HEBËRË 8

Bhoŋar bhalu

1 Na manjoonan, uko unkaanuŋ udooni ţi uko wi ŋkţupuŋ uwooŋ: ŋka *naşih i baţeŋan anyaaŋ aţo du baţi du kañen kadeenu ki pţij pi pşih pi Naşibaţi. 2 Aji ţeŋan du dko dyimanaan, dawooŋ *kaloona ki bayiti na manjoonan, ki iñen yi ñaaŋ najën iwooŋ iintari, Naşibaţi Ajugun ataruŋ ka.

3 *Naşih i baţeŋan andoli baţoorana ţooran ado kado uţen na iţeŋan ; ukaaŋ kë *Kriŧtu kak awo kaka uko uloŋ wi akţenuŋ. 4 Woli awo lah ţi mboş, aando wo wo naţeŋan : baloŋ bawo da banknţeŋanuŋ jibi *Bgah bi Moyiŧ bajakuŋ. 5 Kë iţeŋan yi baţeŋan mënţ bajaaŋ bado işë ţu kanaam na inkdolaniiŋ du baţi, iwo wo ji ulimënţ wi ya. Na manjoonan, wi Moyiŧ abiiŋ awo i pboman *kaloona ki bayiti, Naşibaţi aji na a : « Tenan, ido ka bŧi kanaam na uko wi ndiimaniiŋ du pnkuŋ pi Ŧinayi. »[a] 6 Kriŧtu ul, Naşibaţi aţu'a ulemp undëmuŋ apel wi başih biki baţeŋan bandukiiŋ, Naşibaţi aţëpna ţi a ado bhoŋar bannuurnaaniiŋ, wi ahoŋuŋ iko innuurnaaniiŋ.

7 Woli bhoŋar bŧeek[~2~] baanka lah dko di babiişni, Naşibaţi aanknuma pdo btëbanţën. 8 Kë Naşibaţi aşë ŋoman na pntaali pi nul aji :

« Nji Ajugan dji :

ŋnuur ŋloŋ ŋabi ŋi nji kaluŋ kado bhoŋar bhalu,

bhoŋar bhalu na bañaaŋ biki Iŧrayel na biki Yuda.

9 Bhoŋar mënţ baankwo ji bi ndoluŋ na bateem baka

unuur wi mpënanuŋ baka du uŧaak wi Ejiptu.

Baambi ţijan bhoŋar bi naan,

ukaaŋ kë nji kak nwutan baka.

10 Nji Ajugan dkak aţiini aji :

woli ŋnuur mënţ ŋaţëpi

bhoŋar bi nji kaluŋ kado na pntaali pi *Iŧrayel bii bi :

dluŋ kapiiŧ bgah bi naan ţi uşal wi baka

dluŋ kapiiŧ ba ţi ŋhaaş ŋi baka,

dluŋ kawo Naşibaţi i baka,

kë bakluŋ kawo pntaali pi naan.

11 Wal mënţ, nin aloŋ aankak anaţa kaji ajukan akinţul këme ayiţul

kaji na a : “Meen Ajugun!”

Bañaaŋ bŧi baluŋ kame'ën,

du anwoonuŋ nampoţi te du anwoonuŋ naweek.

12 Dluŋ kamiir baka pjuban pi baka,

mënkak aleş nin ipekadu yi badoluŋ. »[~3~]

13 Wi Naşibaţi aţiiniyaanuŋ bhoŋar bhalu, ado bjon kë bakak awaaŋ udooni. Kë uko unjonuŋ akak aţaf, uji uban ţi pba.

<- HEBËRË 7 HEBËRË 9 ->