Ibrani
Horok Lirna La'an
Nano nonolu ri man wakuku Horok Lap wekel horok eni naran ‘horok man aku laa ri Ibrani’. Naran ‘ri Ibrani’ onne na'ono ri ma namwali ‘ri Yahudi’, noro idewe ‘ri Israel’ haenhi.
Ik ka kauroin inhoi man hi'i horok eniyeni, ono ai kan loi naran, maa ik kauroin ai namwali man panulu lolo ri Ibrani ma namwali Kristen, la ka namwali ri nano ri idaweli woro'o man loikaru Yesus Lirna Wawa'an enihe (2:3).
Ik ka kauroin an aku horok eni laa inhawa kote, maa ik kauroin ri man kokala horok eni rauroinedi Musa nin Nou Nonolu, la hi rauroinedi agame nin holoor halauk man ri Israel lernohi lere nonolu onne.
Ik ka kauroin ri onnenihe holi lolo ewi, maa ik kauroin hi onnenihe ramwali ma akin naili'iledi Yesus, la mahar lernala wewerek pananaka ono lernohi Yesus. Rin hadwei hadwokor hi, rahoredi rir hahaa, la kele rodi laa bui raram (10:32-34, 13:3, 13), penia hi heruwali akin tana me'e (12:12), la heruwali ramhene lawuku ra'uli rasa'a Makromod Lalap me'e (10:25). Heruwali ka ramkene akin naili'il me'e, la manlo'o kar derne rakani Makromod Lalap me'e.
Ende ri man hi'i horok eniyeni nin panaeku wokelu: Wakuku hi panaeku ma namlolo, na'alap hi akin leke yon nado'o, la nounaku hi leke yon wali kili'urne Makromod Yesus.
An wakuku hi na'aheni Yesus eniyeni kulu narehi ha wo'ira na'akeme (1:1-4:13), la Ai namwali iknik Imam Man Kulu Narehi man paku ika mamani lolo Makromod Lalap kalarna (2:17, 7:24, 25). Man hi'i horok eniyeni konohi hi nahenia Yesus hari kalla leke ik lernala or'ori dardari ma kan horu (10:19-23), la an konohi hi yon ramka'uk hi'i lir napanak Makromod Lalap, ono Ai naramyaka ika rehi (4:16). An nounaku hi rahehe leke lernala Makromod Lalap Nin renren warwarna (3:10-4:11). Enla an nounaku hi mamani yon holi kili'ur kani ko'or Makromod Yesus, ono ri man holi naise onne lernala hunukum man werek narehi, la ka namwali hir wali wali'ur mai Makromod Lalap me'e (2:1-4, 3:7-19, 5:11-6:12, 10:26-39, 12:18-29).
Horok Ihin
1. Hana'arne dedesne: Yesus kulu narehi Israel nin man panulu na'akeme man nonolu ilitolle Makromod Lalap Nin Nou Nonolu (1:1-10:18).
a. Man hi'i horok eni nala wanakunu man hari horok eni (1:1-4).
b. Yesus kulu narehi hophopon a'am raram (1:5-2:18).
c. Yesus kulu narehi nabi Musa (3:1-4:13).
d. Yesus namwali Imam Man Kulu Narehi de An kulu narehi imam-imam na'akeme lolo Yahudi rir agame (4:14-7:28).
e. Yesus, iknik Imam Man Kulu Narehi, Nin honowok wa'an narehi nano imam-imam lolo Yahudi rir agame (8:1-10:18).
2. Hana'arne rewro'o nine: Yon ik akin nahinuri Yesus (10:19-12:29).
3. Panaeku Man Horu: Ik hi'i hehewi leke kahuwa'an Makromod Lalap akin (pnk. 13).

