NUWOGAU 16

Anerose idi noko ainima aiyuwo sikalisiwoidi

1 Amo ikavava, níyana tayamo gagaina Tukunu Kimaasabaina Toina goi anove aneroseyadi ilatuwokoidi idigo kana,

‘Kotāoya kōna poyapoya goi Yaubada ina egamogamogu ma nokoidi ainima aiyuwo kokalisiwōidi.’

2 Tuwo moitamo, anerose vakuumgoina itaoya ina poyapoya goi ina noko ikalisiwoi. Amoko goi avatauwa neta boi woiwoiyana ana katukatu nimadi o dabadi goi bogina sikaupaakiyedi o ina tokwalu yaina sisaakululu, e sakavaidi sikapotu go, potuyadi goyogoyoidi be nakae gedagedaidi.[a]

3 Iya go anerose aiyuwoina itaoya ina négwasa goi ina noko ikalisiwoi, e negwasayana imalaikaika go, ikaikayana moe tokámasa ikaikaina nakae. E tauna iyaíyana liliudi négwasa goi sikamasa kówasa.

4 Iya go anerose aitonina itaoya ina sákala liliudi, oveya liliudi be nakae doelu liliudi goi ina noko ikalisiwoi. Amoko goi bwaeyadi simalaikaika.[b] 5 Ago anerose tayamo anove, tauyana bwae adi tolovina, Yaubada ilatuwoko idigo kana,

‘Kom Tokaiyako vata;[c]

kom amta Totumasaba.

Kom kulovina amo mouyadi kuvinidi,

tauna im takínona goi kom tokivavasa.

6 Amo mouyadi itoboinedi

unana im kimasabayao

be nakae im tokabivalavalayao

kidi togoyoidi sikaumatedi,

ikaikaidi sidau,

e ikaika nakae kuvanimdi sinim,[d] boma!

Tauna im takínona goi kom tokivavasa.’

7 Amo ikavava, níyana tayamo aba kasala goi anove idigo kana,

‘U moitamo,

Yauwe ima Yaubada Tokalika,

im takínona moe mooitamoidi be kivaavasaidi.’

8 Iya go anerose aivasina itaoya ina níyala goi ina noko ikalisiwoi. Tuwo mana tagona yeu goi tomota isupidi. 9 Ina lovina goi mou sisowóduwo yaidi, e yoina sitagiwoi unana yaviyavi gagaina isupidi. Ago geya situgavileta bei ina togaga ana káeyana sikamoitamoe.

10 Iya go anerose ainimaina itaoya ina woiwoiyana vakuumgoina kebana esaaesaina goi[~5~] ina noko ikalisiwoi. Amoko goi woiwoiyana ina kaba lovina[~6~] ikamamaníwana, e ina bodao saladi sikakavatedi adi geda pasidi.[~7~] 11 Go Yaubada, Tauyana totobukukui yábana goi, sitagiwoi[~8~] adi geda be adi potu pasidi go, idi guinuwa goyogoyoidi manudi nava geya situgavileta.[~9~]

12 Iya go anerose ainima tayamoina itaoya, sákala gagaina Yuparetisi goi ina noko ikalisiwoi. Tuwo sakalayana iyápasa bei enao ikaaiyaka tolovina madi tovayaviyayao bomatu dadavina goi itoboinedi sima.[~10~]

13 Anerose ainima tayamoina ina guinuwa ikavava, akandobala baloma goyogoyoidi aito kwekwe maisiyadi agitedi gigimeta tobuna goi be woiwoi tobuna goi be nakae tokabivalavala polapola[~11~] tobuna goi sisowóduwo. 14 Moitamo balomayadi goyogoyoidi. Tauyadi dimoni go, aba kinana siguuinuwedi. Sina tolovina liliudi poyapoya goi silamgogoidi simedi asa tayamo yaviya manuna Yaubada Tokalika ina takínona ana maliyalina goi. 15 Ego Tomoya idigo kana,

‘Konōve! Tovaináwana nakae bei ao avatoopemi. Amo tutayana avatau neta iyauyáusa be nakae ana kwama bogina ilosi, e ana dedevina bogina ibabane.[~12~] Nakae itoboine iguinuwe, govila bei ma paawakuna iiketoiya, e ina omayamaya tomota sigite.’

16 Balomayadi sina tolovina liliudi silamgogoidi simedi asa tayamo goi; asayana Diyuu niyadi goi kadi, ‘Amagedoni.’[~13~][~14~]

17 Iya go anerose ainima aiyuwoina itaoya, yábana osasaina goi ina noko ikalisiwoi go, tayamo níyana gagaina kébana esaaesaina Tukunu Kimaasabaina Toina goi anove kana,

‘Bogina ikavava.’

18 Tuwo ávila, butukáwana gagaina, palapala be nakae nikuniku gagaina sisowóduwo.[~15~] Boi nimatu tutayana tomota poyapoya goi sigimisowóduwo go, ima ame tuta geya tayaamo nikuniku ana togaga nakae amo nikunikuyana ana togaga; nikuniku gagaina toina. 19 Tuwo asa gagaina iwotai dadavato. Totuyoyowo idi kasa liliudi poyapoya goi sivailai. Ago asa gagaina Babiloni[~16~] ina goyo Yaubada inuwokavate, e ina egamogamogu gagaina oinena ma keigaina[~17~] ivanimdi.[~18~] 20 Nikunikuyana ina togaga goi simla liliudi sisalili be nakae koya liliudi sitagau.[~19~] 21 Tuwaina, kúwana kasakasaidi gagaidi yábana goi sisou. Kuwanayana gurewa gagaidi nakiyadi, e tamo tamo adi moumou ivakaigaga, potipaibi (45) kilo nakae. Kuwanayana igoyo toina, tauna Yaubada sitagiwoi.[~20~]

<- NUWOGAU 15 NUWOGAU 17 ->