SAN LUCAS 22

Yemomborandusa Jesús yuca ãgua

1 Ovɨrovɨse Pascua pieta pan ndayapepoi vahe hu ãgua, 2 ahese pahi rerecuareta, Moisés porocuaita rese oporombohe vahe avei ava sui osɨquɨyepave, oseca-seca tẽi Jesús yuca ãgua yuvɨreco.

3 Evocoiyase Caruguar oique Judas pɨha pɨpe, ahe acoi doce tuprɨ semimbohe pãhu pendar Iscariote serer vahe. 4 Ahe oso pahi eta rerecuar yuvɨrecoi vahe upe, tũparo rãrosar yuvɨrecoi vahe upe avei imoñeta ãgua, “Tamondo Jesús pe povrɨve” ehi. 5 Ahe evocoiyase oyembovɨharete yuvɨreco. “Yamondo guarepochi chupe” ehi voi eté yuvɨreco. 6 Judas evocoiyase, “Avɨye” ehi. Oseca voi ava porẽhɨseve Jesús mondo ãgua yamotarẽhɨmbar upe.

Yande Yar caru agüer ipa vahe

7 Oyepota arɨ yɨpɨndar vahe pan ndayapepoi vahe hu ãgua. Ahe pɨpeve avei ovesa Pascua pieta resendar yucaprɨ seropovẽhesa yepi. 8 Evocoiyase Jesús omondo güemimbohe Pedro, Juan reseve aipo ehi:

—Peso, tapemoingatu yande caru ãgua Pascua pieta resendar —ehi.

9 Semimbohe rumo,

—¿Que vo ereipota oromoingatura? —ehi yuvɨreco chupe.

10 Evocoiyase aipo ehi:

—Peyepotase tecua pɨpe, aheve pesepiara mbɨa vɨreco vahe cambuchi pɨpe ɨ. Pesora sẽtave supi. 11 Aipo peyera peñehe oɨ yar upe: “Ore mbohesar oporandu: ‘¿Uma oɨ pɨpe vo Pascua pieta resendar orohura che remimbohe rese?’ ehi” peyera. 12 Evocoiyase ahe omboyecuara oɨ guasu, ɨvatendar pẽu. Aheve pemoingatura yande caru ãgua —ehi güemimbohe upe.

13 Ipare ahe yuvɨraso, semimombehu rupi tuprɨ ité osepia mbahe. Aheve omoingatu carusa Pascua pieta resendar yuvɨreco.

14 Osupitɨse icaru ãgua apóstol reseve yuvɨroguapɨ mesave. 15 Evocoiyase aipo ehi:

—¡Cueseve tẽi eté niha aipota acaru vaherã pe pɨri Pascua pieta resendar rese che mano ãgua renonde! 16 Esepia niha, ndayapo iri chira pieta Pascua resendar acoi yavɨyese voi eté Tũpa mborerecuasa pɨpe —ehi.

17 Evocoiyase oipɨsɨ ɨgua rɨru, “Avɨye ndeu” ehi Vu upe, iyavei aipo ehi:

—Co amondora pẽu, perova-rova peyacatu. 18 Esepia, co pɨpe suive ndaɨhu iri chira uva rɨcuer acoi ouse voi Tũpa mborerecuasa —ehi.

19 Ipare oipɨsɨ pan, “Avɨye ndeu” ehi Vu upe. Aipo ohe pare ombohi-mbohi imondo güemimbohe upe.

—Co che rete, omboyecua imondopɨrã pe recocuer rese. Na peyera pe mahenduhasa pɨpe che rese yepi —ehi.

20 Ẽgüe ehi avei carusa pare yapo ɨgua rɨru rese aipo ehi:

—Co ɨgua rɨru pɨpendar omboyecua che Ru remimbotar ipɨasu vahe pẽu nara, ahe che ruvɨ ipɨyerepɨrã pe recocuer rese nara. 21 Cũritei rumo oime mbɨa mesave yande pɨri che mondo vaherã che amotarẽhɨmbar upe. 22 Supi eté imboavɨyesa itera che, Ava Rɨquehɨr, rese ñehesa yɨpɨve imombehuprɨ. ¡Iparaɨsu catura rumo acoi mbɨa che mondosar! —ehi.

23 Evocoiyase aipo ehise, semimbohe oporandu-randu tẽi oyeupe: “¿Ava pĩha ẽgüe ehi?” ehi tẽi yuvɨreco.

¿Ava vo ɨvate catu vahe?

24 Ipare voi semimbohe oñemoñeta guasu yuvɨreco oyese, ipɨhañemoñeta ‘avɨyeteramo che imboeteiprɨ catu vahe aicora oporocuaise Jesús’ ohesave yuvɨreco. 25 Evocoiyase Jesús aipo ehi: “Ava mborerecuar co ɨvɨ pɨpendar oyocuai pĩrata ava yuvɨreco yepi. Ahe chupe rumo, ‘Mbahe tuprɨ aposar’ ehi yuvɨreco. 26 Pe rumo ẽgüe ndapeyei chira. Acoi oyemboɨvate pota vahe, toyemochĩhivaheño güeco mbegüesa pɨpe. Acoi ava cuaisar, tihañeco catu ambuae ava rese. 27 ¿Uma pĩha ɨvate catu vahe: co mesave oguapɨ vahe ocaru yuvɨreco? ¿Sese ihañeco vahe tie? Acoi mesave oguapɨ vahe niha. Che rumo co aico pe pãhuve inungar pe rese ihañeco vahe.