Yesus Nin siksika lerlere namnenehe noro Makromod Lalap

1 Nonolu eni, Makromod Lalap kan ren nodi kalla nammori wakunu noro nabi-nabi mamani leke hir loikaru Nin panaeku laa ik upud a'ad. 2 Enimaa lere eniyeni, na'akeki noho nin man horu, Makromod Lalap kukunohi Nin panaeku maika lolo Anan mehe. Lolo Anan, Makromod Lalap nakuku noho na'aleu a'am noro ne'en raram na'akeme, la Ai nala Anan nodi molollo na'akeme. 3 Lo'o ik do'on Anan eniyeni, onne naise ik do'onedi Makromod Lalap me'e haenhi, ono Nin morimori ma'aruru wake'e, la Nin ke'eke'el an'anha ma narehi nalewen eni namnenehe noro Makromod Lalap! Ai Lirna nodi molollo nadiyaka a'am lehern na'akeme leke yon man yaka. An mai noho wawan maki leke na'amou na'adewe ri mormori rir dohohale horu mene An laa a'am raram naikoro Makromod Lalap Ma Narehi Ma Nalewen herne malanna.

Yesus kulu narehi nano hophopon a'am raram

4 Ende Ai onne lernala onno man kulu narehi nano hophopon a'am raram, ono Makromod Lalap penia man hi'i Ai kulu narehi nano hophopon a'am raram na'akeme. 5 Ik kauroin onne ono Makromod Lalap na'aheni,

“Ya an'u O,

de lere eni Ya amwali O Ammu.”

Ai na'aheni wali'ur,

“Ya'u eni O Ammu,

la O mamwali Ya An'u.” [~1~]

Makromod Lalap ka na'aheni hophopon a'am raram ramwali Ai anan, maa Ai na'aheni Yesus mehe namwali Ai Anan.

6 Enla lere Makromod Lalap hopon Anan Anulu man An horhawe rehi mai noho wawan, Ai na'aheni wali'ur,

“Na'amoli Ainu'u hophopon a'am raram na'akeme

kadi ein korno ra'uli rasa'a Ya An'u eni.” [~2~]

7 An wekel hophopon a'am raram la na'aheni,

“Ya'u hi'i Ainu'u hophopon a'am raram ramwali anna lape man huhuu

noro aiye man lerlere leke hir ilitolle Ya'u.” [~3~]

8 Enimaa Makromod Lalap wakunu noro Anane, leke Ai na'ono Anan namwali Makromod Lalap haenhi. Lere onne Ai na'aheni Anan,

“Makromod Lalap, O maikoro onno man wa'an,

la mamkene mamani rakan laa ewi-ewi.

O mamwali Rai ma nodi molollo ma namlolo wake'e laa ewi-ewi.

9 O raram nodi hi'i ha ma namlolo mamani,

la kam suk wake'e ha man ailanne.

Eni penia Ya'u ma namwali Num Makrommu,

horhawe O narehi nano O wallumhe,

de Ya ala wuru dupuwala uluwakum wawan hi'i O akim nahuwa'an.” [~4~]

10 Makromod Lalap na'aheni wali'ur Anan,

“Makromod, lere dedesne O penia ma nakuku noho

ma naleu a'am noro ne'en raram haenhi.

11 Lere man mai noho wawan noro a'am raram moluloin,

maa O mamkene mamani rakan laa ewi-ewi.

Lere onne noho wawan noro a'am raram nalo'oledi me'e,

de naise nainair lo'olo'ol man yakedi me'e.

12 Lere onne Om lunne noho

noro a'am eni naise nainair lo'olo'ol man yakedi me'e

leke rodi nainair worworu herredi,

maa O penia Num morimori namkene mamani,

la Num anna kan horu laa ewi-ewi!” [~5~]

13 Makromod Lalap wakunu noro Anan mehe na'ahenia,

“Maikoro Ya'u herne malanna

hehen nanumene Ya'u hi'i Num arwali na'akeme lolo yawa ki O!” [~6~] Ai kan wakunu noro hophopon a'am raram heheni.

14 Hophopon a'am raram onne ramwali roh man ilitolle Makromod Lalap, la An hopon hi paku ri man lernala or'ori dardari ma kan horu.

Ibrani 2 ->