12 “Lauegu hereva momo idia noho, lau ura hereva henia umui dekenai, to harihari umui be inai hereva do umui abia dae diba lasi. 13 To Hereva Momokani Laumana do ia mai, vadaeni ia ese hereva momokani ibounai dekenai umui do ia hakaua, badina be ia sibona ena laloa do ia gwauraia lasi, to do ia kamonai herevadia ibounai do ia gwauraia, gabeai do idia vara gaudia danu umui dekenai do ia hamaoroa guna. 14 Ia ese lau do ia hanamoa, badina be lau dekena amo do ia abia herevadia umui dekenai do ia hamaoroa. 15 Egu Tamana ena gau ibounai be lauegu, unai dainai lau gwau, ‘Ia ese lau dekena amo do ia abia herevadia be umui dekenai do ia hamaoroa.’
16 “Nega sisina sibona lau do umui itaia lasi, ma nega sisina sibona, lau ma do umui itaia.”
17 Iena diba tahua taudia haida idia sibona ta ta dekenai idia nanadaia, idia gwau, “Inai be dahaka Iesu ese ia hamaoroa ita dekenai, ia gwau, ‘Nega sisina lau do umui itaia lasi, ma nega sisina lau do umui itaia,’ bona, ‘Badina be egu Tamana dekenai do lau lao?’ ” 18 Idia sibona dekenai ma idia nanadaia lou, nanadaia lou, idia gwau, “Inai ‘nega sisina’ ia gwauraia ena anina be dahaka? Inai hereva dekenai be iseda lalona ia kehoa lasi.”
19 Iesu ia diba idia be idia ura ia dekenai idia nanadaia, vadaeni ia gwau, “Lauegu hereva ena anina umui sibona dekenai umui nanadaia, lau gwau, ‘Nega sisina lau do umui itaia lasi, ma nega sisina lau do umui itaia,’ a? 20 Momokani, momokani umui lau hamaoroa, umui be do umui tai mai hisihisi danu, to tanobada taudia be do idia moale. Umui be do umui lalohisihisi, to emui lalohisihisi be moale dekenai do ia lao. 21 Hahine ta be iena natuna ia havaraia noho neganai hisihisi bada ia abia, badina be iena nega ia ginidae vadaeni, to iena natuna ia abia, vadaeni iena hisihisi be ia laloa lasi, ia moale bada, taunimanima matamata ta tanobada dekenai ia vara dainai. 22 Umui danu, inai harihari be emui lalona idia hisihisi noho, to lau be umui do lau itaia lou, vadaeni emui lalona be do idia moale, bona tau ta ese umui emui moale do ia kokia diba lasi.
23 “Unai dina neganai gau ta do umui noia lasi lau dekenai. Momokani, momokani umui lau hamaoroa, bema gau ta do umui noinoi egu Tamana dekenai, ia ese do ia henia, bema egu ladana umui gwauraia neganai. 24 Ia mai bona harihari, gau ta egu ladana dekenai umui do noia lasi. To hari do umui noinoi, bona do umui abia, vadaeni emui moale do ia momokani.
25 “Parabole dekena amo lau hereva vadaeni umui dekenai, to nega ta ia mai noho, parabole dekenai do lau hereva lou lasi umui dekenai, to hereva maoro hedinaraia dekena amo, Tamana ena sivarai umui dekenai do lau hamaoroa. 26 Unai dina ia ginidae neganai, lauegu ladana dekenai do umui noinoi. Lau hereva lasi lau ese Tamana do lau noia, umui do ia durua totona. Lasi. 27 Badina Tamana sibona ese umui ia ura henia, umui ese lau umui ura henia dainai, bona umui ese umui hamomokania vadaeni, lau be Tamana dekena amo lau mai dainai. 28 Lau be Tamana lau rakatania, inai tanobada dekenai lau mai, ma tanobada do lau rakatania, Tamana dekenai do lau giroa lao.”
29 Iena diba tahua taudia idia gwau, “Namo, harihari oi hereva hedinaraia, parabole oi gwauraia lasi inai. 30 Harihari aiemai lalona idia kehoa vadaeni, oi be gau ibounai oi diba, anina lasi danu tau ta ese do ia hamaoroa oi dekenai. Unai dekena amo, ai abia dae vadaeni, oi be Dirava dekena amo oi mai.”
31 Iesu ia gwau, “Harihari umui abidadama henia lau dekenai, a? 32 Umui kamonai, negana do ia mai, oibe, ia ginidae vadaeni, umui ibounai do umui heau idau gabu idau gabu, lau do umui rakatania, umui ta ta emu gabu dekenai do umui lao. Vadaeni lau be sibona do lau noho. To lau sibona do lau noho lasi, badina Tamana be lau dekenai ia noho. 33 Inai hereva lau hamaoroa vadaeni umui dekenai, egu lalona dekenai maino do umui abia totona. Tanobada dekenai umui be hisihisi do umui abia. To, do umui goada noho, badina be lau ese tanobada lau halusia vadaeni.”
<- IOANE 15IOANE 17 ->