Link to home pageLanguagesLink to all Bible versions on this site
2
Tonanamsa sima Tokalibúbuna
Yeisu yaina sisaakululu tetelina

1 E Yeisu Bedeliyema goi ibíbina, moe Yudiya sinaena. Amo tutayana tolovina Erodi nava iilovina. Yeisu ina bíbina mlina utuna adi tonanamsa ma matabuwodi bomatu goi sima Yerusalema. 2 Sima, silumadádana kadi,

‘Komi Diyuu imi Tokalibúbuna bogina ibíbina go, Tauyana nako? Ina utuna kagite ituko, e kasabokuliye kama bei Tauyana yaina kasakululu. Tauna kulatuwokōima Tokalibubunayana nako ikaaiyaka.’
3 E lumadadanayana tolovina Erodi inove, toinina ina lovina manuna ikateyova go, kidi da Yerusalema liliudi atedi siyova unana nakona bei kaga iguinuwe yaidi. 4 Tuwo Diyuu adi Tonúwala Gagaidi be Yaubada ina Katukeda ana tovatulukwanayao madabokidi ikaunokunokudi sima ilumadadedi idigo kana,
‘Guyau, Yaubada ana Vadámana, nako bei ibíbina?’
5 E tauyadi kadi,
‘Yudiya asaina Bedeliyema goi. Moe nakae Yaubada ina tokabivalavala igini kana,
 
6 “Bedeliyema e,
Kom asa giyaina Yuda ina poyapoya[a] goi go,
tuwo Yuda ana tolovinao gagaidi liliudi matadi goi
kom asa vakuumgoina.
Moitamo. Kom goi Tokalibúbuna tayamo bei itaoya.
Tauyana guna bodao Isileli tubunao
bei ivakededi sipi ana tomatakavata nakae.” ’
Maika 5:2
 

7 E tuwo kina go Erodiyana inuwonúwana, geya, tonanamsayadi iduduwegaudi sima, e ilumadadedi utunayana manuna bego iyagoidoko ava tuta igimisowóduwo sigite. 8 Silatuwoko ikavava, Erodiyana idigo kana,

‘Kōna gomanayana kolusaledōko. E tutayana kobabane, kōma kolatuwokōigu bei yau nakae ana asakululu Tauyana yaina.’
Ilatuwokoidi ikavava, ietunedi sina Bedeliyema.

9 E tolovina Erodi ina livalayana sinove, sisowóduwo go, sikainaopa unana utunayana boi sigite itukotuko matabuwona aiyuwoina isowoduwomna! Tuwo ivakededi sina go, vada tayamo yatanaina goi isayata. Vadayana sinaena gómana ikaaiyaka. 10 E utunayana sigite, siuyáwana, to siuyáwana gagaina toina. 11 Tuwo sina vadayana goi sisiu, gomanayana sigite sinana Meri taiyao. Sigite, aedi sivatugúyala, sisakululu gomanayana yaina. Sisakululu ikavava, idi esaesa dedeogaidi sikatupaevedi go, idi yabobona sikabidi, sikasaledi gomanayana yaina. Yabobonayadi moe goura, aidekoko sisina be alovamamaina sisina. 12 Niga idi tuta aluvila, sikanamimi go, idi kanamimiyadi goi Yaubada ilatuwokoidi idigo kana,

‘Taabu kokaaluvīla kononōina Erodi yaina.’
Tuwo sitaoya, ituli ta kenao goi sikaluvila sina idi kasa.
Kidi Iyosepa sisiya sina Itipita goi
namliyeta sikaluvilamna sina Nasareta tetelina

13 E tonanamsayadi sikaaluvila go, Iyosepa imasisi, ikanamimi. Ina kanamimiyana goi Yauwe ina anerose matabuwona isowóduwo Iyosepa ikatuwoini idigo kana,

‘Iyosepa, kutāoya! Gómana ma sinana kwabīdi go, kosīya kōna Itipita goi. Amoko goi kokaaiyāka ana kadókana alatuwokoim. Erodi ina tovayaviyayao bei ilatuwokoidi sina gomanayana silusale bego sikaumate.’

14 E tuwo moitamo nava sabamgo tauyana ikabitaotaoya gomanayana ma sinana ikabidi, taiyao sina Itipita. 15 Amoko goi sikaaiyaka ana kadókana Erodi ikámasa. Moeko goi kaga Yauwe ina tokabivalavala goi itaalavaite itoboine imalatomotamna. Livalayana kana,

 
‘Itipita goi natugu aduduwevile.’
Oseya 11:1
 

16 E niga kina Erodi livala inove bego tonanamsayadi sikatubau, tuwo gamona igoyo toina. E ina tovayaviyayao ietunedi sina Bedeliyema be nakae asa giyaidi liliudi kikina goi gogómana koroto adi tala aiyuwo nakae kana isou ina liliudi sikaumatedi. Moe unana boi tonanamsayadi Erodi silatuwoko ava tuta utunayana sigimigite go, moe tala aiyuwo sikavava bogina. 17 Amoko goi tokabivalavala Yeremaya ina livala imalatomotamna, tauyana idigo kana,

 
18 ‘Níyana tayamo Rama goi sinove,
vataitáiya be ategeda gagaina.
Moe Reitiyeli itaitáiya natunao pasidi.
Natunao sikavava,
tauna geya latuwona tomota sivayole.’
Yeremaya 31:15
 

19 E Erodi ina kámasa mlina Iyosepa nava Itipita goi ikaaiyaka go, tuta tayamo imasisi, ikanamimi. Ina kanamimiyana goi Yauwe ina anerose matabuwona isowóduwo ikatuwoini 20 idigo kana,

‘Kutāoya! Gómana ma sinana kwabīdi, kokaluvīla kōna Isileli goi. Tauyadi boi sipooikíkina bego gomanayana sikaaumate bogina sikámasa.’[b]

21 E tuwo moitamo tauyana itaoya, gómana ma sinana ikabidi, sikaluvilamna sina Isileli goi. 22 E sima go, Iyosepayana vala inove bego Erodi ana katumapu moe natuna Arekeleo Yudiya goi iilovina. Tuwo imatoita; geya latuwona sina amoko. E sabamgo tayamo imasisi, ikanamimi go, ina kanamimiyana goi Yaubada isowóduwo ilatuwoko idigo kana,

‘Taabu kunonōina Yudiya goi.’
Tuwo Iyosepa itaoya, gómana ma sinana ikabidi, sina Galili dadavina. 23 Dadavayana goi sina asa tayamo yoina Nasareta; amoko goi silokasa.[~3~] Moeko goi itoboine tokabivalavala idi livala boi sitalavaaitedi simalatomota. Sidigodigo bego Tauyana siduduwe guma Nasareta.[~4~][~5~]

<- MADIU 1MADIU 3 ->