Lomu 15

Kalaisi agu agesamoꞌma humainea kavafekeꞌya akave hisune.

1 Yisasife tamametiti huta tokiya neꞌvauna veaꞌmogata amametiti yaꞌamimoꞌma tokiya oꞌvainea veaꞌmogami kana yaꞌamia “Tamakaitami aliho.” huta ohisunagi tagaya haꞌmaꞌmaeta alita tagaiti lagu tagesamoꞌma haisia kavala ohisune. 2 Ohisunagi mukiꞌamogata tahaote tahaote tagaya tavateꞌma mainesaya veala amaya hisunageꞌya kanaleꞌya huꞌya Yisasife haviꞌya amakupi malenesaya yaꞌamimoꞌa tokiya vaisie. 3 Tagaya ago havimainone Kalaisiꞌa agaiꞌa agu agesamoꞌma haiya kavala akave omalenea yafena Anumaya Koti avopina agaife mage huꞌya kae-malenayane

“Veaꞌmoꞌya kagaiꞌma Anumaya Kotiga hu haviya hunegataya kemoꞌa nagaila melino aiso hunenate.” huno humaineane.

4 Nayoma kae-malenaya kemoꞌa meni kanafima tagesa alino akalo hisiafene huꞌya kae-malenayane. Anumayamo kema kae-malenaya kefiti tokiya vaisuna yaꞌene tagu tagesa ali heti-latesia yaꞌene haneafe tametiti yatimoꞌa tokiya vailategahie. 5 Anumaya Kotiꞌa veala tokiya vaisaya yaꞌene amaku amakesa ali hetimatesia yaꞌene aepaꞌagino tamaya hisigetama Yisasi Kalaisi humainea auꞌava yana akave maletafa hutama nagoke tamaku tamakesale maisae huꞌna Anumayamotega havinegoe. 6 Naꞌa hisayafe nagoke tamaipale maitama nagokete tamakuꞌa maletama Anumayatimona Yisasi Kalaisina Nefana Anumaya Koti agia alisaga hisae.

Kalaisiꞌa Isaleli veaꞌnene Isaleli vea omainaya veaꞌnene amaya humaine.

7 Veaꞌmoꞌya Anumaya Koti agima alisaga hisayafe Kalaisiꞌa tamakaila ali falu fala hulamateno tamavale-mainea kava hutama tamafu-tamakanagamina ali falu fala humatetama amavaletama nagoke tamaipale maiho. 8 Tamahapauve Anumaya Kotiꞌa Yuta veaꞌmogati taginagomogamife hamapai-mainea kemoꞌa falote huno fatago hinageꞌya “Anumaya Kotiꞌa tamageꞌage kano maine.” huꞌya hisayafene huno Kalaisiꞌa Yuta veaꞌmogamina amaya humaine. 9 Amaya higeꞌya Yuta vea omainaya anagaꞌmoꞌya Anumaya Kotiꞌa kayone hulamatenea yafe agia alisaga hisaya yafena Anumaya Koti avopina mage huꞌya kae-malenayane

“Naꞌa hisigeꞌna Yuta veaꞌne omainaya veapina kagia alisaga huꞌna musena hugategahue. Mono yagamefitiꞌene kagia alisaga hugahue.” huno humaineane.

10 Aniꞌa huno nago kemoꞌa maꞌa humaine

“Tamakaya Yuta vea omainaya anagaꞌmogatama agaiꞌa nofi anagaꞌaene ailalupetama muse hiho.” huno humaineane.

11 Aniꞌa huno nago kemoꞌa mage humaineane

“Tamakaya Yuta vea omainaya anagala Anumaya Kotina agia alisaga nehigeꞌya mukiꞌa veaꞌmoꞌya aniꞌa huꞌya agia alisaga hiho.” huno humaineane.

12 Aniꞌa huno nago kea Aisaiyaꞌa Anumaya Koti aune kanomoꞌa mage humaineane

“Yesi anagapiti aginagomoꞌa falote huno Yuta vea omainaya veaꞌmogatamina kava yagai-lamatesigetama agaifena ‘Tagu tamena aligatigahie.’ hutama tamametiti hugahae.” huno Aisaiyaꞌa humaineane.

13 Anumaya Kotiꞌa tametiti yatimo aepaꞌagino agaifema tamakupi malenaya yateti tusiꞌa muse yaꞌene tamaipa falu hisia yaꞌene tamamino havatelamatesigetama Alu Aotage Avamuꞌmo tokiyaleti tusiya hutama Yisasiꞌma hulamatenea yafena tamametiti hisae huꞌna nunamuna nehue.

Poloꞌa Yisasi kema hamapai-mainea yafena agaiꞌa tusiꞌa muse humaine.

