Link to home pageLanguagesLink to all Bible versions on this site
18
Babiloni ina sou tetelina

1 Amo dogoiyadi sikavava, ituli ta anerose agite yábana goi isou imamaima. Tauyana mana lovina toogagaina go, ana káeyana tomoeeyalina poyapoya ana madabokina itapasigi. 2-3 Niyana gagaina goi iduduwo idigo kana,

 
‘Da Babiloni moe vavina tomatagogoli nakae,
e ina oine boda liliudi ivanimdi,
oineyana moe masisi goyogoyoina![a]
Tuwo poyapoya ana tolovina asayana taiyao
simasisi goyogoyo.
Go ina kaiyaka owáowana ana vikaiya goi pasina
totalamapu simalaguyau.
Tauna asayana bogina ivailai!
Asayana gagaina bogina ivailai dókana![b]
Tomota bogina sikavava,
tauna asayana moe dimoni,
mánuwo vaatabudi,[~3~]
yoguyogu vaatabudi
be nakae aba kasilali idi kaba kaiyaka.’[~4~]
 

4-5 Amo ikavava, ituli ta níyana tayamo yábana goi anove idigo kana,

 
‘Guna bodao,
Amo asayana ina goyo ivakaigaga
nakae ana tukotuko
moe poyapoya goi ituko ina yábana goi.[~5~]
Tuwo ina bagalayadi Yaubada inuwokavatedi,
e bei ikatumapudi.
Tauna asayana goi kosowōduwo kōma,
govila bei ina goyo be ina mou kosiukoidi.’[~6~]
 

6 Niyanayana tuwaina ibóbwara, Yaubada ina toliunayao ilatuwokoidi idigo kana,

 
‘Nakonakae vavinayana ina guinuwa tomota yaidi,
e nakae koguinūwe tauyana yaina.
Ina guinuwa goyogoyoina ana katumapu sivayuwo kovīni.
Ina oine goyogoyoina keigaina tomota ivanimdi go,
Yaubada ina oine goyogoyoina toina keigaina
sivayuwo tauyana kovanīm.[~7~]
7 Vavinayana ina nuwonúwana goi idigo kana,
“Yau giyovila tayamo.[~8~]
Yau kóbuya nakae geya,
tauna ategeda bei geya ababaneeta.”
Tauna nakonakae tauyana toinina itaimamine
be nakae aiyako owáowana iyale,
e ana katumapu gedageda be ategeda kovīni.
8 Ina gágasa pasina geya mgoninamo ame mouyadi
bei sisowóduwo tauyana yaina:
Atówana, ategeda, loga be nakae yeu sabeninimina igabusave.
Nakae bei sisowóduwo
unana Yauwe Yaubada Tokalika,
tauna vavinayana itakino iya toogoyoina,
e ana katumapu bei avini.’
 
9 Tuwo poyapoya ana tolovinao boi vavinayana taiyao simasisi goyogoyo be nakae aiyako owáowana siyale, e tutayana asayana igabu, aubowoina bei sigite itukotuko, bei sitaiyakuwokúwala gagaina asayana manuna.[~9~] 10 Madi matoita asayana ina gedageda pasina, tauna masigava goi bei sitaoya, sidigo kadi,
 
‘Da Babiloni,
Komi imi kasa gagaina.
Imi kasa toogagaina go,
geya ivamumugoneta ami liuna bogina kobabane.
Oiyoi, oiyoi!
Ami toovalugo!’
 

11 Kidi go poyapoya ana totalamapuyaoyadi konadi geya vatau tayaamo igimonedi, tauna madi nuwomou bei sitaiyakuwokúwala asayana manuna.[~10~] 12 Konadiyadi moe goura, siriba, gurewa maisadi gagaina, paku maisadi gagaina, areko kayakayaidi dedevidi toidi, areko buruu be momooyasudi be kayakayaidi, alova ma mainidi dedevina be nakae kónana maisadi gagaidi siwodugudi go, konaniyadi moe áivori[~11~] goi, gavi goi, kopwa goi, kainum goi be nakae gurewa poowoudi goi siwodugudi.[~12~] 13 Tuwaina sinamoni,[~13~] pútuma, insensi, alovamamaina sisina, aidekoko sisina, oine, oribe mumuna, parawa dedevina, witi, bulumakau, sipi, osi, sariyota be nakae tomota paakonidi; pakonidiyadi moe tomota sikaigimonedi.

