SUMBAOGHA 32

1 Yakub neneko, “Nanengeag punun,” aro inaag palamogpa, Allah Ilipsabo malaikat elag yalamek. 2 Yalameka tibogahiogti, Yakub nenekori, “Allah Ilipsabo yin saleropnang longorobagna ane,” aro as aneko Mahanaim* engkaog.

Yakubti Esauap haiptanunam aro seneraghogha (32:3-21)

3 Yakub nenekori nimi etpare eldi aruknaag, “Naro Esau Seir mog so'o Edom wamlaag pululom,” aro pogsiog. 4 Poglamsiogti, “Pimundi ambatlulomne ane:

'Na Yakub, anme. Na wene wamnange nuri awang Labanap sekel anan nimi saog uro wamnori, wene og yalamna. 5 Wene wamnange arukna kabuniap kelaboap, pham sapi, keledai, domba, kambingap nari saeag wamlaba, wene yanunne sembe, “Nai, andi awi yeng sembalulam,” aro yubu ane palilamna. Nari nimi tane pogsinne na yanunne sembe an ambatkiikpa, wana sepsebek uro wamlulam,' aro ambatlulom,” seog.

6 Esauag pina samoro Yakubag yaekti, ambarelamekti, “Nani, ando Esau pina kemelamoboba, ando neneko 'Naipsaeap haiptanunam,' aro nimi teng naual tarabare (400) wimbahioba, elap yalamongba, kembitsibori yalamap,” aro ambarek. 7-8 Ambarekpa Yakub neneko log maikno sembaogti, wanaag senaraglamogti, “Namaboap nanenge pham ni tanekoap anabiag pogto palu phende a'ero pimne, tanena Esauri nhon palu olamsile, tanena palu nhon ka'eseptaukang,” sembaogti, palu phende poloro wimbahiog.

9 Undo unuaogti, Yakub nenekori molona lelamogti, “Nanisag Abrahamdi elme Ishakap Sikini Allah wamlamne, Nani, Andi ambarelamneomdi, 'Andinge as taptopne ankabo wamangag pululam. Nari an piangkeneba, wali uro wamlulam,' aro nanag salag lebom. 10 Na malinge wamna, aghana Andi na o'ona sembamlumdi, samen yepnelum saog uro yeplamnelum. Na nanenge as laplobiagha lambahi sum sa'a-sa'a toro an koma kame tunguna aghabog toro salero agha mag Yordan kauro pihi, aghana wene samoro yalamnari, namaboap nanenge phamap kong phende yalamap. 11 Naro Esau neneko yaleri, 'Naringe kelabo meap opsileag,' aro log uro wamap. 'An saeag agha taulbahilulam,' aro mololangken. 12 Andi na ambarelamnelumdi, 'Nari an piangkene pahabog anisag yabo mag kirik a'angkea mag abolag to'op tangkamla saog uro wamleba, ailbanep kom saog wamlul,' aro ambatnelumne neneko sembe seneraglulam!” aro ambarog.

13-15 Ambarogti wanag agha seneraglamogti, “Esau wana wali nenenne sembe, 'Naringe pham nenne pabululom,' aro naipsabo arukahineri, na tane wamnun,” sembaogti,

pham kambing kelne teng linbareap, yemne lintarabareap,

pham domba kelne teng linbareap, yemne lintarabareap,

pham sapi kelne teng nhon epto naualbareap, yemne sa'obareap,

nimi poahirop pham unta teng nhon epto wilindiri maum tinilamsiekne nongap meap,

popsirop pham keledai kelne lintarabareap, yemne sa'obareap,

ni ane tobogti, 16 aero-aero kerekto wimbahiog. Kerekto wimbahiogti, ilipsabo ambarelamsiogti, “Na tane mamnundi, nikag taikag aro a'undi aero-aero popsimundi, samenag pululom. Inaag aero-aero palapmundi, nenne samenag pumunba, nenne amik pukang,” aro ambatsiogti, 17 “Samenag pulul,” sembaogne neneko ambarelamogti, “Tonge Esauap haiptarumundi, eldi hailogkeleri, 'Anna anina etne? A'un tala palamlom? Etneri pham agha payalamlom?' aro haibaghaleba, 18 andi ambarelapmendi, 'Andi arukna Yakubtinge payalamna. “Nani Esau sembe pabululom,” selba, tarel alangkeap. Andi arukna Yakub neneko amik yalamla,' sululam,” seog.

19-20 Ilipsabo “Pham pabukang,” sembaog nang eneko ni wene aro ambatoba yabihiog. Yakub nenekori, “'Esau wana wali nembanun,' aro pham taneko poa naipsabo samenag arukahineri, na amik pineba, Esauri, 'Wali,' sembalul,” aro seneraghogha sunsunum uro 21 pham wepto tobeka taneko samenag poa palamekpa, el mo aghabog ae kalun aeag aneko mabog.

Yakubap nimi nhonap ae Peniela tabareka (32:22-32)

22-23 Yakub neneko inipnag pukogti, elkelabo phendeap, eldi arukna phende kelaboap, elmabo ko'olombareap samenne mag Yabog kauro tara sip pil phiogti, el neneko samoro yaogti, elenge phamap eldinge ni tanekoap, “Mag Yabog kauro tara sip pabululom,” aro pogsiogpa, pil phiekpa, 24 el mo wamog. El mo wamogpa, nimi nhon elag yaogti, Yakub saelbaogpa, sin phende ko'olomoghol talamdek pahabog ae kwelekaog. 25 Ae kwelekaogpa nimi neneko, “Yakub mikipti nari el oro luknubanep kom,” aro el taogti, Yakubti yan il su kopkop tiptobag wenelobog. 26 Wenelobogti, nimi nenekori yubu lelamogti, “Heng yanualba, na sae limne,” seogpa, Yakubti, “Allah siag kipnemen tanena sae lipkenun,” seog.

27 Wene seogpa, nimi enekori, “An sina etne?” aro haibaogpa, “Na Yakub,” seog. 28 “Na Yakub,” seogpa, nimi enekori ambarelamogti, “An si Yakub alamukang kom. Andi Allahap nimiap babe talamlamdi, mikip talamba, an si Israel†Nimi si “Israel” nu yubuag “Allahap taropne” aro. alamukang,” aro ambarog.

29 Wene aro ambarogpa, Yakub nenekori, “An si lag phoro ambatne!” seogpa, nimi enekori, “Sa'a sembe na si lag phoro ambatkenun?” aro ambarogti, Yakub “Wali wamlulam,” aro kibog.

30 Undo unuaogpa, Yakub nenekori yubu lelamogti, “Nari Allah whing imna, aghana na teban kom,” aro undo unuarekag aneko Peniel‡“Peniel” engeropne ane nun yubuag “Allah whing” arop. engkaog. 31 Engkaogti heng yalamogpa, Peniel aneko laplobiagha palamogti, yan il komobaogne nenekori yan keamtiro palamog. 32 Nimi nenekori Yakub yan il komopto obog ane sembe, Israel nimi sumene babe pham yan tombarea il pangkal sop melmel telamang kom.

<- SUMBAOGHA 31 SUMBAOGHA 33 ->