Salmo 56
56
Si Diyos Di Pantalkan Sin Timpo Ay Pan-egyatan
1 Maseg-ang ka ay Apo,
tan kanayon ay pomaligat din kalaban ko.
2 Maninsin-agew ay omibaw da,
ad-ado da ay komonkontra.
3 Diyos ay Kangatoan, sik-a di pantalkak
mo wada di pan-egyatak.
4 Idaydayaw ko din karim ay omisalakan ka.
Magay pan-egyatak tan mantalekak en sik-a,
din owat ipogaw yan magay maamag da.
5 Din ibagak yan kanayon ay tilitilen da.
Pag din pomaligatan da di kanayon ay nemnemen da.
6 Matopog ya mantabon da,
siimen da amin ay amagek ta pomse da.
7 Dosaem daida gapo sin basol da,
ipailam din bonget mo, abakem daida.
8 Ammom met mo kas-anoy lowak ya ligat ko,
sigurado ay insolat mo si libro.
9 Sin agew ay kedawek din badang mo,
lomayaw dan to din kalaban ko.
Ammok ay komadkadwa ka, Apo.
10 Idaydayaw ko din karim ay omisalakan ka.
11 Magay pan-egyatak tan mantalekak en sik-a,
din owat ipogaw yan magay maamag da.
12 Masapol ay idaton ko
din inkarik en sik-a, Apo,
man-idatonak si iyaman ko,
13 tan inmisalakan ka sin kateyak
ya adim inpalobos ay maabakak.
Isonga nay ay wadaak sin pangiilaam, Apo,