Salmo 97
97
Si Diyos Di Kangatoan Ay Manturay
1 Si Diyos di manturay isonga manragsak kayo ay ipogaw isnan daga,
olay dakayo ay wada sin kaaddawian ay soli na.
2 Nanliniked di liboo ya bolinget en sisya,
nalinteg di panangituray na.
3 Waday apoy sin sango na,
et pooana din kalabana ay nanlikob en sisya.
4 Masilawan din lobong sin kimat na,
manpayegpeg din daga ay mangila.
5 Din dodontog yan kaman allid ay matenaw da
sin sangoanan Diyos ay mangituray sin intiro ay daga.
6 Din wada ed daya yan ipaammo da din kinalinteg na,
mailan di amin ay nasyon din kinangato na.
7 Amin ay mandayaw si kinitikitan et maibabain da,
siya abe sin mangit-it-ek si didiyosen ay magay silbi na.
Amin ay sinan didiyos et manyakog-ong da sin sangoanana.
8 Gapo sin panangokom Diyos yan manragsak da
din ipogaw ed Zion ya Juda.
9 Tan si Yahweh di mangituray sin intiro ay daga,
mo is-o sin didiyosen, addawi ay nangatngatos sisya.
10 Laylayden Diyos din manigsigaan sin lawa,
salaknibana din biyag di ipogaw na
ya isalakanas daida sin mangam-amag si lawa.
11 Masilawan din nalinteg et manragsak da.
12 Dakayo ay nalinteg, manragsak kayo
gapo sin inam-amag di Apo.
Nemnemen yo din inamag na,