Salmo 52
52
Din Pantongpalan Di Makedse Ay Ipogaw
1 Sik-a ay mandindinamag di kedse na, apay nga it-it-ek mo
din lawlawa ay inam-amag mo?
Adi polos manbalbaliw din layad Diyos Apo.[a]
2 Maninsin-agew ay en ka manplano
si panligatan di gagait mo.
Din tepek mo, kaman rabahas di katadem na,
pag etek di en ka ibagbaga.
3 Sigaam din siged, say laydem din lawa.
Laylaydem din etek mo din tet-ewa.
4 Maetek ka
yan laylaydem amin din kali ay manadael si ib-a.
5 Ngem awni et dosaen Diyos sik-a
ta madadael kas eng-enggana.
Sipdotenas sik-a sin beey mo,
et kaanen daka isnan kad-an di matmatago.
6 Masdaaw din nalinteg ay ipogaw ay mamoyboya
et masiyek da yan kanan da,
7 “Ilaen yo san ipogaw ay sana.
Baken si Diyos di nankamangana
mo adi et nantalek sin kinabaknang na
ya sin lawa ay inam-amag na.”
8 Ngem sak-en pay, maiarigak si kaiw ay olivo
ay magmagabay sin beey di Apo.
Mantalekak si eng-enggana
sin adi manbalbaliw ay layad na.
9 Man-iyamanak si eng-enggana, Apo,
gapo sin inamag mo.
Enak ipaammo din kinasiged mo
sin sangoanan di ipogaw mo.
<- Salmo 51Salmo 53 ->
-
a Siya na di kanana sin Hebreo. Din kanana abe sin Syriac et: din lawlawa ay inam-amag mo sin ipogaw Diyos Apo?