GUINUWA 6

Stiveni tetelina

(Guinuwa 6:1—7:60)

Diyuu tokanagiriki nuumisaidi
idi kaukulukúluwo

1 E amo tutayana goi Yeisu ina tovatotowanayao tuwaina sibadabada. Ego maliyalina tamo tamo goi tokanaiberiu nuumisaidi mani o awoinu sikaiguyauyedi kobuyayao yaidi goi. Go kidi tokanagiriki[a] sikaukulukúluwo tauyadi tokanaiberiu yaidi kadi,

‘Tutayana komi tokanaiberiu mani be awoinu kokaiguyauyedi, tokanagiriki idi kobuyayao geya kovinidita!’

2 E idi kaukulukuluwoyana kidi vamoleyanayao yawou aiyuwo sinove, tuwo Yeisu ina tovatotowanayao liliudi siduduwedi sima silatuwokoidi sidigo kadi,

‘Yaubada ivayokoima kai Vala Dedevina ana totalavaitayao. Tauna geya itoboineeta Yaubada ina livala ana talavaita kakalave go, bego mani ana kaiguyau kamatakavatedi. 3 E tuwo segowo, koroto yaimi goi kodovatusīdi. Neta valedi dedevidi, Baloma Kimaasabaina ivakayaodeidi be nakae madi nanamsa gagaina, e kokinavēdi bei kai kavayokoidi kidi mani ana kaiguyau adi tomatakavata. 4 E kai go bei kakasalema awanoi be Yeisu Valena Dedevina ana vatulúkwana yaidi goi.’

5 Tuwo boda liliuuna sinove, e yawou aiyuwoyadi idi livala sikaodedevine. Tuwo koroto ainima aiyuwo sikinavedi. Tauyadi moe Stiveni, tauyana numisa gagaina be nakae Baloma Kimaasabaina ivakayaodei, Pilipo, Pirokori, Nikanori, Timoni, Paramena be nakae Nikolasi, tauyana guma Antiyoki Totuyoyowo tayamo go, tosaidámana. 6 Sikinavedi ikavava, simedi vamoleyanayaoyadi matadi goi sivagitakoidi go, vamoleyanayaoyadi madi kawanoi nimadi sikailagasidi korotoyadi ainima aiyuwo dabadi siyoisidi, e mani ana kaiguyau manuna sikawoidi.

7 Tuwo Yaubada ina livala tuwaina inunúnuwo, e Yeisu ina tovatotowanayao Yerusalema goi tuwaina sibaadabada gagaina. Tonúwala nakae; badabadaaidi Yeisu valena sinovenove, siinumise.

Stiveni ana yóita ina talavaita pasina

8 E kina go Stiveniyana yaina goi Yaubada ina kanuwóiya be ina togaga sikaaiyaka gagaina. Tuwo aba kinana kainaaopaidi gagaidi tomota nauyayanaidi goi iguuinuwedi. 9 E nakae iguuinuwe go, Diyuu maniyedi sitaoya, Stiveni taiyao sikaumakimaki. Tauyadi idi kaba tugúguna yoina Taaligeima[b] goi sisaakululu. Kidi maniyedi da Sairini, maniyedi da Alekisandira, da Silisiya be nakae da Esiya. 10 Sikaumaakimaki Stiveni taiyao go, tauyana mana nanamsa ibobóbwara be nakae nukotona Baloma Kimaasabaina isanayato, tauna ikausagugudi.

11 Tuwo Diyuuyadi sediyao maniyedi siemaisigaudi bego sina Stiveniyana siwowoko. Sediyaoyadi sitagona sina tomota yaidi goi siwowoko sidigo kadi,

‘Tauyana Stiveni kanove Mosese be Yaubada itagiiwoidi.’

12 Tuwaina sina tomota, tomoyamoyayao be nakae Yaubada ina Katukeda ana tovatulukwanayao gamodi sisowolidi, e sitaoya sina Stiveniyana siyoisi sibiu sinave Diyuu idi kotu goi. 13 Kotu goi totalavaita polapola maniyedi siduduwedi sima Stiveniyana siwowoko sipola kadi,

‘Ame tauyana kanove tuta liliuna Vada Kimaasabaina ame be nakae Yaubada ina Katukeda itagiiwoidi. 14 Moitamo. Tauyana kanove idigodigo bego amo Yeisuyana guma Nasareta vada ame bei itauwe go, ida sinapu Mosese ivinida bei ikaigaviledi.’

15 Tauyana sidumaakavate go, madabokidi kotu goi sikaaiyaka maisina sigite anerose maisiyana.

<- GUINUWA 5 GUINUWA 7 ->