28 “Pe rumo peico vahe che rupi yepi opacatú che recoãhasa pɨpe. 29 Sese che amondo pẽu pe mborerecuasa inungar che Ru ombou cheu che mborerecua ãgua. 30 Esepia, pecarura iyavei peɨhura che mborerecuasave che pɨri. Iyavei peguapɨra opacatu judío recocuer rese porandu ãgua” ehi güemimbohe upe.

Jesús, “ ‘Ndaicuai vahe evocoi mbɨa’ erera cheu” ehi Pedro upe

31 Aipo ehi avei yande Yar:

—Simón, Simón, esendu: Caruguar oporandu pe recoãha ãgua rese. 32 Che rumo ayeroquɨ nde rese nde yeroyasa paneẽhɨ ãgua. Ereyevɨse cheu, emonguerẽhɨ catu ambuae nde rɨvɨreta imovɨracua uca ãgua yuvɨreco oyese —ehi Pedro upe.

33 —Che Yar, che rumo ayemoingatu voi eté nde rupi che so ãgua nde roquendasave iyavei che mano ãgua nde rupi —ehi Pedro chupe.

34 —Pedro, supi eté amombehu ndeu: co pɨpe, tacura ñehe renondeve, nde, “Ndaicuai eté evocoi mbɨa” erera mbosapɨ oyupagüer rupi cheu —ehi.

Vɨrovɨ ité Jesús recoãha ãgua

35 Evocoiyase Jesús oporandu güemimbohe eta upe:

—Opomondose acoi mbahe rɨru porẽhɨ, guarepochi rɨru porẽhɨ, ambuae pe pɨtaqui ndugüer rerasoẽhɨse, ¿ipane vo acoi mbahe ahese pẽu? —ehi.

—Aní eté —ehi yuvɨreco chupe.

36 Evocoiyase,

—Cũritei, acoi mbahe rɨru vɨreco vahe, tovɨrecoveño, guarepochi rɨru vɨreco vahe, tovɨrecoveño avei; acoi ndovɨrecoi vahe quɨse pucu, tomondo oyeaosa quɨse repɨrã. 37 Supi eté amombehu pẽu: iyacatu ité imboavɨye tuprɨ ãgua co che rese ñehesa imombehuprɨ aipo ehi vahe: ‘Ava vɨreco ndaseco põrai vahe nungar yuvɨreco’ ehi vahe. Supi eté yavɨyera co icuachiapɨrer che resendar —ehi.

38 Evocoiyase semimbohe aipo ehi yuvɨreco:

—Ore Yar, cohave oime ñuvɨrío quɨse pucu —ehi.

—Ahe güeraño ité avɨye —ehi güemimbohe eta upe.

Jesús oyeroquɨ Getsemaní ve

39 Ipare Jesús osẽ oso ɨvɨtrɨ Olivo ve. Ahe ɨvɨtrɨve oso yepi, aheve semimbohe yuvɨraso yuvɨreco supi. 40 Oyepotase aheve yuvɨreco, Jesús aipo ehi güemimbohe upe:

—Peyeroquɨ angaipa pe yapoẽhɨ ãgua —ehi.

41 Ipare oyepepɨ güemimbohe sui, inungar ita imombosa vahe amombrɨmi, aheve oñenopɨha, oyeroquɨ 42 aipo ehi: “Che Ru, ereipotase, che renose eve co mbahe tẽi sui; tayapo eme che remimbotar tẽi, nde remimbotar rupira rumo” ehi.

43 Evocoiyase oyemboyecua Tũpa rembiguai chupe, seco momirata ãgua. 44 Mbahe-mbahe tẽi porarasa pɨpe oyeroquɨ catu. Ahese sacuvor inungar tuvɨ osẽ ichui otɨquɨ ɨvɨve.

45 Oñarapuhase oyeroquɨsa sui, oyevɨ oso güemimbohe uve. Ahe rumo opaño yuvɨroque yuvɨrocua ovɨharẽhɨsa pɨpe. 46 Evocoiyase,

—¡Mahera opaño peque! Peñarapuha, peyeroquɨ catu pe vɨapiẽhɨ ãgua mbahe tẽi pɨpe —ehi güemimbohe upe.

Jesús oipɨsɨ yuvɨreco

47 Jesús ñehe vɨteseve, oyepota atɨ ava yuvɨreco chupe. Judas doce semimbohe pãhu pendar tenonde secoi. Ahe oyemboya oso sese sovaupɨte ãgua. 48 Evocoiyase aipo ehi Judas upe:

—Judas, ¿mahera vo che, Ava Rɨquehɨr, rovaupɨtesa pɨpe che mondo eve che amotarẽhɨmbar upe? —ehi.

