Salmo 150
150
Madaydayaw Si Diyos
1 Madaydayaw si Diyos!
Dayawen yos sisya sin Timplo na,
dayawen yo abe ed daya.
2 Dayawen yo begew sin nakaskasdaaw ay inam-amag na,
dayawen yo tan magay makaiso sin kinangato na.
3 Mananggoyob kayo ay mangidayaw en sisya,
tokaren yo abe di gitara ya arpa.
4-5 Manambol kayo dowan kayon mansala,
ipigsa yo abe ay manganggangsa.
Maitapi kayo ay nalaing ay manolili,
dakayo abe ay mankotingting si nakalakalasi.
Osalen yo koma am-in dana
ay mangidaydayaw en sisya.
6 Dayawen yos Diyos, dakayo amin ay naparsua.