Link to home pageLanguagesLink to all Bible versions on this site
19
1 Babilonia to dohse wahahtore yʉ ñʉri baharo mʉanopʉ payʉ masa sañurucua coa tahre yʉ tʉhochʉ. Õ sehe ni sañurucuhre:
“Aleluya.
Cohamacʉre noano durucujihna.
Cohamacʉ marine yʉhdʉchʉ yoariro jira.
Tirore noano ño payojihna.
Tua yʉhdʉariro jira tiro.
2 Mahñono marieno quihõno masare buhiri dahrera tiro.
Ñaricorore mʉa mehne ñano yoarucuricorore ñʉ cũa jipihtiro macaina, ahri yahpa macaina ñano yoahre.
Ticoro sehere buhiri dahrehre Cohamacʉ.
à jiro tirore dahra cohtainare ticoro to wajãri buhiri buhiri dahrehre tiro”,
ni sañurucua coa tahre.

3 Pari turi sañurucua coa tahre:

“Aleluya. Cohamacʉre noano durucujihna. Tí maca ñari maca to jʉ̃ri maca ã me tirucurohca”,
ni sañurucua coa tahre.

4 Ã yoa veinticuatro Jesu yaina pʉhtoa, pititiaro soro bajuina mehne na tuhcua caha sʉ, Cohamacʉre to dujiroi dujirirore wahche payohre. Õ sehe ni wahche payohre tina: “Amén. Aleluya. Ã tjira. Cohamacʉre noano durucujihna”, nihre tina.

5 Baharo pʉhtoro dujiropʉ õ sehe nino coa tahre:

“Mari pʉhtoro Cohamacʉre wahche payoga.
Tirore dahra cohtaina, tirore ño payoina, wiho jiina, pʉhtoa cʉ̃hʉ jipihtina mʉsa tirore noano durucuga”,
nino coa tahre.
Cordero to wamomaca dʉhtehti nʉmʉ bose nʉmʉre yahuha João

6 Baharo payʉ masa ti durucuchʉ tʉhohi. Pjiri poaye, wʉpo mehne to bisiro coa taro seheta durucua coa tahre yʉ tʉhochʉ:

“Aleluya.
Cohamacʉre noano durucujihna.
Tiro mari pʉhtoro sehe pʉhtoro sãa tuhsʉre.
Tua yʉhdʉariro jira tiro.
7-8 Cordero to wamomaca dʉhtehti pja jira mipʉre.
To wamomaca dʉhtehticoro noano ti cahno tuhsʉricoropʉ jira.
Ticorore noari suhtiro wete marieni suhtirore wahre.
Tí suhtiro Cohamacʉ yaina noaare ti yoari yoaro sehe jira, mari piti dahre buhechʉ.
à jina ti wamomaca dʉhtehti pja to jichʉ wahchejihna mari.
Cohamacʉre ‘Tua yʉhdʉariro jira’, nijihna”,
ni durucua coa tahre.

9 Ti ã niri baharo anjo õ sehe nihre yʉhʉre:

—Ahrire joa naga: “Cordero to wamomaca dʉhteri nʉmʉ bose nʉmʉre to pjirocarina wahcheina jira”, ni joa naga —nihre anjo yʉhʉre.
à ninota õ sehe ni namohre:
—Potocã tjira ahri yʉ yahuri. Cohamacʉ ya durucua jira —ni namohre yʉhʉre.

10 To ã nichʉ tʉhocʉta tiro panoi na tuhcua caha sʉ, tirore ño payoi tai nimahi. Yʉ ã yoai cahachʉ waro õ sehe nihre tiro yʉhʉre:

—Tíre yoai tjiga. Mʉ yoaro seheta yʉhʉ cʉ̃hʉ Cohamacʉre dahra cohtarirota jija. Mʉ coyea Jesu yaina jipihtina to ya buheare duhueraina yoaro sehe yʉhʉ cʉ̃hʉ Cohamacʉre dahra cohtarirota jija. Ã jicʉ Cohamacʉre na tuhcua caha sʉ, tiro sehere ño payoga —nihre anjo yʉhʉre.
Cohamacʉ yare yahu mʉhtaina cjiri panopʉ macaina Espíritu Santo to yoadohoro mehne Jesu ya buheareta yahuyua tiri jire.
Cawalo yehseriro bui pisarirore yahuha João

