Link to home pageLanguagesLink to all Bible versions on this site
6
Siete hahxonnicabo

1 Nincacoinaibo caícanahiya sca ta hebreobo qui helenistabo reren rerencanishqui. Nete tihibi piti hinanpaquehibaan jaton yononmabo hinanyamahiya reren rerenscacani. 2 Nincacoinaibo tsinquimaxon sca Criston raantibaan jato yohiquin:

—Non Papan joi yohiquin jenebahinxon piti metexxona ta tiroma qui. 3 Jaa copi man honanai siri jonibo caisnahue. Siete caisnahue, Dios Yoshiman hihbojahi rahsi. Shinan siriya rahsi caisquin, piti hinanpaqueti tee non jato hinannon. 4 Noque cah non yocaxonxon Papan joi yohinicabo sca jatihi —jato jacanquin.

5 —Jascahah ta siri qui —hihxon sca jatihixonbi caiscanquin. Huetsa cahen Esteban, shinanya siri, Dios Yoshiman hihbojahi joni. Huetsa cahen Felipe. Texe cahen Prócoro, Nicanor, Timon, Parmenas, Nicolas, jaton nahua hihpahonish bi judioni Antioquía janinhah. Jaa rahsi caiscanquin. 6 Criston raantibo bebon jato nichinxon mehexon jato yocaxoncanquin.

7 Hashoan sca cahen Papan joi caícanascai. Jerusalen janin nincacoinaibo rihbi hashoan caícanahi. Sacerdotebaan rihbi cahen hichaxon nincacoincanquin.

Esteban bichibo

8 Hicha Papan shinanyaxon sca Estebanen hihti hahan rahtetibojaquin. Jonibo rohajaquin. Hahan honantijaquin Papan coshiyahpaxon. 9 Jaatian sca judiobaan Esteban joi bichincanquin. Hinaboma sca hahcaibo, cirenobo, alejandrinobo, Cilicia janinhahbo, Asia janinhahbo. Jaabo rahsichin Esteban joi bichincanquin. 10 Dios Yoshiman yanapana hashoan honanax Esteban yohuanaiya sca hahbetan yohinanti hahtipahyamacanquin. 11 Yohinanti hahtipahyamascaxon jonexon coriqui hinanxon caibo sca yohuanmacanquin, quesahahbo hihxon.

—Moises qui tiromahi yohuanai tah non jaa nincaquipiqui. Noquen Papa qui tiromahi yohuanai rihbi tah non jaa nincaquipiqui —hihcani quesahi. 12 Esteban qui sinatax coro corotahbo cahen jonibo rihbi judiobaan coro coromaquin. Jaton hanibo rihbi, huishani honanbo rihbi sinamacanquin. Jaabaan sca Esteban panterenenxon bihxon jaton hapo tsinquitai janin bocanquin. 13 Quesamisbo sca yohuanmacanquin hahqui yohuanahbo.
—Jaa joni ta nea Papan xobo qui tiromahi yohuanihqui. Noquen Moisesnin huishani joi qui rihbi tiromahi yohuani. Tiromahi yohuani ta tantiyamahihqui. 14 Joxon ta nea xobo Jesus Nazarenon potojaquetanxon noquen hihti quescayamascai non jihuenon Moisesnin joi rihbi huetsajayaxihquiqui hah ta jaipishqui noquen nincanonbi —hihcani.

15 Jano tsinquitai hapobaan sca Esteban bejisquin sirijaxon jahuen bemanan naihoh queha Papan yonoti bemanan quesca sca jiscanquin jatihixonbi.

<- HAHNIBO 5HAHNIBO 7 ->