1 IOANES 4

Dahat na walar ira poropet

1 Ira bilai na tasigu ta Karisito a haleng ira poropet bisbis diet ta haan harbasiai tano ula hanua. Io, waak muat nurnur ta ira tunatuna bakut ing diet tangai bia no Tanua ta Kalou i hasasei diet taring linga. Senbia muat na walar diet wara nunurei bia Kalou i tar ra nianga ta diet bia taia. 2 Ma i tale muat bia muat na nas kilam baa no Tanua ta Kalou narako ta tiga tunatuna ta ira nuna nianga. Siga tikai i hinawas palai bia Iesu Karisito ga hanuat ukai ma bia ga hanuat a tunatuna ia, ma i hinawas palai hua, io, muat na nunurei bia no Tanua maram ta Kalou i kis tana. 3 Iasen bia siga tikai i harhus sasei Iesu, io, no Tanua maram ta Kalou pai kis tana. Taia. I kap mon no tanua tano ebar tane Karisito. Muat ga hadadei bia ira ebar ta Karisito na hanuat. Ma tutuna, kaiken um diet ta hanuat taar kai ra ula hanua.

4 Ira natigu gar ta Karisito muat gar ta Kalou ma muat ta bul hasur kaikek ra mangana tunatuna tikai ma ira nudiet hausur kanong nong i kis narako ta muat i tamat ta Satan nong i kis tano ula hanua. 5 Diet gar tano ula hanua, io hua, diet ianga makai ra ula hanua ma no ula hanua i taram diet. 6 Dahat gar ta Kalou ma siga tikai i nunurei tar Kalou na taram dahat. Senbia siga tikai nong pai gar ta Kalou pa na taram dahat. Hokaiken ing dahat na nas kilam ira tunatuna ing no Tanua ta ira tutuna ta Kalou i kis ta diet, ma diet ing diet kap ra tanua na bisbis.

No harmarsai ta Kalou ma no nudahat harmarsai

7 Ira bilai na tasigu ta Karisito i tahut bia dahat na marsei hargilasanei dahat kanong no magingin wara tar harmarsai, ia maram ta Kalou. Ma siga tikai i tar harmarsai, a nati Kalou ia ma i nunurei tar Kalou. 8 Siga tikai pai tar ra harmarsai, pai nunurei Kalou kanong ira tintalen bakut ta Kalou, a tintalen na harmarsai ma ra nemnem ukai ta dahat. 9 Ma Kalou ga haminis no nuna harmarsai ma no nuna nemnem uta dahat hoken: ga tulei sei no kapawena natina ukai tano ula hanua wara halhalon dahat. 10 Ma a mangana linga sa iakan ra magingin na harmarsai tikai ma ra nemnem? No suruna pai hoken, bia dahat ta nem Kalou. Taia. Senbia no suruna bia Kalou ga marsei dahat ma ga nem dahat, ma ga tulei sei no Natina, a hartabar ia uta ira nudahat sakana magingin wara hauhau no ngalngaluan gar ta Kalou. 11 Ira tasigu ta Karisito ing bia Kalou ga marsei dahat hua, io, i takodas bia dahat mah dahat na marsei hargilasanei dahat. 12 Taia ta tikai pai nas baa Kalou. Taia. Sen ing bia dahat marsei hargilasanei dahat, io, Kalou i sala kis taar ta dahat ma no mangana harmarsai gar ta Kalou i ta kidilona narako ta dahat.

13 Dahat nunurei bia dahat sala kis taar tana ma ia i sala kis taar ta dahat hoken, kanong i ta tar no Tanuana ta dahat. 14 Ma Mama ga tulei no Natina ukai bia ia no Tena Halon tano ula hanua. Mehet gata nas iakan ma mehet hatutuna ia ma ira numehet hinhinawas ta muat. 15 Siga tikai i haut bia Iesu ia no Nati Kalou, io, Kalou i sala kis taar tana ma ia i sala kis taar ta Kalou. 16 Ma dahat ta kilinganei no harmarsai ma no nemnem gar ta Kalou uta dahat ma dahat nuruan iakano nuna harmarsai ma no nuna nemnem tupas dahat.

Ira tintalen bakut ta Kalou, a tintalen na harmarsai tikai ma ra nemnem ukai ta dahat. Ma siga tikai i sala kis taar ta iakano mangana nilon i sala kis taar ta Kalou ma Kalou i sala kis taar tana. 17 Io, dahat na kis na balamasa tano bung na warkurai kanong dahat hoing Karisito kai ra ula hanua. Ma ing bia dahat na kis na balamasa i haminis bia no nuna harmarsai ta dahat i kidilona ma no nudahat nemnem tupas ia i kidilona mah. 18 Ing dahat nem ia hua, ma ia mah i nem dahat, pai tale bia dahat na burut. Taia. Ing dahat nem tutun at ia ma ia i nem tutun dahat, iakano magingin i sala kapkap sei no bunurut. Io, ing bia tikai i burut, iakan ra magingin na nemnem pai kidilona taar tana kanong no bunurut i kis tikai ma ra harpidinau. 19 Io, dahat nem um ia kanong ia ga luena nem dahat. Ma dahat marsei ira mesa kanong ia ga luena marsei dahat. 20 Ma ing bia tikai na tangai bia, “Iau nem Kalou,” senbia i malentakuanei no tasina narako ta Karisito, io, a tena bisbis ia. Ma i nanaas bia a tutuna iakan kanong siga tikai pai nem ira mes na mataniabar gar ta Kalou ing i ta nas tar diet, io, pai tale bia na nem Kalou nong pai nas baa ia tiga pakaan. 21 Ma dahat kap iakan ra warkurai makaia ta Karisito, bia siga tikai i nem Kalou na marsei no tasina ta Karisito.

<- 1 IOANES 3 1 IOANES 5 ->