Salmo 24

Si Diyos Di Kangatoan Ay Ari

1 Okan Diyos nan daga ya am-in ay linaona.

2 Insaad na din fondasyona sin dallem di danom,

inbangona sin lanad di baybay ay malosong.

3 Sinoy way kalebbengana ay manikid sin dontog Diyos[a] ay mangdayaw en sisya?

Ya sino ngin di makasgep sin nasantoan ay Timplo na?

4 Sisya din ipogaw ay siged di am-amagena,

ya kosto abe di nemnem ya panggep na,

din adi manaydayaw si diyos ay baken tet-ewa,

ya adi man-et-etek mo mantistigo sisya.

5 Bindisyonan ya isalakan Diyos sisya

ya ibilang na ay magay basol na.

6 Kaman dana ay ipogaw di manglayad ay mandayaw en Diyos Apo

ay dinaydayaw aben Jacob ay ap-apo tako.

7 Bokatan yo din kadaanan ay pantew di Timplo

ta senggep san kangatoan ya madaydayaw ay Ari tako!

8 Sino ngin san Ari ay kangatoan?

Sisya si Diyos ay kapipigsaan,

magay makaabak en sisya sin gobatan.

9 Bokatan yo din kadaanan ay pantew di Timplo

ta senggep san kangatoan ya madaydayaw ay Ari tako!

10 Sino ngin san Ari ay nangato?

Si Diyos ay ap-apon di sosoldado,

sisya san manakabalin ay Ari tako.