SAN MATEO 17

Jesús oyepoepɨ

1 Seis ara cuae jei güire, Jesús güɨraja Pedro jare Jacobo jare Juan - jae co Jacobo tɨvɨ - iru reta ipɨte güi metei ɨvɨtɨ ɨvate vae re. 2 Jare joco pe oyepoepɨ jae reta jóvai. Jova oesape cuaraɨ oesape rami, jare jemimonde tiasɨ yae jare oesape. 3 Jare oyecuaa chupe reta Moisés jare Elías imiari ñogüɨnoi Jesús ndive. 4 Jayave Pedro jei Jesús pe:

—OreYa, icavi co ñai vaera cuae pe. Nde reipota yave, toroyapo cuae pe mboapɨ cuaraɨa yai pegua, metei ndeveguara, metei Moisés peguara, jare metei Elías peguara —jei.

5 Pedro imiari oi rambueve, amapɨtu oesape vae omocuaraɨa reta, jare amapɨtu güi oñeendu ñee.

—Cuae co jae cheRaɨ. Aaɨu yae. Ayerovia yae jese. Peyeapɨsaca jese —jei.

6 Jare Jesús jemimboe reta cuae oendu yave, oa ɨvɨ re. Echa oquɨye yae reta. 7 Jayave Jesús ou oñono ipo jese reta jare jei:

—Pepúa. Agüɨye pequɨye.

8 Jare omae reta ye yave, mbaeti ma oecha quia jae reta ndive, jaeño Jesús.

9 Jare ɨvɨtɨ güi ogüeyɨ yogüeru rambueve, Jesús oyócuai reta:

—Agüɨye pemombeu quia pe cuae peecha vae, ndei che cuimbaera ayeapo vae aicove ye ayu omanogüe vae reta ipɨte güi mbove.

10 Jayave jemimboe reta oparandu chupe:

—¿Maera pa jei mboroócuai re oporomboe vae reta Elías rani co outa?

11 —Añete Elías rani co outa —jei Jesús—, jare opaete oyapocavita. 12 Erei che jae peve, Elías ou ma co, jare Israel pegua reta mbaeti oicuaa. Jae rambue oyapo reta chupe jae reta oipota vae. Jae ramiño vi jae reta oiporaraucata cheve —jei.

13 Jayave Jesús jemimboe reta oicuaa jae imiari oi chupe reta Juan oporombobautizase vae re.

Jesús ombogüera cunumi aña oya jese vae

14 Jare yogüeru ovae yave jeta vae ñogüɨnoia pe, metei cuimbae ou oovaiti Jesús. Oyeatɨca jae jóvai, jare jei chupe:

15 —CheYa, eiparareco cheraɨ. Echa imbaerasɨ iñaca pe jare oiporara yae. Jeta vese ma oa tata pe. Oa vi ɨ pe —jei—. 16 Aru neremimboe reta pe ombogüera vaera tei, erei jae reta mbaeti ipuere —jei.

17 Jayave Jesús jei joco pe ñogüɨnoi vae reta pe:

—Yavai yae pe reta cuae ɨvɨ pe peico vae peporogüɨrovia vaera. ¿Quirai regua ra apɨtata pe reta ndive? ¿Quirai regua ra cherosata peve? Peru cheve cuae pe jocuae cunumi —jei.

18 Jayave Jesús oñeengata aña pe, jare aña ojo cunumi güi. Jare jupiveiño cunumi ocuera.

19 Jayave Jesús jemimboe reta yogüeru Jesús oia pe oparandu chupe, jae retaño jae ndive ñogüɨnoi yave:

—¿Maera pa ore mbaeti orepuere romondo aña?

20 —Mbaeti peporogüɨrovia rambue —jei Jesús chupe reta—. Añete che jae peve, güɨramoi peporogüɨrovia michi yae metei mostaza jaɨgüe michi yae rami. Erei jocuae nunga mborogüɨrovia penoi yave, pepuereta pere cuae ɨvɨtɨ pe: Ecua cuae güi epɨta joco pe, jare ojota co. Ngaraa mbae yavai peve —jei—. 21 Erei ngaraa pepuere pemondo cuae nunga aña, jaeño peyerure yave Tumpa pe peyecuacu reve tembíu güi —jei.

Jesús jei ye omanota co

22 Jare Galilea pe ñogüɨnoi rambueve, Jesús jei jemimboe reta pe:

—Che cuimbaera ayeapo vae metei vae chemoeterengata iru vae reta pe. 23 Jae reta cheyucata. Erei amano ma yave, mboapɨ ara rupi aicove yeta ayu omanogüe vae reta ipɨte güi —jei.

Jayave jemimboe reta ipɨatɨtɨ yae.

Mburuvicha ocovara vae

24 Jare Capernaum pe yogüɨraja ovae yave, mburuvicha peguara ocovara vae reta yogüeru oparandu Pedro pe:

—¿Omboepɨ pa pemboe vae mburuvicha ocovara vae?

25 —Omboepɨ co —jei Pedro chupe reta.

Jare oique yave ñogüɨnoi metei o pe, Jesús oique Pedro jenonde jare jei chupe:

—Simón, mburuvicha ɨvɨ pegua reta ocovara iru vae reta pe. ¿Ocovara reta vi pa taɨ reta pe ani iru vae reta peño? ¿Mbae pa reñemongueta cuae re? —jei.

26 —Iru vae reta peño —jei Pedro.

Jayave Jesús jei ye chupe:

—Jae rambue taɨ reta mbaeti omboepɨ chupe reta. 27 Erei agüɨye vaera yayapo icavi mbae vae echa chupe reta, ecua ɨ guasu pe emboa jevae ɨ rupigua. Eipɨɨ jare eipea iyuru. Joco pe revaeta metei corepoti. Eraja emee mburuvicha peguara ocovara vae reta pe cheveguara jare ndeveguara —jei.

<- SAN MATEO 16 SAN MATEO 18 ->