, ‘Kodawa, ama:le da:gaa:ka nale a:nododimo. Hiliyonomo tawakaluba:te a:pelama:, huiyatiya poko habalo haba kodopo bitana komopa:te kopelamema:.’
23 “Ba:bema: ko dubuti ebetamo na:goi, ‘Ama: gala katote tumulu demedehona ba:gala hiya:hiya: gabolo da:wapata:lamita, ba:bi tawakalubi tiyo nowalolete ibi atumu na:kamagaheliya: naeno poko genamate kotaboma:.’ 24 Ba:bene ba:be ko dubuti ebeno genamanapa:tamo ohobigate na:kagoi, ‘Nale la: hibinomolo goelamemata, nale dopamo da:ka:lamimo, ka:lo ba:bi tawakaluba:te ibino ubiha: komo da:hawakalima:ka, ibi ipuwalo eta kapiya lumagiti naeno poko baa: a:kanamene.’ ”
25 Ba:bene tawakalubi hiliyonomate Ya:sukuba: da:tolamitiya:, ba:ba tetelo ebete pohobigate iba:tamo na:goiya:, 26 “Kebe lumagiti natamo pema: ubi dihatemene, ebete ebeno nabiwi menoko, ba:gala ebeno kamena gugudi, ba:gala ebeno nani nanikokubi ba:gala ekaki, iyo, ebeno kateneno ka:ka: atumu, ebete ba:bi hiliyonomo komokomo gunima:mo ihilateleheno, ebete na ta:mahenema: a:kamodobamene. 27 Iyo, ba: hibila, kebe lumagiti ebeno keha pihiga aguti na ta:maheneheno, ebete nago kapimilo toma: a:kamodobamene.
28 “Numa:la:, la: ipuwalo eta lumagiti hununomo genama etema: ubi dihatemene, ebete dopamo emedete genama eteno mani kuititi hidamo emalagidolote, ebegodolo da:pola:na ba:bi mani ba:ma ka:na koka:lamiholema:ne, ba:be genama upula:ma: mani modobola:ka: o modoboha:. 29 Ebete ba:ma ka:na ewageleheno ebeno genamoeno hototo amihote, ba:ba tetelo mani upula:te oko da:miya:pamene, tawakaluba:te ba:be komo umimiti ebe ba waliti, 30 koga:lama:na:, ‘Genama etema: da:tupuimi huiyatiya upula:ma: helohenola, ba:moe ba:be dubula!’
31 “Ba:gala eta komo. Eta ko gawadalagiti eta ko gawadalagitamo alaholoma: dewagelemene, ebete dopamo emedete ba:be komo hidamo ba emalagidoluta ba:ma ka:na kogoema:ne, ‘Naeno 10 taosene alaholohopi dubate eta gawadalagino 20 taosene dubago alaholo modobola:ka:?’ 32 Ebete ebeno ukuilo modoboha:ma: da:goemene, eta ko gawadalagiti muhuludopone ba pita, ebete ebeno ubihale dubu dopamo konoelamema:ne. Ba:bene iba:te eta ko gawadalagitamo nikuliti konega:lama:na:, ‘La: bada ubi kihatiutama ale la:tamo kikalamema:? A ubila la:go komiloma:.’ ”
33 Ba:bema: Ya:suti kuititi tabo ba:ma ka:na goiya:, “Naeno taboeno ko ipuwa ba:ma ka:nala, kebe lumagiti ebeno emede komokomo hiliyonomo gunima:mo ihilateleheno, ebete na ta:mahenema: a:kamodobamene.”
34 Ba:bene Ya:suti gala na:kagoiya:, “Solo hidonomola, huiyatiya eta lumagino solo golate dalatidimini, ebete gala soloma: a:kamida:mene.*Buka ka:lamiholedawa, ba:moe go taboeno ipuwa ba:ma ka:nala, solo ba: hibima: mididawoeno emede komola. 35 Numa:la:, tawakaluba:te nene ba:gala goegoeno ne kubanomoma: ga:lanaka huiyatiya ba:bako ilina pali hakamo diya:hekemena:, ilinate hidamo kapepehoma:na:. Huiyatiya lumagino tepo ipuwoeno solo eba ka:naha:. Ebeno solo golate dalatidimini, ebeno ka:ka:te kubanomoma: ba eda: hido oko gala a:kowatinakamene. Ba:bema: ebete ebeno ka:ka: gala hidoma: keba ka:na na:ka:midimini? Gabo puliyala! Galagodawa, ama: hidamo nulia:!”
<- Luk 13Luk 15 ->-
a Buka ka:lamiholedawa, ba:moe go taboeno ipuwa ba:ma ka:nala, solo ba: hibima: mididawoeno emede komola.