APOKALIPSIS 10

An tʼokat abatwále xin teykóm an chakam dhutsadh úw

1 U chuꞌu tám ti paꞌíl walkʼiꞌ ba jun i tokow jun i likat tʼokat abatwále ani éb in ókʼ, in koꞌol jun i pichʼal. Nin wal chʼaxixíl jelt a kʼítsá ani nin akantsik in junwal jelti kʼamal. 2 In teykóm jun i chakam dhutsadh úw weladh, in kubaꞌ nin eját akan ban pujal ani nin kʼwatab akan ban chabál. 3 Dhájan tám kawidh jelt xan tu dhajnal jun i padhum ani tam ti dhájan, píkʼan búkíl an junkil. 4 Tam ti píkʼnékich búkíl an junkil, neꞌchich ku dhutsaꞌ xowaꞌ u achʼaꞌ in ulu, por u achʼaꞌ jun i káwintaláb xi tál walkʼiꞌ xi tin utsaꞌ enchéꞌ:

―Ka taꞌpaꞌ chinat xowaꞌ in ulu xi búk an píkʼnaltaláb ani yab ka dhutsaꞌ.

5 An tʼokat abatwále xu chuꞌu kubat ban pujal ani ban chabál, in dhayaꞌ tám tʼekʼat nin eját kʼubak 6 ani in lej tsubax ulu tin bij xi kʼwajat ejat malilíl i kʼij, xin tʼajám an walkʼiꞌ, an chabál, an pujal ani ejtal xowaꞌ waꞌach tajaꞌ, in ulu enchéꞌ:

―Yabich más neꞌech ka owey; 7 pos tam kin bajaw xowkʼi nin búkláb an tʼokat abatwále kin tuju kin jutsuy an korneta, neꞌech tám ka tʼájanich xowaꞌ yab tejwaꞌ xin koꞌol chalpadh na Dios, jelt xan ti Jajáꞌ tin utsámal nin tʼiltsíxiltsik xi kʼál tu tʼójontsáb.

8 An káwintaláb xi tál walkʼiꞌ xi nanáꞌ u achʼámal, tin tawnaꞌ juní ani tin utsaꞌ enchéꞌ:

―Ki kʼale ani ka téynaꞌ an chakam dhutsadh úw xi weladh, xin teykóm an tʼokat abatwále xi kʼwajat kubat ban chabál ani ban pujal.

9 In kʼale tám ban tʼokat abatwále ani u kontsi an ti chakam dhutsadh úw. Jajáꞌ tin utsaꞌ enchéꞌ:

―Jéꞌ kʼwajat ani ka kʼapu. Ba na wiꞌ chiꞌik neꞌech ka achʼaꞌ jelti an chiꞌik, por alkʼidh ba na tsukul neꞌech ka tsʼaꞌikmé.

10 U bachʼkʼuntsi tám an tʼokat abatwále an ti chakam dhutsadh úw ani u kʼapu. Ba nu wiꞌ, u achʼaꞌ chiꞌik jelti an chiꞌik, por tam tu kʼapúmalich, tsʼaꞌikmé alkʼidh ba nu tsukul. 11 Tin utsaꞌ tám enchéꞌ:

―Yejat ki kʼale juní ka tʼiltsi xowaꞌ in ulal na Dios, yán i bitsowtsik ani i atiklábtsik. Ejtalkʼi xan tu káw an atiklábtsik ani ka tʼiltsi jeye an pakdhaꞌ takʼix.

<- APOKALIPSIS 9 APOKALIPSIS 11 ->