11 Baharo mʉano parĩ mʉa wahachʉ ñʉhi. Tói cawalo yehseriro jihre. Tiro bui pisariro õ sehe wama tihre: To niriro seheta yoariro potocã yoariro wama tihre tiro. Quihõno masare ñaina, noainare bese, tirore ñʉ tuhtiina mehne cahma wajãna. 12 To capari picha pohna yoaro sehe jihre. Ã yoa to dapui payʉ pʉhtoa pisaa sorori jihre. Ã jiro to pjacʉi wama joa õriro jihre. Tí wamare tiro dihta masihre. Paina masierare. 13 To sãari suhtiro yoari suhtiro di wahãri suhtiro jihre. Tiro õ sehe wama tihre: Cohamacʉ ya dʉserore yahuriro wama tihre tiro. 14 Ã jia to yaina surara mʉano macaina tiro baharo wahare. Yehseina cawaloa bui pisaina noano yehsea suhtire, wete mariea suhtire sãaina jihre. 15 To dʉseroi ñosari pjĩne siori pjĩne cuhcũhre. Tí pjĩ yahpari macainare to yʉhdʉrʉcahti pjĩ jihre. Ã jiro to tuaa mehne to dutichʉ ne cʉ̃iro tirore yʉhdʉrʉcaro bihosi. Cohamacʉ tua yʉhdʉariro payʉ yahpari macaina mehne sua yʉhdʉara. To ã suachʉ cawalo bui pisariro tinare tuaro buhiri dahrerohca. 16 To suhtiroi, to ñʉchʉcʉ cʉ̃hʉre ahri wamare joa õri jihre: “Jipihtina paina pʉhtoa bui pʉhtoro”, ni joa õri jihre.

17 Baharo sʉ̃ siroi ducurirore anjore ñʉhi. Jipihtina mʉanopʉ wʉinare yucaa perire sañurucu mʉohre tiro. Õ sehe ni tuaro sañurucu mʉohre:

—Cahmachuna taga. Cohamacʉ to bose nʉmʉi chʉna taga. 18 Payʉ yahpari macaina bui pʉhtoare, surara pʉhtoare, surara perire, cawaloare, tina bui pisainare, jipihtina paina masare, dahra cohtainare, dahra cohtaina jierainare, paina pʉhtoare, wiho jiinare tina jipihtina ti pjacʉri cjirire chʉna taga —nihre anjo yucaare.

19 Baharo nʉcʉ macarirore, ahri yahpa macaina bui pʉhtoa ti surara peri cʉ̃hʉre ñʉhi. Tina cahmachuhre cawalo bui pisariro mehne to yaina surara peri mehne cahma wajãa taa. 20 Ti ã cahma wajãchʉ cawalo bui pisariro nʉcʉ macarirore peresu yoahre. Pairo “Cohamacʉ yare yahu mʉhtariro jija”, ni mahñoriro cʉ̃hʉre peresu yoahre. Tiro mahñoriro sehe nʉcʉ macariro to ñʉrocaroi bajuamehneare yoariro jihre. To bajuamehnea mehne nʉcʉ macariro to wamare wahãinare to masʉre ño payoinare mahñohre “Ahri Cohamacʉ ya jira”, nino. Tina pʉarore to peresu yoari baharo tinare catiinareta pichacapʉ cohãhre. Tí pichaca pjiri ma puro jiri pichaca pjiri pichaca azufre mehne jʉ̃ri pichaca jihre. 21 Ã jiro dʉhsainare ti surara peri cjirire ñosari pjĩ mehne to dʉseroi jiri pjĩ mehne wajãhre cawalo bui pisariro sehe. Ã to wajãri baharo yucaa peri ti pjacʉri cjirire chʉa, yapi yʉhdʉa wahahre.

<- APOCALIPSIS 18APOCALIPSIS 20 ->