1 Garray, ŋanapurrunydja ḏukṯuk nhuŋu nhe yurru djiwarrny'tja ḻapmaramana, ga dhunurrana lili, märr yurru dhuwala munathany'tja wäŋa buku'‐wukunydja gur'kuryunna ŋuriŋi nhokala ganydjarryunydja. 2 Ŋunha miriŋuyunydja walalay yurru nhäma dharaŋanna ŋunhi nhenydja biyapul wal'ŋu ganydjarr‐ḏumurru God, ga yolŋu'‐yulŋu miṯtji bäpurruny'tja yurru barrarirrina mirithirrina wal'ŋu marrmarryunmirrina gumurrŋura nhokalanydja, liŋgu nhenydja dhuwala balanyara biyaku ŋuli gurthana, ga ŋuriŋi nhokalanydja gurthayu yurru nhärana ŋunha dharpanydja räwakthirrina. 3 Ŋäthilinydja wal'ŋu ŋunhinydja nhe marrtjina lili, bala ŋayinydja ŋunhi bukunydja wäŋa marrmarryurrunana, bäyyi warray ŋunhi ŋanapurru yakanydja gatjpu'yurruna ŋurikiyi, yurru nhenydja djäma mirithirri warray ganydjarr ḏumurru. 4 Nhenydja dhuwala God, ŋunhi warray ŋunhi nhe ŋuli djäma ŋamakurru' wal'ŋu dhika ŋurikinydja walalaŋgu ŋunhi walala yukurra galkun ŋuli gatjpu'yun nhuŋu; yaka ŋäthilinydja yolŋuyu nhäŋala balanyarayinydja Godnha bitjan nhe. 5 Nhenydja gumurr‐ŋamathirri ŋuli yukurra ŋurikinydja walalaŋgu yolŋu'‐yulŋuwu ŋunhi walala ŋuli djäma ŋamathama wal'ŋu dhunupa ŋayaŋu‐djulŋithinyaramirriyu, ŋurikinydja walalaŋgu ŋunhi walala yukurra nhina ŋunhili nhokala ŋamakurru'ŋura romŋura.

Yurru ŋanapurrunydja dhuwala dhuwurr‐yätjmirri yana. Nhenydja ŋanapurruŋgu ŋaramurryina, liŋgu ŋanapurrunydja djäma yätjkuŋala ŋuliŋuru liŋgu ŋurruŋuru ga yana liŋgu ga dhiyaŋu‐wala dhuwala mukthun. Nhaltjan dhika ŋanapurru yurru walŋathirrinydja? 6 Ŋanapurrunydja dhuwala bukmak rom‐djarrpi'mirri yulŋunydja nhokalanydja maŋutjiŋura. Yo, ŋanapurrunydja ŋuli ŋunhi djäma, ŋunhi ŋanapurruway ŋuli guyaŋirri yanapi ŋamakurru', yurru nhenydja ŋuli ŋunhiyi yätj ḻakarama warray yana wal'ŋu mirithirri warray, balanyara warray biyaku ŋuli dhukun'mirri dhomala, biyapulnha wal'ŋu buŋgan‐ḏumurruna barrpa'na. Yo, ŋuriŋi ŋanapurruŋgala yätjthunydja yukurra djaw'yunna‐wala yana ŋanapurrunha, balanyarana bitjan ŋanapurrunydja man'tjarr bo'yunara, ḏaŋgalkmaranhara watawuŋu. 7 Yakana ŋula waŋganydhu ŋuli yukurra bukumirriyama nhuna ŋäŋ'thun guŋga'yunarawunydja; ŋanapurrunydja ŋuli yukurra yana ḻayḻayyunna ŋula nhäŋurana malaŋuŋura, yakana ŋula waŋgany yolŋu bira'yun ŋuli yukurra ga ralparalpa nhina, bitjan ŋayi yurru nhuna mulka. Bala nhenydja ŋunhi buku‐yaw'yunmina nhunapinyay nhe, gonha'yurrunana ŋanapurrunha, bala nhe dhayuŋaranydja ŋanapurrunha ŋunhiwalana ŋanapurruŋgalay yätjlilina wal'ŋu romlili, märr yurru ŋanapurruŋgunydja ŋunhiyina yätjnha wal'ŋu buŋgawa.

8 Garray, nhenydja ŋanapurruŋgu bäpa'mirriŋu. Ŋanapurrunydja dhuwala balanyara biyaku ŋuli dhoḻu, ga nhenydja balanyarana bitjan djämamirrina nhe ŋurikiyi dhoḻuwu; nhe ŋanapurrunhanydja djäma nhepi, nhokalay nhe goŋdhu. 9 Garray, yakana ŋanapurruŋgu mukthurranydja‐wala ŋaramurrthiya; yaka guyaŋiya biyaka liŋgu ŋanapurruŋgu yätj malanha. Nhäŋa ŋanapurrunhanydja mel‐wuyunaramirriyu, liŋgu ŋanapurrunydja dhuwala nhuŋuway yolŋu walala.

10 Garray, ŋunha nhuŋu ŋunhi dharrpalnydja wal'ŋu wäŋa liŋguna ḏaw'‐ḏawyurrunana buḻwaŋ'maranharana, ŋorra yukurra yolŋumiriwnha yana. 11 Ŋanapurruŋgu bäpa'mirriŋunydja walala ŋuli yukurranha buku‐ŋal'yuna ŋunhiliyi ḻatju'ŋura wal'ŋu nhokalay Buṉbuŋura, ga ŋunhayi wäŋanydja Buṉbunydja liŋguwuynha dhuŋgur'yunarana ŋurikiŋi gurthawuŋuna nhäranharana, ga liŋguna nhä malanha ḻatju'mirrinydja dhikanydja nhäranana warrpam'nha buwayakthinana. 12 Buku‐djulŋi Garray, nhätha nhe yurru ŋanapurrunha guŋga'yundja? Nhaltjan nhe yurru yulŋunydja? . . . mukthun yana nhina yukurra dhäruk mukthun? Mukthun nhe yurru ŋanapurrunha dhä‐ḏir'yun gupaḏalkuma?

<- YITJAYAWUŊU DHÄRUK 63YITJAYAWUŊU DHÄRUK 65 ->