14 Nafuꞌnaganagatama nagaiꞌniꞌa nametiti huana tamakaya kanale auꞌava yana kasagoꞌya nehae. Mukiꞌa ke havi yana tamakesaene veaꞌne mainae. Tamakaitami oꞌaya aꞌaya hutama hamapaisayana kanale amaku amakesa tamafu-tamakanagamina amamigahae. 15-16 Amamigahagi Anumaya Kotiꞌa kayone yamaꞌa namiteno Yuta vea omainaya veaꞌmogami amuꞌnopi Yisasi Kalaisi aliꞌya alisanafene huno hunateneafene huꞌna nagoꞌa kema kaemaloa kemoꞌa tamaku tamakesa aliꞌna hao huꞌna ali hagalo hugahe tokiya vaiꞌna negaove. Afaꞌa nokaogi mono note kava vaya kana huꞌna maineꞌna Anumaya Kotiꞌa hulatenea kanale mono kea huhaleꞌna hisugeꞌya Yuta vea omainaya anagaꞌmoꞌya aliꞌya amakupi malesageno Alu Aotage Avamuꞌmoꞌa “Alu aotage veaꞌne mainae.” huno humatesigeꞌna amavalesugeꞌya Anumayamo avate esageꞌna amisugeno Anumaya Kotiꞌa musena hugahie. 17 Naꞌa hisigeꞌna nagaya Yisasi Kalaisiꞌene ailokaeꞌna maineꞌna Anumaya Koti aliꞌyama neꞌalua yafena tusiꞌa muse nehue. 18-19 Kea nagoke yafeke huꞌna falote nehue. Yuta vea omainaya veaꞌma Anumaya Koti kema akave malesayafe Kalaisina agaiꞌa tokiyaleti nehue. Nagaiꞌni kanale auꞌava yatetiꞌene humainoa keletiꞌene tokiya avameꞌyama hua yaꞌene Alu Aotage Avamuꞌmo tokiyaletiꞌene hamanepauve. Yisasiꞌma hulatenea yafema kanale mono kema hulama huꞌna hamapauvana Yelusalemuti aepa heꞌna mukiꞌa kotega ute ete huꞌna Ililikumua uvaꞌyi humainoe. 20 Nagoꞌa mopalega Kalaisi agima ohavinaya haigilega ani aliꞌyana aliꞌna Kalaisiꞌma hulatenea yafena kanale mono kea hamapaisua yafekeꞌya nenahaiye. Havigu alu kanomo hagoteno Yisasi kea hamapaiteno ani kanomoꞌa posi ayemalenesia yosale no mo kisua yafena nonahaiye. 21 Anumaya Koti avopi kae-malenaya kate hugahe nehue. Mage huꞌya kae-malenayane

“Agai avagema ohavinesaya veaꞌmoꞌya agegahae. Keꞌama ohavinesaya veaꞌmoꞌya aepaꞌa havigahae.” huno humaineane.

Poloꞌa “Lomu veaꞌne tamaketeꞌna Sipeni ugahue.” huno humaine.

22 Mukiꞌa kanafina Lomu mainaya veaꞌmogatamalega ugahe huanagi visua kana ani aliꞌyamo tilegeꞌna oꞌunoe. 23-24 Oꞌunogi meni kanafina malega hanea aliꞌyaniꞌa alivaya ayoanagiꞌna ayaꞌaya kafugefa lamakaitega visue huꞌna nagesa havi havi humainoafe menia Sipeni visua katelagiꞌna osi kanalega tamakaiꞌenena mo faeꞌna hu falu fala hulamateteꞌna muse huꞌna mainesugetama naya hisageꞌna Sipenia ugahue. 25 Tamakaitega ugahuanagi hagoteꞌna Yisasina amakuꞌa aminaya veaꞌne amaya hisuafe Yelusalemu neꞌue. 26 Nagoꞌa yaꞌamima omalenea veala Yelusalemu maineꞌya Yisasife haviꞌya amakuꞌa aminaya veaꞌmogamifena Masetonia vealagi Akaiya vealagi amakesa haviteꞌya muse huꞌya monea amamigahe nehayanagiꞌna aliꞌna momamigahue. 27 Hagoteno Yuta veala Anumaya Kotiꞌa amaku amamema aligati-mainea kanale mono kema Yuta vea omainaya veaꞌma hamapaimainaya yate ani veaꞌmoꞌya anonaꞌamia haneanagiꞌya amaipamoꞌa kanaleꞌya higeꞌya “Amamigahune.” huꞌya Yuta veala amaugafale yana kanale humatesia yama amamisayana kanale yane. 28 Ani monea alitalu huꞌya namisageꞌna aliꞌna Yelusalemu mukiꞌa monea momamiteꞌna tamakaya mainalega uteꞌna Sipenia ugahue. 29 Tamakaitegama uvaꞌyi hisuana ago havuana Kalaisina kanale manuꞌamoꞌa havatenateneanagiꞌna tamakaitega egahue. 30 Mukiꞌa nafuꞌnaganagatama musetami nehugi Anumayatimoꞌa Yisasi Kalaisi hulatenea yafeꞌene Avamuꞌmoꞌma tahau tayamopafi nelahaiya yama taminea yafeꞌene lamahavi-negoe tokiya vaitama nagaifena ke hutama Anumayamotega havigegeno nagaila naya hino.

31 Mage hutama nunamuna hiho “Yutia mainaya veaꞌmoꞌya Yisasi kea nohaviya vealagiꞌya Polona atafa huꞌya ali haviya hutegahe nehagi kagaya Anumaya Kotiga augafa aligatio. Yelusalemu maineꞌya Yisasina amakuꞌa aminaya veala Poloꞌa amaya hisigeꞌya ma ma hamaꞌmaesia aliꞌyama neꞌalia yafena hamaisigeꞌya musena hisae.” hutama havigeho. 32 Naꞌa hutama havigesagenoꞌa Anumaya Kotiꞌa hainagenofena lamakaitega evaꞌyi huꞌna muse huꞌna tamakayaenena maifalu hugahue. 33 Anumaya Kotiꞌa taipamoꞌma falu hisia yamona aepaꞌagino tamakaiꞌene mukiꞌamogatamaene maisie huꞌna nehue. Tamage.

<- Lomu 14 Lomu 16 ->