Salmo 120
120
Din Manigaan Si Kapya
1 Sin enak nanligligatan,
nankararagak en Diyos yan ena pinatgan.
2 Kanak, “Apo, omisalakan ka sin ipogaw
ay maetek ya manangallilaw.”
3 Dakayo ay maetek, sinoy dosa yo
ay ipalak-am Diyos en dakayo?
4 Mankatatadem ay panan di soldado
ya man-ganggangab ay oling ay say dosa yo.
5 Aye, Apo! Kaseseg-angak pay isna,
tan din kakailiak et maiarig da
sin taga-Mesek ya Kedar ay kanan da.[a]
6 Nabayag ay nakiiliak isna,
sin kad-an di ipogaw ay manigaan si kapya.
7 Mo mankaliak maipanggep si kapya,
daida pay yan gobat di layden da.
<- Salmo 119Salmo 121 ->
-
a Addawi ay il-ili ay kad-an di ipogaw ay natangsit ya mayad ay makigobat.