2 TIMOTEO 3

Xan ti neꞌech ka kʼwajay an atiklábtsik tam in okʼontalich an kʼij

1 Yejat jeye ka choꞌóbnaꞌ ke tam in okʼontalich jechéꞌ an kʼij, neꞌech ka waꞌchin i kʼijtsik xi yajtsik. 2 An atiklábtsik tokot neꞌech kin kʼanidhaꞌ jajáꞌkʼitsik tinbáꞌ, neꞌech ti chʼeꞌnetsik, neꞌech kin tʼekʼaꞌtsik tinbáꞌ kʼal tin kwenta xantʼéy in éy ani neꞌech kin pojkaꞌ xi kʼeꞌettsik. Neꞌech jeye kin odhbijiytsik na Dios ani an iniktsik, yab neꞌech kin tʼajaꞌ ti kʼij nin tátaꞌtsik, yabtsik neꞌech kin pidhnál i jalbintsixtaláb ani yabtsik neꞌech kin leꞌnaꞌ kin tʼajaꞌ xowaꞌ in léꞌ na Dios. 3 Yab neꞌech kin kʼanidhaꞌ nin at kidhábtsik, yab neꞌech ti pakwlantsix nibal neꞌech kin walkaꞌ ka pakwlantsat, neꞌechtsik ti jánum káw, yab neꞌech kin ejto kin kuxuytsik xowaꞌ in leꞌnál, neꞌech ka atʼaxmétsik tʼajat ani neꞌech kin pojkaꞌtsik ejtal xowaꞌ alwaꞌ. 4 Neꞌech jeye kin chinat ólnaꞌ xowaꞌ in utsámal jun xitaꞌ ke yab neꞌech kin ólnaꞌ, yabtsik neꞌech kin chalpay okʼox xowaꞌ in tʼajál, neꞌech kin tʼekʼaꞌtsik tʼajat tinbáꞌ, tokot neꞌech kin aliytsik xowaꞌkʼi jajáꞌtsik in kulbetnál ani yabtsik neꞌech kin aliy a Dios. 5 Neꞌech kin wáynaꞌtsik ke in tʼajál xowaꞌ in léꞌ na Dios, por neꞌech kin pojkantsi tin awiltal.

Yab ki junkun níwéꞌ kʼal jachanꞌ an atiklábtsik. 6 Taltsik xi jechéꞌ in kidhtaltsik, u ochel ban atátsik ani in kʼambiyal an uxumtsik xi walbidhtsik tʼajat ani xin leꞌnál tʼajat xowaꞌkich xi yab alwaꞌ. 7 Jechéꞌ an uxumtsik echʼekʼi in léꞌ kin witʼaꞌtsik xowaꞌ u okʼtsixnáb, por yabtsik in ejtowal kin exbay an tsubaxtaláb. 8 Ani anchanꞌ, jelti an dhimantsik xu bijyáb ta Janes ani ta Jambres in tomnaꞌtsik na Moisés, anchanꞌ jeye jechéꞌ an iniktsik tin pojkáltsik an tsubaxtaláb. Jechéꞌ an iniktsik yab alwaꞌ in chalab in koꞌol ani xalkʼátsik kʼal na Dios abal yab tsubax tu belomtsik. 9 Por yab neꞌech kin ejto kin tʼajaꞌ xataꞌ lej yán, kom neꞌech ka chuꞌtattsik kʼal an atiklábtsik xu kʼwajíl ban kʼayꞌlá ke yabtsik chalpadh, anchanꞌ jelt xan tin tamu xi cháb an dhimantsik xi tomná kʼál na Moisés.

Na Pablo in utsaꞌ jun i punkʼuntsixtaláb tayílich na Timoteo

10 Por tatáꞌ Timoteo a wéwnámal alwaꞌ nu okʼtsixtal, xan ta chuꞌtal in kʼwajíl, xowaꞌ nu léꞌ ka tʼajan, xan tin belom, xan tu koꞌol an chaꞌattaláb, xan tin kʼanidhax ani xan tu kuxyal xowaꞌkich. 11 Ani a choꞌób jeye xan tin kajnadh ani xan tu achʼámal i yajtsiktaláb, jelti an yajtsiktaláb xu tamu ban bitsowtsik xi Antiokía, xi Ikonio ani xi Listra, por an Ajátikláb tin tolmiy ku kuxuy ejtal jechéꞌ. 12 Aníl jeye, ejtaltsik xin léꞌ ka kʼwajách jelt xan tin léꞌ na Kristo Jesús, neꞌech jeye ka atʼantsik; 13 por xi atʼaxtsik ani u kʼambixtsik más jaꞌ kʼibenek xowaꞌ neꞌech in tamwal, neꞌech ti kʼambixtsik ani neꞌech jeye ka kʼambiyattsik.

14 Por tatáꞌ, ka óntsi ki kʼwajay jelt xan ta ejtómalich, kom a choꞌóbich ke jaꞌich na tsubax ani a choꞌób alwaꞌ xitaꞌ ti okʼtsámal. 15 A exlál jeye an Tʼokat Dhuslab asta ta chipíl, xi neꞌech kin ejto ti ki chalpadhmédhaꞌ abal ka bajaw an loꞌeltaláb ke jaꞌich kʼal tin kwentakʼi na belomtal xa koꞌol ba na Kristo Jesús. 16 Ejtal xowaꞌ kʼwajat dhutsadh ban Tʼokat Dhuslab, a Dios in chalab ani alwaꞌ abal ka okʼtsixná, abal ka tawnaxná, abal ka kʼwiyaxná ani abal ka takʼixná ani anchanꞌ, ka júnájich jun i xeꞌchintaláb lujat, 17 pos xitaꞌkʼi xin belálich na Dios, kin choꞌóbnaꞌ kidhat abal kin witʼaꞌ kin tʼajaꞌ ejtal xowaꞌ alwaꞌ.

<- 2 TIMOTEO 2 2 TIMOTEO 4 ->