1 Aakic hombaŋ maickehame Jesuzi e jahacnere šiŋuc manawec: No mâreŋ beherâ Mamactao risie fepemurâ dameŋ bembeŋkekac. Iŋuc manarâ mâreŋko wiacfâc-ticne maŋjauŋ ejarewec, i ejare tarahuc hâmoocte muwec. 2 Eme ŋafere nânâ nâniŋte tumaŋnehapie wiac kecšiŋuc fuawec: Simoŋ ŋokâ-ticne Juda, Karioto haeonec, e Jesu doc baocte Sataŋzi maŋticnao qafeŋ râewec. 3 Á Jesu e šiŋuc manawec: Mamac e wiac sasawa furu qârârie-narekac, eme no Anuturaonec wahapozi mocwâc Anuturao risie fepemu. 4 Fuŋne iŋuc manahuc nânâ nâhuc ŋembiŋkonec faharerâ ŋaqi šora faine i hetararâ gie qoruc jomawec. 5 Erâ opâ râqâcko qame hume fuŋkerâ motecfâcne kike šure-jarewec. Ehuc gie qoruczi bâkereŋke-jarewec. 6 Ejare raku Simoŋ Petororao fisime šiŋuc âzâcnewec: “Go Wofuŋzi kike-nane šurezo mukic me?” 7 Mume Jesuzi šiŋuc âzâcnewec: “Wiac ekopac irec fuŋne šiŋuczia mi manakomec, juku šâhecko manacmu.” 8 Eme Petorozi šiŋuc muwec: “Aricne, go kike-nane mi šure-jâmbâŋkecmu.” Mume Jesuzi šiŋuc âzâcnewec: “Noni mi šurecgupe nohec maŋ šušuhuc mi jucmu.” 9 Eme Petorozi šiŋuc muwec: “Wofuŋ, murâ kike-nane sawa mâcne, me qizec-nane mâmâc šurec.” 10 Mume Jesuzi šiŋuc âzâcnewec: “Moc e opâ ruarâ šâhec kike-ticne sawa šureme sahacne ɋaɋacne fofâreocmu, eme ŋoŋe iŋuc jaha ɋaɋackembiŋ, erâ ɋaɋacnea mi jufâreŋgopieŋ.” 11 E doc bapa-ticne mana tarahuc šiŋuc jazawec: “Ŋoŋe ɋaɋacnea mi jufâreŋgopieŋ.”
12 Kike-jeŋic šure-fârerâ ŋaqi šora-ticne mocwâc heme hume waha ŋehuc šiŋuc jazawec: “No wiac eŋarepac irec fuŋne manaŋgopieŋ me? 13 Ŋoŋe Qaqazu â Wofuŋ munareeŋgopieŋ, erâ iŋeŋic jukopacte sâcne munareeŋgopieŋ. 14 Eme no Wofuŋ â Qaqazu-ŋeŋiczi kike-ŋeŋic šure-ŋarepacte ŋaŋaczia iŋuc jaha kike šušurec erahuc jupie sâckezejec. 15 Mâsi eŋarepac izi juju bapare ma qâreŋ-ŋeŋic eme i honehuc, eŋarepac irec sâc ehuc junšepieŋ. 16 No jâmbomac jâmbâŋ mupe mananiŋ: Kiŋaŋ moteczi bomboŋ-ticnere sâc sirickerâ jujune i mi fokac, â sorekicnezi sorewec ere sâc sirickerâ jujune i wâc mi fokac. 17 Eme dâŋ i manapaŋkerâ irec sâcko jupie no ŋoŋere manape šerine eocmu. 18 No dâŋ mupe mâmâc sasawa mi rocŋopakac. No wenimoi rowosâec-ŋopapo i manakopac. Dâŋqâreŋ moc kecšiŋuc fokac, i sanaŋkeocmu hâcne: Nânâ bâfâuc ecneekopac eki wâc bunaneo bakac. 19 Wiac i mi fuahame qanaŋ ŋazakopac, eme šâhec fuame, e Wofuŋzi qanaŋ manahuc muwec, nore iŋuc munšepieŋ. 20 No jâmbomac jâmbâŋ ŋazape, moc e gie muŋarekicne ŋoŋe hezu hewâneŋ eŋareocmuzi gie rune no hezu hewâneŋ enareocmu, â moc e no enareocmuzi sorecnuwec e hezu hewâneŋ ecneocmu.”