 
14 Dogoiyadi dedevidi komi da Babiloni kooyaledi
bogina sisáwala!
Imi esaesa be ami pasapasa dedevidi madabokiina sikavava go,
geya itoboinemita kobabanemneidi!
 

15 Kidi go amo totalamapuyadi boi idi esaesa asayana goi siibabane, masigava goi bei sitaoya unana asayana ina gedageda sigite, simatoita. Ago madi nuwomou be madi táiya[~14~] 16 bei sidigo kadi,

 
‘Oiyoi, asayana igoyo! Oiyoi!
Amo asayana ana kaigigita gumaboina nakae vavina
neta kwama esaesa kalaakovidi be kayakayaidi ilosidi
be nakae ipasa goura, gurewa esaesa be paku esaesa goi.
17 Tuta kaakupiina goi
ame esaesayadi madabokina bogina sisáwala.
Tauna asayana ana toovalugo!’
 
Tuwo kapiteni liliudi, totupa liliudi, gelugelu liliudi be nakae totalamapu liliudi masigava goi siitaoya[~15~] 18 go, asayana aubowoina sigite, siduduwo kadi,
‘Geya tayaamo asa ipate amo asayana gagaina nakae.’[~16~]
19 Tuwo kaukau sikabi dabadi goi silave idi nuwomou pasina go, madi nuwomou be madi táiya siduduwo gagaina sidigo kadi,
 
‘Iyaa!
Asayana gagaina nakae boi amoko goi
toni oga idi esaesa siibabane.
Oiyoi! oiyoi!
Asayana ana tovalugo igoyo toina.
Tuta kaakupiina goi bogina isáwala.’[~17~]
 

20 Níyana tayamo anove idigo kana,

 
‘Komi yábana ana tokaiyakoyao,
Yaubada ina kimasabayao, ina vamoleyanayao
be nakae ina tokabivalavalayao,
Asayana Yaubada bogina itakino asa goyogoyoina,
tauna imi gedageda asayana goi koobabane
Yaubada bogina ikatumapu.
Tauna asayana ina vailai manuna komi kouyāwana!’[~18~]
 

21 Amo ikavava, tayamo anerose toogagaina gurewa gagaina toina ikabi, ilave isou négwasa goi go, idigo kana,

 
‘Amo gurewayana nakae,
e asa gagaina Babiloni bei ivailai dókana go,
tomota geya tuwaina itoboinedita asayana sigite
unana itagau vata.
22 Geya tayaamo kaga niyana bei tanove.
Nakae geya tayaamo api geya,
tovesi geya,
kokopi geya,
síula ana uwa geya.[~19~]
Geya tuwaina asayana goi
bei amo dogoiyadi adi táiya siisowóduwo.
Tokatanaki sikavava;
geya tayaamo bei sibabane geya.
Witi geya,
tauna witiyana ana kaba kauvetaveta
geya tuwaina bei ipaaisewa.
23 Rampa adi mavada geya tuwaina asayana goi sinínima.
Tonai niyadi adi taiyakeka geya.
Ame dogoiyadi bei sisowóduwo unana ame:
Asayana ina totalamapuyao koroto gagaidi
poyapoya ana madabokina goi go,
madi gágasa toinidi siyapaliyedi go, Yaubada geya.
Tauyadi gagaidi
unana idi pola goi Totuyoyowo nuwodi
sikobaledi sima sigimona.
24 Aiyuwoina Yaubada ina tokabivalavalayao,
ina kimasabayao be nakae tomota liliudi
poyapoya ana madabokina goi neta sikámasa,[~20~]
e ikaikaidi da Babiloni nimadi goi ikaaiyaka.
Tauna moe pasina asayana bei ivailai.’

<- NUWOGAU 17NUWOGAU 19 ->