Link to home pageLanguagesLink to all Bible versions on this site
19
1 Jaa pecaho sca hen nincacah bi naihoh tsama joni tsinquitax behuahi quescapi, coshin behuahibo.
¡Aleluya! Noquen Papa Dios ta noque jihuemanicah qui.
Jahuen shinan ta hihti siri qui.
Jahuen coshin ta hahcoiniqui.
2 Casticanquin ta ponte hahquiqui.
Casticanquin ta sirijacoinihqui.
Jaa tsinipahhuan haibahhuan ta casticancoinaxqui, tsinixon jan mai mehabo tiromajani copi casticancoinquin.
Papan jonibo jaa haibaan rehteni ta copiquin sca jaa sca tiromajahaxqui
hihcani behuahi.

3 Jascari behuahax, hihribicani:

—¡Aleluya! Cohoti ta jascabi sca jahuen cohin xohtóhihnayaxihquiqui.

4 Jaatian sca jaa veinticuatro yonoxonnicahbo betan jahuen noyanica yoshinbo raboxonen nichish Papa Dios qui betihihpaquetax:

—Jascari rahan. ¡Aleluya! —hihcani.

5 Jaatian janoxon Papan jisi janinhax yohuanai hean nincaquin:

Noquen Papa Dios qui behuanahue,
Papan jonibon, jaa nincacoinaibon, hanibo betan hanitahmabo
hahqui behuanahue.
Carnero huanomahibo

6 Jascaraibo nincaxon, tsamatax behuahibo sca hean nincarihbiquin. Coshin bi res behuahibo, hani huaca mahchi janinhax tejabahticamahi coroti, coshin bi res terenhihqui quescari behuahibo:

¡Aleluya! Jatihibi hihbo hihxon ta noquen Papan hihboja sca jaiqui.
7 Jenimanon benahue,
coin coinnon benahue,
hahqui behuanon benahue.
Carnero ta huanoscanoxihquiqui.
Jahuen haibo ta jaya huanoti chopa sahuehax nihresscaiqui.
8 Pehneni joxo chopa siri hinanah ta jaayahpahax manatihqui
hihcani. Jaa pehneni joxo chopa ta Papan jihuetahbaan sirijaquin shinanxon joni huetsa yanapanpahonibo qui.

9 Jaatian:

—Huishahue —hea jaxon— Carnero huanohiya piti pihi benahue hihquiboya ta hahan hihti jenimati jaiqui —hea jaquin. Jaa hea huishamaxon:
—Jaa joibo ta Papan joi coin qui —hahquin hea.

10 Hea jascajaha cahen raboxonen nichish jaa yohuanai qui betíhihpaquecatsihqui bi:

—Jascayamahue. Mihbe Papan joni tah hen hea qui, miin huetsabaan hahbe joni rihbi tah hen hea qui, Jesusen joi yohihibaan huetsa. Papa huesti qui betihihpaquehue. Papan joi yohihibo jatihibi ta Jesusen joi yohinicabo qui —hea jaquin.
Cabacho joxoni cahtsahotax jahui joni

11 Jaatian nai quehpemehtaiya hen jisí bi cabacho joxoni. Cabacho joxoni cahtsahohtax jahui cahen Papa queenai quescabijanica hahcoinnicah. Ponte hahxon jonibo yononica, ponte hahxon tiromabo namanjanoxon jato betan rehtenannicah. 12 Jahuen bero cahen chihi quescapi. Jahuen mapo cahen quiquin hapon maitiyahpa. Jahuen maiti janin cahen jahuen jane jai, huishá. Tsoan honanaima jane, jaa huestichin honanah. 13 Jahuen chopa cahen jimi bi res, jimi qui maosahca. Jahuen jane cahen Papan Joi. 14 Hahchon sca Papan sontarobo cabacho joxonihbo cahtsahohtax becani. Joxo chopayahpabo rahsi, rishtajoma joxoni siri jaton chopa. 15 Jahuen jana janinhax cahen hahan rehtenanti machito quenoya picotan picotani, hahan nahuabo rerati. Coshin bi res ta jato hihbojaxihquiqui. Jato qui sinaxon jatihibi hihbo hihxon jato hihti casticannoxon noquen Papa Diosen raanah cahen jato rehtehi cahi. 16 Jahuen chopa qui huishá cahen jane jai, jahuen quishi qui jascarihbihi. Jaa jane cahen hapobaan quiquin hapo, hihbobaan quiquin hihbo.

17 Jaatian hen jisí bi bari namanbi huesti yonoti nihxon coshin quenaquin. Jatihibi hishminbo quenaquin:

—Pihi benahue, Papan mato hichaxon pitijaxonah pihi benahue. 18 Man pinon ta rehtexoniqui, quiquin hapobo, sontaro hapobo, coshi jonibo, cabachobo, jato cahtsahotaibo, patorojomabo jatihibi, patoroyahpabo jatihibi, hanitahmaboya hanibo, nami hichahi pihi benahue —jato jaquin.

19 Hen jisí bi jaa hen jismenoha hino, mai meha quiquin hapobo, jaton sontaroboya hichahi, jaabo jatihibi tsinquiti. Naihoh quehax jahuibo betan rehtenannoxon tsinquicani. Cabacho cahtsahotax jahui rehtenoxon tsinquicani. Jahuen sontarobo rihbi rehtecatsihquish tsinquicani. 20 Rehtenoxon tsinquitaiton bi jaan pari jaton hino yoshin bihquin. Hinon quesa joi yohixonnicah rihbi bihquin rabebi. Jaa quesa joi yohixonnicahton cahen jahuen coshin hahxon, rahtexon, hinon janeyahpabo paranpahonish, jahuen santo yocacaibo jaan paranpahoni. Mohitahpa jato rabebi bihxon, chihi hianencanya sca jato rabebi potaquin. 21 Texebo cahen jahuen jana janinhax picotan picotanaiton reraxon jato rehtepaquequin. Jato pihi sca jatihibi hishminbo yani yanicahini cahi.

<- JAYAXIHQUIBO 18JAYAXIHQUIBO 20 ->