APOCALIPSIS 7

Israel suindar iporavoprɨ yuvɨrecoi vahe

1 Ipare asepia irungatu tuprɨ Tũpa rembiguai ɨva pendar yuvɨnohai vahe irohɨ cotɨ, norte cotɨ, arɨ sẽsa cotɨ, caharu cotɨ avei no omombɨtuhu tuprɨ vahe irungatu ɨvɨtu yuvɨrecoi vahe ɨvɨ harɨ rupi ipeyuẽhɨ ãgua, que para guasu pɨpe angara viña, que ñepei yepe ɨvɨra ro angara viña no. 2 Ipare asepia avei ambuae Tũpa rembiguai ɨva pendar ou vahe arɨ sẽsa cotɨ sui, ahe vɨreco oyese Tũpa oicove vahe rer mondosa. Ahe niha osapucai pĩratá evocoi irungatu tuprɨ Tũpa rembiguai ɨva pendar yuvɨrecoi vahe upe, oipɨsɨ vahe pĩratasa ɨvɨ, para guasu momara ãgua yuvɨreco, aipo ehi: 3 “¡Ndapemomara vɨtei chira rumo ɨvɨ, para guasu avei, ɨvɨra avei no, co ndoromondo vɨteiseve ava Tũpa rembiguai eta upe isɨva rese Tũpa rer icuachiaprɨ!” ehi.

4 Ipare asendu Tũpa rer oipɨsɨ vahe retacuer: ciento cuarenta y cuatro mil tuprɨ, evocoi opacatu doce judío ramoi suindar pãhu sui iporavoprɨ yuvɨreco. 5 Doce mil tuprɨ yuvɨrecoi iporavoprɨ Judá suindar, doce mil tuprɨ Rubén suindar, doce mil tuprɨ Gad suindar, 6 doce mil tuprɨ Aser suindar, doce mil tuprɨ Neftalí suindar, doce mil tuprɨ Manasés suindar, 7 doce mil tuprɨ Simeón suindar, doce mil tuprɨ Leví suindar, doce mil tuprɨ Isacar suindar, 8 doce mil tuprɨ Zabulón suindar, doce mil tuprɨ José suindar, ipa evocoiyase doce mil tuprɨ Benjamín suindar.

Ava rehɨi iturucuar morochi vahe

9 Ipare asepia setá iteanga ava, opacatu ɨvɨ rupindar, ambuae-ae tẽi vahe, ambuae-ae tẽi vahe iñehe yuvɨreco iyavei secua ambuae vahe avei no. Ahe opũhapa vahe Tũpa rovai Ovesami rovai avei yuvɨreco no, ahe ndayaicatui eté ipapapa ãgua. Esepia, setá eteprɨ yuvɨreco iyavei iturucuar morochí vahe pãve; pindo-pindomi vɨreco opove yuvɨreco no. 10 Ipare opacatú guasu oñehe pĩrata yuvɨreco aipo ehi:

“¡Poropɨ̃sɨrosa yande Ru Tũpa suindar, ahe oguapɨ vahe oĩ güendave, iyavei Ovesami suindar avei no!” ehi.

11 Iyavei opacatu Tũpa rembiguai ɨva pendar yuvɨrecoi vahe oyere tuprɨ Tũpa renda rese, icuaiprɨ rese avei yuvɨnoha iyavei irungatu yuvɨrecove vahe rese avei no; ahese oyeaɨvɨ omboya ité osɨva ɨvɨ rese senda rovai Tũpa mboeteisave yuvɨreco, 12 aipo ehi:

“¡Ẽgüe tehi!

Sapucaisa, poromboeteisa, mbahecuasa, ‘¡Avɨye ndeu’ hesa, poromboyeroyasa, mborerecuasa,

teco pĩratasa avei tasecoi yande Ru Tũpa upe!

¡Ẽgüe tehi apɨrẽhɨ vaherã ité yepi!” ehi.

13 Ahese icuaiprɨ ipãhu pendar aipo ehi cheu cute: “¿Ereicua vo co ava rehɨi iturucuar morochi vahe pãve yuvɨrecoi, ereicua que sui pĩha yugüeru?” ehi. 14 Che evocoiyase, “Nde rumo ereicua” ahe chupe. Ipare ahe aipo ehi cheu: “Co acoi yuvɨnose tuprɨ vahe ité teco asɨsa sui yuvɨreco, inungar oyosei, omomorochi vahe oturucuar, ẽgüe ehi avei güecocuer imomorochi Ovesami ruvɨ pɨpe yuvɨreco.

15 “Sese Tũpa renda rovai yuvɨrecoi, chupe mbahe apo ãgua arɨ, pɨ̃tu rupi avei sẽta pɨpe.

Güendave oguapɨ vahe oĩ, güecocuer pɨpe osepɨra.

16 Evocoi ndiyumbɨasɨ iri chira yuvɨreco,

ndihusei iri chiaveira, iyavei arɨ ndoyope iri chira, ndasacuvasɨ iri chiaveira chupe no.

17 Esepia, evocoi Ovesa secoi Vu renda rovai,

ahe osãrora ava rehɨi sereco inungar ovesa rãrosar.

Ipare opara vɨraso tecovesa resendar ɨ ndopai vahesave imboɨhu ãgua.

Tũpa evocoiyase omombɨtuhupara imboyasehosa sui yuvɨreco” ehi.

<- APOCALIPSIS 6 APOCALIPSIS 8 ->