49 Semimbohe eta rumo, mbahe-mbahe tẽi repiase, oporandu yuvɨreco:

—Ore Yar, ¿yavavara yande quɨse pucu pɨpe? —ehi yuvɨreco chupe.

50 Ñepei rumo supindar, pahi rerecuar ɨvate catu vahe rembiguai nambi yasu cotɨndar oyasɨa. 51 Ahe rumo,

—Teheni, evocoi rupive —ehi güemimbohe eta upe.

Ipare opoco inambi rese ombogüera voi. 52 Ichui aipo ehi güecasar opacatu pahi eta rerecuar upe, tũparo rãrosar upe, tecua pɨpendar rerecuar upe avei:

—¿Quɨse pucu, ɨvɨra reseve-seve rutei co peyu che ropeña, imonda rai vahe nungar che rereco peye? 53 Aicose tũparo pɨpe pe pãhuve arɨ yacatu rupi, na ndapeyapoi eté co nungar cheu. Avɨyeño rumo, oyepota ité niha pẽu imombehuprɨ Caruguar pĩratasa pɨpe mbahe-mbahe tẽi apo ãgua —ehi.

Pedro, “Ndaicuai vahe evocoi mbɨa” ehi Jesús upe

54 Evocoiyase Jesús oipɨsɨ yuvɨreco, ovɨraso pahi eta rerecuar ɨvate catu vahe rẽtave yuvɨreco. Pedro rumo amombrɨ rupive tẽi osaquɨcue moñaño oso. 55 Aheve ñachimbrɨ pɨpe oyatapɨ yuvɨreco, oyere tuprɨ tata rese oyepehe yuvɨnoi. Aheve avei Pedro ipãhuve chini. 56 Evocoiyase cuña mbiguai, osepiase Pedro, omahe tuprɨ iri sese aipo ehi:

—Co ava avei niha acoi Jesús rupindar —ehi.

57 Ahe rumo aipo ehiño:

—Cuña, ndaicuai vahe ité ahe mbɨa —ehi.

58 Iparemi tẽi ambuae osepiase aipo ehi chupe no:

—Nde ité niha acoi supindar ereico —ehi.

—Aní mbɨa, aipo ere tẽi, ndahei eté rumo che supindar aico —ehi.

59 Ñepei hora paremi tẽi, ambuae aipo ehi chupe:

—Supi eté rumo co ité supi secoi vahe. Esepia, Galilea ɨguar ité niha —ehi.

60 Sese aipo ehi:

—¿Mbahe vo catu aipo nde ñehesa? Ndasenducuai eté —ehi.

Aipo ihe vɨteseve, oñehe tacura. 61 Evocoiyase yande Yar oyemboyere sese. Ahe ramoseve oyemomahenduha: “Co pɨpe tacura ñehe renondeve, ‘Ndaicuai vahe’ erera mbosapɨ oyupagüer rupi cheu” ihe agüer rese. 62 Ahese osẽ, oyasehó iteanga oso.

Sãrosar mara-mara tẽi Jesús vɨreco yuvɨreco

63 Evocoiyase ava Jesús rãrosar iguayɨ tẽi yuvɨrocua-rocua yuvɨreco sese. 64 Osesacua yuvɨreco. Ipare oporandu yuvɨreco chupe:

—¡Eicua ité ru, ava evocoi ocua nde rese! —ehi yuvɨreco chupe.

65 Iyavei setá mbahe rese oñehe-ñehe tẽi yuvɨreco chupe.

Jesús serasosa ava ñemonuhasa ɨvate catu vahesave

66 Ahe arɨ pɨpe, cõhese, oñemonuha ava judío rerecuar, pahi eta rerecuar iyavei opacatu Moisés porocuaita rese oporombohe vahe yuvɨreco Jesús reraso uca ãgua ava ñemonuhasa ɨvate catu vahesave, oporandu mbahe rese yuvɨreco chupe:

67 —¿Supi eté vo nde Poropɨ̃sɨrosar ereico? Emombehu ru oreu —ehi yuvɨreco chupe.

—Amombehuse rumo pẽu, ndache reroyai chietera peye —ehi judío rerecuar upe—. 68 Inungar che aporanduse mbahe rese pẽu, pe avei ndapemboyevɨi chietera cheu viña no. 69 Co pɨpe suive rumo che, Ava Rɨquehɨr, aguapɨra Tũpa mbahe mboavaisarẽhɨ acato cotɨ —ehi.

70 Ichui opacatu ava oporandu yuvɨreco chupe:

—Evocoiyase, ¿nde ité ereico Tũpa Rahɨr? —ehi.

—Supi eté niha aipo aipo peye cheu —ehi mborerecuareta upe.

71 Evocoiyase ahe aipo ehi yuvɨreco:

—¡Indó! ¿Ava iri vo evocoiyase mbahe omombehura yandeu? Yasendu niha iñehe ité cute —ehi mborerecuar oyeupe yuvɨreco.

<- SAN LUCAS 21 SAN LUCAS 23 ->