21 Jesu e dâŋ iŋuc murâ bu šašamaŋne fâuckezo eme mutaniŋkerâ šiŋuc jazawec: “No jâmbomac jâmbâŋ mupe mananiŋ, ŋoŋeraonec moczi no doc bacnuocmu.” 22 Iŋuc mume motec jaŋe hohonec efârerâ, i more mukac, muhuc kâuc bambiŋ. 23 Eme motec moc Jesure maŋfuŋko ŋewec, e bufuŋ jâmbâŋ-ticne, 24 e hâcne Simoŋ Petorozi mezi sâsâc ecnerâ muwec, “Wiocnetec gazaoc, more mukac?” 25 Eme motec eki hâcne qizec-ticne Jesure amecko fohorerâ muwec, “Wofuŋ go more mukic?” 26 Eme Jesuzi muwec, “Poroŋ sicko âke uruckerâ râcnepe nâocmu ere hâcne mukopac.” Iŋuc murâ poroŋ sicko âke uruckerâ Simoŋ ŋokâ-ticne Juda, Karioto haeonec, e râcneme nâwec. 27 Nâme Sataŋzi maŋne sakioŋkewec. Eme Jesuzi šiŋuc âzâcnewec: “Wiac ezo mukomec, i biac jaha ezemec.” 28 Dâŋ iŋuc âzâcneme gâcne mâmâc ŋembiŋzi mi mana-hâmombiŋ. 29 Ehuc tucnezi šiŋuc mumbiŋ: “Juda e moneŋ kânoŋ wirec-nâŋec bajukacte hombaŋte wiac moc furine baocte sorekac, me ŋic hapetac moneŋ jareocte mukac.” 30 Eme Juda e poroŋ nârâ izia ŋafe fuaha rawec.
31 Juda rame Jesuzi motec gâcne šiŋuc jazawec: “Ʒi Ŋic Fâri Wâtuŋne e huriri qâreŋ-ticne fuakac, eme ere erâ Anuture huriri qâreŋ mâmâc fuakac. 32 Ŋic Fâri Wâtuŋnezi Anuture huriri qâreŋ bâfuawecte Anutu e jahac Ŋic Fâri Wâtuŋne ere huriri qâreŋ iŋuc jaha bâfuaocmu, dameŋ mi šorahame biac bâfuaocmu. 33 Motecfâc-nane, no dameŋ bembeŋne mac moc ŋoŋehec jupemu. Eme šâhec basacnuniŋmu. Eme Judaŋic jazapo ijaha ŋoŋe ŋazape: No rapemu ijaha sâcne mi fâniŋmu. 34 Eme ši sâcmutâc dâŋ ɋâricne ŋazape: Maŋjauŋ eec enšepieŋ, noni maŋjauŋ eŋare warehuc jupo iŋuc jaha ŋaŋackoaŋ maŋjauŋ eec enšepieŋ. 35 Maŋjauŋ eec epie ŋic jaŋe honec-ŋopapie motecfâc-nane juŋgopieŋ ezejec.”
36 Eme Simoŋ Petorozi wiocnerâ muwec, “Wofuŋ, go wena racmu?” Eme Jesuzi muwec, “No rapemu ijaha šiŋuczia sâcne mi fâcmu, juku šâhec ine fâzemec.” 37 Eme Petorozi šiŋuc muwec: “Wofuŋ, no wemocte šiŋuczia sâcne mi fâpemu? No gore erâ juju-nane sâcne qikiŋnepemu.” 38 Mume Jesuzi šiŋuc âzâcnewec: “Go nore erâ jujuge qikiŋnezo mukomec me? No jâmbomac jâmbâŋ gazape: Qâqâczi mi dâŋehame goki jahec â moc mic bacnucmu.
<- JOHANE 12JOHANE 14 ->