HEBIRAIO 5

Jesu e šâic gie bakume Anutuzi taha bapa sâko âkendâŋnewec

1 Mâreŋŋic nâŋâcnaonec taha bapa sâko rowosâec-jopakicne sasawa jaŋe ŋic jaŋere erâ Anutu fuacnehuc kiŋ bahacte taha bâzi rikecne niŋte râec-jopakicne. 2 Taha bapa iŋucne e jahac ŋic dodocne jukacte ŋic mutucne â qâsoriekicne sâcne urucne ejareekac. 3 Erâ fuŋne iŋucte ŋic jaŋere kiŋ bahacte mecne â e jahacne mâmâc taha bâzi rikeocte mukicne 4 Gie fekicne i ŋic moczi maŋticnere mi rorâ bapane, taha bapa ŋic moc e Anutuzi rowosâerâ gie mucneme sâcne baocmu, Aroŋ iŋuc hâcne ecnewec 5 Eme Kristo e iŋuc jaha e jahacne maname fefene eha taha bapa sâko mi ewec, i Anutuzi šiŋuc muhuc mucnewec:

“Go hâcne Ŋokâ-nane,

no miŋecgac bâfuacgukopac.”

6 Erâ dâŋ moc šiŋuc muwec:

“Goki Melikisede ere sâcko

taha bapa jurašihuc jucmu sanaŋ.”

7 Jesu e mâreŋko juwec dameŋ ira, hâmockonec bataraocte tâpiri focnewec erao numuhuc kio wâwâsic kâcɋene ecnewec. Ehuc Anutu araŋ bacnewecte manacnewec. 8 E ŋokâ juwec, erâ sifu šâic gie baku micrereŋte fuŋne mana tarawec. 9 Erâ wiac emataucke-fârerâ mume rereŋfâc-ticne sasawa jaŋere bâbâpiaŋ tatara tâmiric bâfuawec. 10 E hâcne taha bapa sâko erâ Melikisede ere sâcko juocte Anutuzi mucnewec.

Ɋiemaŋ mi juzo

11 Irec dâŋ bocjaha fokac, erâ ŋoŋe hazecfâŋ juŋgopieŋte ŋaza mutâc epemurâ manape ŋemâckekac. 12 Ŋoŋe dameŋ šora miti mana wareeŋgopieŋzi gâcne qazu-jarepie sâckezac” eme iŋucne ŋoŋe miti maine i mocwâc qaqazu-ŋarenere sâc eŋgopieŋ. Ŋoŋe nânâ sanaŋnere sâc aricne, susu nânâre sâc sawa juŋgopieŋ. 13 Susu nâeŋgopieŋ jaŋe ine ɋiene mujarezo, iŋucnezi dâŋ fârine wemocko mana taraniŋmu? 14 Nânâ sanaŋne i sokakicne jaŋere biŋe, maŋ mamanasu-jeŋic fua tâcneme biaŋne sâqocne mana wosâeeŋgopieŋ jaŋere biŋe hâcne.

<- HEBIRAIO 4 HEBIRAIO 6 ->