Link to home pageLanguagesLink to all Bible versions on this site
4
Dubu Helaga ena kohu namodia

1 King Solomona ese ia oda, vadaeni boubou patana, auri laboralabora gauna idia karaia. Boubou patana ena lata be 9 mita, ena lababa danu be 9 mita, bona ena ataiai lata be 4 mita 50 sentamita. 2 Ma tanika kuboruna, auri laboralabora dekena amo idia karaia. Ena dobu be 2 mita 20 sentamita, ena lababa be 4 mita 40 sentamita, bona ena kuboru be 13 mita 20 sentamita. 3 Tanika ena kuboru isena dekenai be herahera laini rua idia koroa, laini ta isena kahirakahira, ma laini ta be henunai. Herahera edia toana be boromakau tau edia laulau. Tanika idia karaia neganai, herahera be tanika danu nega tamona idia karaia. 4 Inai tanika be boromakau tau 12 edia laulau, auri laboralabora gaudia edia dorudia latanai ia helai. Boromakau toi ese mirigini kahanai edia vairadia idia henia, ma toi be dina ia diho kahanai, bona ma toi diho kahanai, ma toi ese dina daekau kahana dekenai edia vairadia idia henia. 5 Tanika ena kopina ena bada be tau ena ima palapala ena lababa hegeregerena. Tanika ena isena be kapusi ena isena bamona, lili heraherana ena toana bamona. Tanika ena anina be ranu 60,000 lita bamona.

6 Huria totona ranu tanika maragidia ibounai 10 danu idia karaia, idia 5 be Dubu Helaga ena diho kahanai idia atoa, ma idia 5 be mirigini kahanai idia atoa. Inai tanika maragidia lalonai be do idia gabua boubou gaudia idia huria, to unai tanika badana be hahelagaia taudia edia huria gabuna.

7 Idia ese danu lamepa dogoatao gaudia ibounai 10, golo gaudia, Dirava ese guna ia gwauraia dala dekenai idia karaia, bona Dubu Helaga lalonai idia atoa, 5 be diho kahanai, bona 5 be mirigini kahanai. 8 Bona pata ibounai 10 danu idia karaia, Dubu Helaga lalonai idia atoa, 5 be diho kahanai, bona 5 be mirigini kahanai. Idia ese danu uro ibounai 100 golo dekena amo idia karaia.

9 Hahelagaia taudia edia ariara gabu mai maguna, bona murimurinai noho ariara gabu mai maguna danu idia karaia. Inai magu edia iduaradia edia audia be auri laboralabora dekena amo idia koua. 10 Tanika badana be Dubu Helaga ena laurabada kahana kona dekenai idia haginia.

11 Hurama ese danu uro bona sipeidi bona disi ia karaia. Vadaeni king Solomona ese ia henia gaukara be Hurama ese ia haorea, Dirava ena Dubu Helaga lalonai, gaudia be inai:

12 du ruaosi.
du edia ataiai kwaradia, edia toana be uro bamona.
unai du edia kwaradia edia latanai idia koroa reke bamona herahera.
13 auri laboralabora apolo ibounai 400 (laini rua ese du kwarana ta ta idia hagegea).
14 treila ibounai 10
tanika maragidia ibounai 10.
15 tanika badana
boromakau laulaudia ibounai 12, tanika badana be idia edia dorudia latanai ia helai.
16 uro, sipeidi, foka bona vamu taua dae edia kimai.
Inai diba momo gaukara tauna Hurama Abi ese inai gaudia ibounai be auri laboralabora, diaridiari gauna dekena amo ia karaia. Idia be Solomona ese ia oda hegeregerena, bona Lohiabada ena Dubu Helaga lalonai do idia gaukaralaia gaudia.

17 King ese ia oda dainai, unai gaudia be raro tano gabunai idia karaia Ioridane Koura lalonai, Sukoto hanua bona Sereda hanua edia huanai. 18 Inai gau ibounai, Solomona ese ia karaia gaudia be momo herea. Unai dainai edia auri laboralabora ena metau be tau ta ese ia duahia diba lasi.

19 King Solomona ese danu Dubu Helaga ena helaga gaudia ma haida ia karaia, gaudia be inai:

Pata helagana, golo gauna.
Paraoa helagana edia patana.
20 Lamepa dogoatao gaudia, golo gaudia, mai edia golo lamepa danu. Inai be Helaga Herea Gabuna ena vairanai do idia gabua gaudia, Dirava ena taravatu hegeregerena.
21 Herahera, bona lamepa, bona gida dogoatao gaudia. Idia be golo goevagoeva gaudia.
22 Lamepa hagoevaia gaudia, bona disi, bonana namo muramura totona gaudia, bona auri palakadia, gida huaia lao totona gaudia. Inai gaudia ibounai be golo goevagoeva sibona dekena amo idia karaia. Dubu Helaga ena daiutu badana ena iduara, bona Helaga Herea Gabuna ena iduara ruaosi danu be golo dekena amo idia karaia.

<- 2 SIVARAI 32 SIVARAI 5 ->