Link to home pageLanguagesLink to all Bible versions on this site
14
No Iisaa selliniri gorko uppuɗo

1 Waɗiino e ley ɲalaande fowteteende wootere, Iisaa ana wonnoo e galle hooreejo Farisa'en gooto faa ɲaama. Tawanooɓe ton ɓee ngattani mo hakkille 2 kammari neɗɗo uppuɗo ana tawanoo ɗon. 3 Iisaa haaldi e jannginooɓe Sariya e Farisa'en, wii:

—Sellinde ɲawɗo ley ɲalaande fowteteende, ana dagii naa dagaaki?

4 Ɓe fuu, ɓe mbii teen. E oon wakkati, o memi ɲawɗo oo, o sellini ɗum, o yoppiti ɗum. 5 Caggal ɗum, o wii ɓe:

—Homo e mon ɓiyum naa ngaari mum saamata e ɓunndu waasa yaltinde ɗum ɗon e ɗon, fay so ɗum ɲalaande fowteteende?

6 Ɓe ndonki jaabaade mo e majjum.

Haala suɓaade joolle e noddude yimɓe

7 Nde Iisaa yiinoo noddaaɓe ɓee ana cuɓoo joolle ɓurɗe teddude ndee, o waajii ɓe, o wii:

8 —So a noddaama kuurtungu, pati jooɗa e joonnde ɓurnde teddude. Sabi ɓurɗo ma teddude ana waawi warde, 9 nodduɗo on oo wara, wiye: «Hokku oo ɗoo joonnde ndee!» Nden, a yaagoto jooɗoyaade e joonnde ɓurnde leyɗude ndee. 10 So a noddaama kuurtungu, jooɗoya caggal, yalla nodduɗo ma oo ana wara, wiye: «Giɗo, heettu yeeso gaa!» Nden, ɗum laatante teddungal yeeso noddaaɓe ɓee fuu. 11 Sabi mawninkiniiɗo fuu, leyɗinte, leyɗinkiniiɗo teddinte.

12 O wii nodduɗo mo oo duu:

—So aɗa nodda yimɓe bottaari naa hiraande, pati noddu giɗiraaɓe naa banndiraaɓe naa sakiraaɓe naa taakallemme'en maa tawaaɓe yo arsukunte'en. So ɓe noddite, ɗum laatoo mbarjaari maa. 13 So a waɗii waliima, noddu misikiina'en e wooyɓe e bonnguuɓe e wumɓe. 14 Nden, a welan hoore, sabi ɓeen ngalaa ko njoɓire, a yoɓete ɲannde immital fooccitiiɓe.
Banndol haala waliima

15 Gooto e ɲaamooɓe ɓee, nde nani haala kaa ndee, wii mo:

—Ɲaamoyoowo ley Laamu Laamɗo, welii hoore.

16 Iisaa wii mo:

—Gorko gooto waɗiino waliima, noddi yimɓe faa heewi. 17 Nde ɲaamdu nduu tilinoo ndee, o neli kaadime makko to yimɓe ɓee, wiya: «ngaree, waliima oo lanndinike.» 18 Ɓe fuu, gooto gooto, ɓe puɗɗi ujaade. Gooto wii: «Mi soodii ngesa, ana tilsi mi yaha mi yiyoya nga, njaafo-ɗaa kam.» 19 Goɗɗo wii: «Mi soodii ga'i demooje sappo e jale sari joy. Miɗo yiɗi hornoyde ɗi, njaafo-ɗaa kam.» 20 Goɗɗo kasen wii: «Mi jommbaajo, ɗum saabii so mi heɓataa warde.» 21 Kaadime oo warti, haaltani ɗum kalfaaɗo mum. Oon bilaa, wii mo: «Yaa law ley boli e dinngiraaji ngeenndi ndii, noddoyaa misikiina'en e wooyɓe e wumɓe e bonnguuɓe.» 22 Kaadime oo warti, wii: «Kalfaaɗo, ko mbii-ɗaa koo fuu waɗaama, kaa faa jooni yolannde ana heddii.» 23 Kalfaaɗo oo wii kaadime oo: «Yaa dow ɗati jaajuɗi e paaɗuɗi. Mo keɓu-ɗaa fuu, ndoolɗinaa ɗum wara naata, yalla suudu am nduu ana huuɓa. 24 Sabi miɗo wiya on: fay gooto e ɓe noddunoo-mi ɓee meeɗataa ɲaamdu am.»
No neɗɗo laatortoo taalibbo Iisaa

25 Yimɓe heewɓe ana njaada e Iisaa. O yeeccitii, o wii ɓe:

26 —Garɗo e am fuu, sinaa mi ɓurana ɗum inna mum e baam mum e jom suudu mum e sukaaɓe mum e miɲiraaɓe mum e mawniraaɓe mum, mi ɓurana ɗum fay kaɲum e hoore mum. So wanaa ɗum, joomum waawaa laataade taalibbo am. 27 Kasen duu, mo ɓamaali leggal mum bardugal jokka e am fuu, waawaa laataade taalibbo am. 28 So won muuyɗo e mon mahude suudu toowndu, wanaa joomum jooɗoto tafon, hiisoo ko hasindini e mum, ƴeewa so ana jogii ko biltata ɗum naa? 29 So wanaa ɗum, so joomum diidii taɲɲaali, jiiɗo mo fuu jalan mo, 30 wiya: «Ƴeewee oo neɗɗo diidii, ronkii taɲɲude.» 31 Kasen, so kaananke yehii faa haɓoya e kaananke goɗɗo, o miilataako tafon yalla worɓe ujunaaji sappo ana mbaawi jaɓɓaade worɓe ujunaaji noogay faa kaɓa e mum? 32 So mo waawaa jaɓɓaade ɗum, o waɗan e mum nelaaɓe gila yottaaki ɓadaaki, faa jam waɗa hakkunde maɓɓe. 33 Hono non, fay gooto e mon waawaa laataade taalibbo am so yoppaali ko jogii fuu.

34 Lamɗam ana moƴƴi, kaa so ɗam ŋoottii lammude, koɗum lamminta ɗam kasen? 35 Walaa fuu ɗo ɗam waawata naftoreede, wanaa e leydi, wanaa e birgi. Ɗam tippete sella.

Jom nowru fuu yo nanu.

<- Luuka 13Luuka 15 ->