Apocalipsis 4

Ema Juan máimaha eta natsiuresira te anuma

1 Te táequenepa eta juca, nímahavarepa eta téjiacahi eta anuma. Nusamavarepa eta mahu ema émarichuhi ema tínapucahi téchajicanuhi. Tirurehucha eta mahu. Tíchuhanupa, ánipa macahe:

—Yare, piápana. Nuvaraha nímechaviyare eta táicharacavayare puiti juca vicaijuheyare —macahepa.

2 Tacahe, eta nusamirahi eta íchuarapi, ema Espíritu Santo tíjaracanupa eta nucaicutiarairayare tamutu eta nímahaqueneanayarehi. Tíjahúchavapa nímaha ema Viya, téjacahi te trono te anuma. 3 Tiáramicarehi eta máimahi. Tétavicavahi eta máurinavahi. Eta máimahi tacuti eta tajanunusira eta márijahi jaspe étapa eta cornalína. Te tachachacuana távihahi eta trono, tétavicava eta tajaraivahi tacutiyaréni eta táimahi eta ahe eta táurinava. Véresera eta táimahi. 4 Távihahi eta ichape trono, tatiarihivare te tachachacu eta véinticuatro trono. Natiarihivare ena véinticuatroanavare téjacanahi tayehe, víyarahana tuparairucana. Tijapu amairiha eta namuirihana. Namutu ticayeheana corona te nachutiana, amairiha oro. 5 Tásiha, nímahahi eta térameca tásihaquenehi tayehe eta trono. Nusamavare tirurehuchanahi. Ticaemapa. Tásiha, tatiarihihi te tamirahu eta trono eta siete tijarahivaca tacutiyaréni tanene eta yucu. Énahi ena siétequeneana arcángeleana mayeheana ema Viya. 6 Tijararacavare te tamirahu eta trono tacutipa eta tajarahivahi eta ichapequene une.

Natiarihivare ena cuátroqueneana tijanearecanahi te machacaya ema Viya. Éna, ecutiarareana eta máitupajijiasirava. Tacutimahi ticauquihavacahi te namirahu téhepa nachepa. Amairiha eta náuquihana. 7 Eta tínapuca tavasimahiyaréni eta sárare táiñehiquene[a]. Eta apana tavasimahiyaréni eta torillo. Eta apana tacutimahiyaréni achanemira. Eta apana tacutimahiyaréni eta ichape mátihi tiárarairicahi. 8-9 Tacahe, ena nani cuátroqueneana ecutiarareana tiávihanahi tayehe eta trono, sáisivaca eta napavana. Ticauquihavacavare amairiha eta napavana. Ena nani, vahi táechuquihahini eta nacunachirahi ema Viya, ema acanevacaquene eta máitaresirahi. Tijiranahi tamutu sácheana, yátiana. Ánipa nacahe:

“Tétavicavahi eta pisantuva, piti Tata.

Tétavicavahivare eta pítupajijiasiravahi,

píturuequeneha tamutu.

Piti pitiarihiquenehi te tépanavainapa eta apaquehe.

Puiti pinasirichuvare eta viyehe.

Pítirichuvare pinasiyare te táitavapa tamutu.

Puiti vihasulupayachavihi eta pichanerahavihi”

nacahepa ena ángeleana.

10 Énavarepa ena véinticuatroqueneana víyarahana tuparairucana tépuyucanahi te mamirahu ema Viya, mávihahi te mayehe trono. Nacamavahupa eta nayeheana corona. Titsiurecanavare. Ánipa nacahe:

11 “¡Tata Víyaquene, piti Viáquenuvihi!

¡Tétavicavahi eta piúrivahi!

Picarichuhi piti vicasiñaquenévi.

Ichapequenehi eta vicunachiravihi.

Tamutuhi pirataha píti.

Taicha píti pépiyacahi acane tamutu eta juca

vímahaqueneanahi puiti.

Pítirichuvare péchahi puiti tamutu eta

pépiyaruanahi”.

<- Apocalipsis 3 Apocalipsis 5 ->