TESALONIKE II

Tesalonike ŋic jaŋere papia II i Paulozi Korinti haeoa juhuc qâreŋkewec. Papia namba 1 qâreŋke-jarerâ ŋeme rame mi šorahame Paulozi jaŋeraonec dâŋ biŋe kecšiŋuc manawec: Tesalonike haeonec miti ŋic ŋokac jaŋe harierâ šârâ hâriŋ faio fembiŋ juŋgopieŋ (gaŋ 1:5-10). Erâ moc šiŋuc manawec: Papia mârâcko râepe rawec izi wiac bâtâcne bâtimuŋ sâcne mi efârewec. Aricne Jesu fifisi-ticne e mumusifuc bâfuarâ Paulorao âke hotahuc šiŋuc mumbiŋ: Dâŋ iŋuc mume warekac dâŋ iŋuc qâreŋkeme warekac (gaŋ 2:2). Á gâcnezi šiŋuc mumbiŋ: Wofuŋ e biac warerâ hetarac-nâpowec (2:1-3). Dâŋ gâcne fuame ŋic tucne jaŋe gie qikiŋnerâ sisi hâhâŋ jumbiŋ (gaŋ 3:10-12).

Paulo e dâŋ iŋuc manarâ papia mocwâc qâreŋke-jarewec. Ehuc mitire erâ šâic fârohec juipiehuc mi dockembiŋ, irec bubiaŋ dâŋ qâreŋke-jarewec (1:3-4), erâ Wofuŋzi juku okacne sâckoa bazu-nâreocmu, irec fuŋne wâc mujaŋgeŋkewec (gaŋ 1:5-10). Erâ mumusifuc â qac qâsoric wiac fuawec irec fuŋne kecšiŋuc mu rituc ewec: Wofuŋ e acmâc jaha mi fisiocmu, â ŋic sindaŋnezi fua tâcnerâ eeatuc hâhâwicne bâfuaocmu (gaŋ 2:1-12). Wiac iŋucne mi fuahame Jesure dameŋ maickekac mi muzo. Iŋuc qâreŋkerâ miti paŋšâic bajuhuc irec fârine maŋkopec sahackopec bâfuaniŋte faŋ qajarewec (gaŋ 2:13 â gaŋ 3:18).

1 Paulo, Siliwano â Timoteo nâŋe Tesalonike haeonec kikefuŋ guru, Mamac-nâŋec Anutu â Wofuŋ Jesu Kristo ere ŋicfâc, ŋoŋere papia ši râeŋgopeneŋ. 2 Anutu Mamac â Wofuŋ Jesu Kristo eraonec aki anonoc â wama ŋoŋerao fotâcnerâ fozejec.

3 Âgofâc, maŋnâŋeczi jâiŋ-nâpome ŋoŋere erâ Anutu dameŋ sâc daŋge âzâcneeŋgopeneŋ. Mamanasiŋ-ŋeŋic boc fua ɋârâŋ eekac, â maŋjauŋ-ŋeŋic fua sawec eme qame qoŋgiŋ eeŋgopieŋ. Eme irec Anutu daŋge âzâcnepene i jâmbomac sâckeekac. 4 Erâ ŋoŋe fific guguriŋ eŋarepie šâic busâqochec juhuc mamanasiŋ-ŋeŋic mi ŋeŋgoroŋkeha sifu sanaŋkerâ jueŋgopieŋ, irec dâŋ binaŋ hae sâc Anuture kikefuŋfâc ejareeŋgopeneŋ.

5 Ŋoŋe wiac fua-ŋareekac, irec šiŋuc muzo: Anutuzi okac dameŋko wiac sâckoa enâreocmu, irec sâsâcne ši qanaŋ fuakac. Anutuzi ŋoŋere maname sâckeme uucmaŋ-ticnao rarašire sâc bâfuaniŋte šârâ hâriŋ faio jueŋgopieŋ. 6 Eme juku Anutu mana wosâc-ticne tiŋne fokac irec sâc enâreocmu: Ŋoŋe šâic fâro eŋareeŋgopieŋ jaŋe šâic fâro jaha bâfua-jareocmu, 7 â šâic fâro manaeŋgopieŋ ŋoŋe ine nâŋehec mâmâc bâgunuc-nâpoocmu. I juku Wofuŋ Jesu e aŋelo guru hâhâwicne jaŋehec sambâŋkonec waha fua tâcneocmu ira iŋuc enâreocmu. 8 E šocbâruŋko waharâ ŋic Anuture kâuc baeŋgopieŋ â Wofuŋ Jesu Biŋebiaŋ-ticne mana rereŋ mi eeŋgopieŋ jaŋe okacne jareocmu. 9 Ŋic i jaŋe Anutuzi furine sisipiric sanaŋ jarehuc šâŋe mai-ticnaonec â tâpiri-ticnere huriri biaŋkonec bârâriec-jopaocmu. 10 Eme dameŋ ira fuŋfuŋfâc-ticne jaŋerao eri tatamac-ticne fuaocmu, â miti-ticne ro maŋ embiŋ jaŋe hone warec ecneniŋmu. Ŋoŋe ine mumutaniŋ dâŋnâŋec mana šakiembiŋ hâcne.

11 Irec hâcne ŋoŋere erâ dameŋ sâc numuhuc šiŋuc mueŋgopeneŋ: Anutu-nâŋec e hefârec-ŋopaweczi irec sâcko juniŋte bašawiec-ŋopazejec, erâ tâpiri-ticnezi dopec-ŋopahame wiac biaŋnere mu manasuc ehuc mamanasiŋte gie fâri bâfua-fârenšepieŋ. 12 Iŋuc epie Wofuŋ-nâŋec Jesu ere šâŋe qâreŋzi ŋoŋerao fua jaŋgeŋkezejec, â ŋoŋe iŋuc jaha erao taniŋke biaŋ enšepieŋ. I Anutu-nâŋec â Wofuŋ Jesu Kristo eki aki anonoc-ticnere iŋuc eŋarezejec.