30
Omano ta ramo ogueraa jepe rire oguerovy'aa ague
Mboraeirã Davi ombopara va'ekue oo guaxu Nhanderuete pe omboaxa jave.
1 Senhor , xee ma romboete 'rã,
xereraa jepe rire.
Nderejapoi xerovaigua kuery xere ovy'a rei aguã rami.
2 Senhor Xeruete, ndevy pe ajapukai va'ekue xereraa jepe aguã.
Ha'e ramo xemonguera.
3 Rejapo yvykua gui xenhe'ẽ oẽ ju aguã rami.
Xerekove re repena yvykua py aguejy e'ỹ aguã.
4 Peẽ ixupegua pendeky'a e'ỹ va'e, peporaei pekuapy Senhor pe,
perovy'a hery iky'a e'ỹ va'e.
5 Mba'eta ipoxya ma xapy'a'i guarã anho.
Ha'e rã nhanderayvua ma jaikovea pukukue re 'rã oĩ.
Pytũ ouvy rã onhendu 'rã ojae'o va'e.
Va'eri ko'ẽ ma rã ou 'rã vy'a.
6 Xee aiko porã rei jave
“Ndaxereityai 'rã” ha'e va'ekue.
7 Ndee Senhor xemboaxya rupi ae
rejapo xee aĩa yvyty oĩ atã aguã rami.[a]
Mba'eta nderejexa ukai ramo
xee ajexavai.
8 Senhor , ndevy pe ajapukai.
9 Mba'erã tu xeruguy ovare 'rã yvykua py aguejy rã?
Ndevy pe iku'ikue oporaei 'rã ri ty'y?
Ha'e nunga oikuaa uka 'rã teve ndeguigua anhetẽ va'e?
10 Senhor , endu ha'e xemboaxy ke.
11 Xerexaya gui xemombytu'u avy'a ju aguã.
Xegui reipe'a ma ajukue vaikue,[b]
hekovia avy'a ete aguã ju remoĩ,
12 xenhe'ẽ opytu'u e'ỹ re oporaei aguã.