SAMUELNÊ 1 10

1 Go Samuel kêkôc ŋoplakôp toniptêkwi ma kêkêc kêpi Saul môkêapac ma kêlêsôp eŋ alianô ma kêsôm gebe “Apômtau geŋ oso aôm gebe ôtu ênê lau Israel nêŋ kiŋ. Aôm oc ônam gôliŋ Apômtaunê lau to ônam êsêac kêsi aŋga nêŋ ŋacjo, taŋ sêgî êsêac auc naŋ. Gêŋtalô tonec êwa sa êndêŋ aôm gebe Apômtau geŋ oso aôm gebe ôtu ênê gêŋlênsêm ŋakiŋ. 2 Galoc embe ôwi aê siŋ, oc ôndac ŋac luagêc aŋga Rahelnê sêô, taŋ gêc gamêŋ Benjamin ŋamalac Selsa naŋ. Êsêagêc oc sêsôm êndêŋ aôm gebe ‘Têtap doŋki têna, taŋ gosom naŋ, sa su. Ma galoc tamam taê gajam doŋki têna kêtiam atom, mago gê go tau kêtu aômŋa gêmoa ma kêsôm gebe “Aê jaŋgom asageŋ êtu ŋoc latucŋa.” ’ 3 Aŋga tonaŋ aôm gacgeŋ ôna e ô lasê kamem Taborŋa, go lau têlêac oc dêndac aôm. Êsêac oc sêpi malac Betel sêna gebe sêkêŋ da êndêŋ Anôtô. Teŋ êkôc noniŋ ŋalatu kapoac têlêac. Teŋ êkôc mopolom têlêac ma teŋ êkôc bôc ŋaôlic towain. 4 Êsêac oc sê moalêc aôm ma sêkêŋ mopolom luagêc êndêŋ aôm. Aôm oc ôkôc su aŋga êsêac lemeŋ. 5 Go aôm ô lasê malac Gibea Elohim, taŋ lau Pilisti nêŋ malac gêc naŋ. Aôm oc ôndac propete ŋatoŋ teŋ aŋga malac ŋasacgêdô. Êsêac aŋga gamêŋ ŋabau sêsêp sêmêŋ. Gêŋ wêŋa togam to gegob ma oŋ to gasuc ŋakicsêa êwê êsêac ma nêŋ katuŋ kaiŋ teŋ amboac propete nêŋ gêgôm êsêac. 6 Ma Apômtaunê Ŋalau oc ênam aôm auc êlêlêc su ma nêm katôm kaiŋ teŋ êsa êtôm propete tauŋ nêŋ, go aôm ôtu ŋac wakuc teŋ samucgeŋ. 7 Êndêŋ taŋ gêŋtalô tonaŋ samob êtap aôm sa su naŋ, ôŋgôm êtôm nêm ŋalêlôm êkac aôm gebe Apômtau tau oc êwiŋ aôm. 8 Ôsêp malac Gilgal ôna ômuŋ aê, go aê jandêŋ aôm jawac gebe jakêŋ daja to dawama. Ônsaê aê bêc 7 acgom, go jandêŋ aôm jawac ma jasôm gêŋ, taŋ ôŋgômŋa naŋ, êndêŋ aôm.”

9 Gêdêŋ taŋ Saul kêkac tau ôkwi gebe êwi Samuel siŋ naŋ, go Anôtô kêkêŋ ŋalêlôm wakuc gêdêŋ eŋ ma gêŋtalô samob tonaŋ ŋanô kêsa gêdêŋ bêc tageŋ tonaŋ. 10 Ma gêdêŋ taŋ êsêagêc sêô lasê malac Gilgal naŋ, propete nêŋ toŋ teŋ kêpuc eŋ tôŋ-tôŋ. Ma Anôtônê ŋalau gêjam eŋ auc kêlêlêc su e katu kaiŋ teŋ kêsa ma jakêsêp êsêac ŋalêlôm. 11 Lau samob, taŋ sêjala eŋ gamuŋ ma sêlic ênê katu kaiŋ teŋ kêsa amboac propete nêŋ naŋ, sêsôm gêdêŋ tauŋ gebe” Asageŋ gêgôm Kis latu Saul. Eŋ kêtu propete nêŋ teŋ amboac tonaŋ me.” 12 Ma ŋac teŋ aŋga gamêŋ tonaŋ kêsôm gebe “Êsêacnêŋ tameŋi asa.” Tec sêsôm tonec gebe “Saul kêtu propetenêŋ teŋ amboac tonaŋ me.” 13 Gêdêŋ taŋ katu kaiŋ teŋ kêsa su naŋ, eŋ gêja nê malac Gibea.

