GÔLIŊWAGA 15

1 Têm ŋagêdô gêjaŋa ma lau sêjac polom sa sêmoa, tec Simson gêja gebe êtu ŋacleŋ nê awê ma eŋ kêkôc noniŋ ŋalatu teŋ gêwiŋ. Go eŋ kêsôm gêdêŋ awê tama gebe “Aê gabe jasô ŋoc awênê balêm jana.” Mago eŋ tama gêlôc gebe eŋ êsô êna atom. 2 Ênê tama kêsôm gêdêŋ Simson gebe “Aê gajam kauc gebe aôm têmtac gedec eŋ, tec kakêŋ eŋ gêdêŋ nêm ŋac. Mago lasio tec ŋajam kêlêlêc eŋ su, ônam eŋ êjômaŋ.” 3 Simson kêsôm gêdêŋ êsêac gebe “Galoc embe jaŋgôm lau Pilisti sec, oc aêŋoc keso atom.” 4 Tec gêja ma gêlô kêam saleŋŋa 300. Eŋ kêkôc luagêc-luagêc ma kêkic ŋalêŋuc tôŋ kêpi tageŋ ma kêsêmuŋ daweŋ kêsêp ŋasawa. 5 Go eŋ kêtuŋ daweŋ ma gesoc kêam saleŋŋa sêlêti sêsêp lau Pilisti nêŋ kôm polomŋa sêja. Tec eŋ kêkêŋ polom, taŋ sêjac sa naŋ, to polom, taŋ gacgeŋ kêkô kôm naŋ, ja geŋ su gêwiŋ katêkwi to kôm wainŋa amboac tonaŋgeŋ. 6 Go lau Pilisti têtu kênac gebe “Asa gêgôm gêŋ tonaŋ.” Êsêac sêjô êsêac aweŋ gebe “Ŋac aŋga Timna nê lawa Simson. Eŋ gêgôm gêŋ tau gebe lawa laŋgwa kêkêŋ latuo gêdêŋ ênê ŋac.” Tec lau Pilisti sêkêŋ ja geŋ awê tau agêc tama to nêŋ lau su. 7 Simson kêsôm gêdêŋ êsêac gebe “Aê jatôc lemoc gebe Amac embe aŋgôm gêŋ amboac tonaŋ, go jakac kamocgôc su acgom, go biŋ êmbacnê.” 8 Eŋ gêjac êsêac secanô e nêŋ ŋatêkwa popocgeŋ su, go kêsêp jagêŋgôŋ pocgêsuŋ aŋga Etam.

Simson kêku lau Pilisti tulu

9 Lau Pilisti sêô lasê gamêŋ Juda to sê nêŋ becobo aŋga tônê ma sêjac siŋ gêdêŋ malac Lehi. 10 Lau aŋga Juda têtu kênac êsêac gebe “Amac ajac siŋ gêdêŋ aêac kêtu asageŋŋa.” Êsêac sêjô êsêac aweŋ gebe “Aêac amêŋ gebe ansô Simson tôŋ ma aŋgôm gêŋ, taŋ eŋ gêgôm gêdêŋ aêac naŋ, êndêŋ eŋ.” 11 Go lau 3,000 aŋga Juda sêsêp pocgêsuŋ aŋga Etam jasêsôm gêdêŋ Simson gebe” Aôm kôjala lau Pilisti sêjam gôliŋ aêac nec, me masi. Aôm gôgôm aêac amboac ondoc.” Eŋ gêjô êsêac aweŋ gebe “Gêŋ taŋ sêgôm gêdêŋ aê naŋgeŋ, tec gagôm gêdêŋ êsêac.” 12 Êsêac sêsôm gêdêŋ eŋ gebe “Aêac amêŋ tonec gebe ansô aôm tôŋ ma akêŋ aôm ôsêp lau Pilisti lemeŋ.” Simson kêsôm gêdêŋ êsêac gebe “Atôc lemem êndêŋ aê acgom gebe amac taôm anac aê êndu atom.” 13 Êsêac sêsôm gêdêŋ eŋ gebe “Masi, aêac ansô aôm tôŋgeŋ ma akêŋ aôm ôsêp lau Pilisti lemeŋ. Aêac anac aôm êndu atom.” Amboac tonaŋ êsêac sêsô eŋ tôŋ ŋa lêpoa wakuc luagêc, go sêwê eŋ aŋga pocgêsuŋ sêpi sêja.

14 Gêdêŋ taŋ gêô lasê Lehi naŋ, lau Pilisti sêlêti dêdêŋ eŋ sêja tolasêgeŋ. Ma Apômtaunê Ŋalau gêjam Simson auc, ma lêpoa, taŋ sêsô eŋ tôŋ naŋ, gêŋgic amboac ja geŋ gam. 15 Ma eŋ kêtap doŋki ŋasê wakuc teŋ sa, tec kêmêtôc lêma jakêkôc gêŋ tau sa ma gêjac lau 1,000 êndu ŋa gêŋ tau. 16 Go Simson kêsôm gebe

“Aê gaboa êsêac sa totoŋ-totoŋ ŋa doŋki ŋasê.

Aê gajac lau 1,000 êndu ŋa doŋki ŋasê.”

17 Kêsôm biŋ tau su, go kêbaliŋ ŋasê tau siŋ, tec sêsam gamêŋ tau gebe Ramat-Lehi.

18 Ma bu gêjô Simson ŋasec, tec awa gêjac Apômtau ma kêsôm gebe “Aôm kôkêŋ nêm sakiŋwaga aê kaku ŋacjo tulu ma galoc bu êjô aê êndu e jasêp lau samuc lemeŋ me.” 19 Go Anôtô kêkêŋ gêsuŋ teŋ aŋga Lehi ma bu kêpulu kêpi aŋga nom mêŋSimson gênôm e têkwa saki kêsa kêtiam. Ma sêsam bumata tau gebe Hakore. Bumata tau kêpoac Lehi e mêŋgêdêŋ galoc.

20 Ma Simson gêjam gôliŋ lau Israel kêtôm jala 20 gedeŋ lau Pilisti nêŋ têm. [a]

<- GÔLIŊWAGA 14 GÔLIŊWAGA 16 ->