14 Go Saul sa laŋgwa kêsôm gêdêŋ eŋ to nê sakiŋwaga gebe “Amagêc aja ondoc.” Tec eŋ gêjô eŋ awa gebe “Aêagêc asom doŋki têna ma gêdêŋ taŋ atap sa atom naŋ, adêŋ Samuel aja.” 15 Sa laŋgwa kêsôm gebe “Ôsôm acgom, Samuel kêsôm asageŋ.” 16 Saul gêjô eo awa gebe “Eŋ kêsôm gêdêŋ aêagêc gebe têtap doŋki têna sa su.” Mago biŋ kiŋŋa, taŋ Samuel kêsôm naŋ, eŋ gêjac miŋ gêwiŋ atom.

Lau tetoc nêŋ kiŋ Saul sa

17 Gêdêŋ ŋasawa tonaŋ Samuel kêkalem lau Israel sêpi tageŋ dêdêŋ Apômtau aŋga malac Mispa. 18 Ma kêsôm gêdêŋ lau Israel gebe “Apômtau, Israel nêŋ Anôtô nê biŋ amboac tonec gebe ‘Aê gawê Israel sêpi aŋga Aiguptu sêmêŋ. Aê gajam amac kêsi aŋga lau Aiguptuŋa ma aŋga gamêŋ kiŋŋa samob, taŋ sêkôniŋ amac naŋ.’ 19 Mago amac atiŋ nêm Anôtô, taŋ gêjam amac sa aŋga nêm gêŋwapac to gêŋ lênsôŋŋa samob naŋ, su gêdêŋ ocsalô tonec ma asôm gebe ‘Masi, ôkêŋ kiŋ teŋ ênam gôliŋ aêac.’ Amboac tonaŋ andênaŋ taôm akô Apômtau laŋônêmŋa êtôm nêm gôlôacmôkê to nêm sackapoacgêdôgêŋ.” 20 Samuel kêkêŋ Israelnêŋ gôlôacmôkê samob sêsa sêmêŋ ma kêpuc kapoac e jakêsêp Benjaminŋa. 21 Go kêkêŋ gôlôacmôkê Benjamin nêŋ sackapoacgêdô gêdêŋ-gêdêŋgeŋ sêsa sêmêŋ. Eŋ kêpuc kapoac e jakêsêp sackapoacgêdô Matri. Go kêkêŋ sackapoacgêdô Matri nêŋ ŋac tageŋ-tageŋ sêsa sêmêŋ ma kêpuc kapoac e jakêsêp Kis latu Saul. Mago gêdêŋ taŋ sesom eŋ naŋ, eŋ gêmoa atom. 22 Tec têtu kênac Apômtau kêtiam gebe “Ŋac tau gêmêŋ tonec me masi.” Ma Apômtau gêjô êsêac aweŋ gebe “Aec, eŋ kêsiŋ tau gêmoa waba ŋalêlôm.” 23 Amboac tonaŋ sêlêti sêja ma sêkôc eŋ aŋga tonaŋ. Ma gêdêŋ taŋ eŋ kêkô lau ŋalêlôm naŋ, eŋ ŋac waso-waso kêlêlêc êsêac samob su. 24 Go Samuel kêsôm gêdêŋ lau samob gebe “Alic ŋac tau, taŋ Apômtau kêjaliŋ sa naŋ me masi. Ŋac teŋ kêtôm eŋ gêmoa lau samob ŋalêlôm atom.” Go lau samob sêjam lasê ma sêmôêc gebe “Kiŋ tau êmoa ŋajamôŋ.”

25 Ma Samuel gêwa mêtê to ŋagôliŋ kiŋŋa sa gêdêŋ lau ma keto biŋ samob kêsêp buku teŋ ma ketoc gêc Apômtau laŋônêmŋa. Tonaŋ su, go Samuel kêsakiŋ lau samob sêmu sêja nêŋ andu gêdêŋ-gêdêŋgeŋ. 26 Saul tau gêmu gêja malac Gibea amboac tonaŋgeŋ ma siŋwaga, taŋ Anôtô kêkac nêŋ ŋalêlôm naŋ, jasêwiŋ eŋ. 27 Mago lau sec ŋagêdô sêmoa naŋ sêsôm gebe “Ŋac tonaŋ oc ênam aêac sa amboac ondoc.” Êsêac sêpêc gêdô eŋ ma sêkêŋ gêŋ teŋ gêdêŋ eŋ atom. Tageŋ Saul gêgôm amboac gêlic atom.

<- SAMUELNÊ 1 9 SAMUELNÊ 1 11 ->