Jisasanya Kaiminingi Dupame Baa Tungi Napiamino Doko

1 Maitakao Juu dupame Jisasa pyao kumasalanya kaitini kutiaminosa, baa Judia paeyala naeyatoo lao masetala, yuu Galali dokonya iki paeyao katea. 2 [~1~]Dopa piamopa Juu dupa sele andanya paleami gii doko masoo nee andake nenge gii doko ipanya tengesa pia. 3 Dokopa Jisasanya kaiminingi dupame baa lamaiyoo, “Embanya disaipolo dupame apata embanya kalai pilyino dupa kandena, yuu dake yakinatala Judia puu. 4 Aipumape, endakali mendeme baa panao katapuli lao masilya dokome kalai mende pilya doko yalo pyoo napingi. Dopana, embame kalai dutupa pitino doko, emba tange panasoo isa yuu dakenya endakali dupame kandena panao pipi” leami. 5 (Baanya kaiminingi dupame apata baa tungi napiami dokonya dopa leami.) 6 Dokopa Jisasame dokaita lamaiyoo, “Nambanya gii doko ipa naelyamo. Dopaka doko, nyakamanya gii doko koteaka lao epelyamo. 7 Isa yuu dakenya endakali dupame nyakama imbu nakaeyapenge. Endakali dupame pingima dupa koo pingimana lao nambame panao lamaipusa, dupame namba imbu kaelyamino. 8 Dopa pilyaminona, nyakama nee andake doko nala lalyoo pupa. Nambanya gii doko ipa naelyamo dokonya, indupa namba nee andake doko nala lalyoo napelyona” lea. 9 Pii dutupa dokaita lamaitala, baa Galali yuu dokonya katao kaeya.

Nee Andake Nenge Gii Doko Kandao Nyala Peamo Doko

10 Baanya kaiminingi dupa nee andake doko nala Jerusalema pateaminopa, maita-pyao Jisasa baa endakali mendeme nakandena lao yalo pyoo peami dokonya peaka. 11 Nee andake dokonya nao kateaminopa, Juu dupame Jisasa baa anja kalyape lao tipa pyoo kutiami. 12 Kutiaminopa endakali kambu dupame Jisasanya lao kakateame pii longo leami. Yangi dupame baa akali epe mendena leaminopa, yangimi baame endakali kambu dupa minakasilyamona leami. 13 Dopaka doko, endakali dupame Juu dupa paka kaeyami dokonya, endakali mendaipi mendeme baa akali dokona lao, panao laa naeya.

14 Nee andake nenge gii dutupanya kainasa pyakameaminopa, Jisasa lotuu anda nee nyetae kamapu dokonya pupala, baame tee pyao mana lamaiya. 15 Mana lamaiyamopa Juu dupa walu latala lao pituu, “Akali dake sukulu laa naengena, aipa petala mana longo dupa nyia laa-kanjemape?” leami. 16 Dopa leaminopa Jisasame dokaitanya pii yanu pyakamaiyoo, “Nambame mana langilyo dupa nambanya daa. Mana dupa namba puu lea Akali dokonya. 17 Nambame mana lelyo dupa Goteme dimupa lelyepe, nambanya kyetome lelyepe lao, Gotenya masingili pyoo kalai pitoo lao maseta endakali dokome kandata. 18 Endakali mendeme baanya kyetome pii lelya dokome, baa tange kenge andake nyotoo lao lenge. Dopaka doko, endakali mendeme baa epena leamo akali doko kenge andake nyina lao kiningi pii lenge. Endakali doko-kisa mana koeyapae mende nasingi. 19 Mosesame loo dupa nyakama nandiape? Loo dupa nyakama diaka doko, nyakamanya mendaipi mendeme Mosesanya loo dupa wata-minala naengema. Dopana, nyakamame aipuma namba pyao kumasepenge kaitini kutilyamipi?” lea. 20 Dopa leamopa endakali kambu dupame yanu pyao, “Emba pyao kumasepenge kaitini mende apimi kutilya? Emba-kisa imambu koo mende palelyamona” leami. 21 Dopa leaminopa Jisasame dokaita lamaiyoo, “Nambame kalai mendai pipu doko kandatala, nyakama pitaka walu lao paka kaelyamino. 22 [~2~]Yanu kepenge mana doko nyakamame wata-minalapale lao Mosesame setekea. (Mana doko kiningi Mosesame setala naeya. Nyakamanya yumbange dupame mana doko seteami.) Tenge dokonya, Sambata gii dokonya nyakamame wane ane dupa yanu kepengema. 23 [~3~]Mosesanya loo dupa nyakamame yalala naeyamana lao masetala, Sambata gii dokonya wane ane dupa yanu kepengema. Dopa pingima doko, nambame Sambata gii dokonya akali mendenya yonge doko pitaka auu pisakamaipu doko, aipuma nyakamame namba imbu kaelyami? 24 Nyakamanya lengeme kisa kandao yapala naenya, mana tolatae dokome yapalapape” lea.

Jisasa Baa Kraisa Dokope Leamino Doko

25 Dokopa Jerusalema tange mendapuame lao pituu, “Pyao kumasalanya kutilyamino akali doko dake kandamuape? 26 Baame dakenya katao pii lao panao katamupa, Juumanya isingi akali dupame baa mende lamaiya naelyamino doko, baa Kraisa doko-lamona lao kiningi masetami aipa? 27 Naimame baa yuu dokonya tangena lao masilyamano. Dopaka doko, Kraisa doko ipatamopa, endakali mendaipi mendeme baa anja tangepe lao masala naeyatana” leami. 28 Dopa leaminopa, lotuu anda nee nyetae kamapu dokonya katao Jisasame puu lao dapa lao mana lea: “Namba yuu dosa tange, akali dokona lao nyakamame kandengema. Dopaka doko, namba tangeme ipatoo latala naepeo. Namba puu lea Akali kiningi pii lenge doko nyakamame nakandengema. 29 Namba baa-kisa katenge dokonyana, nambame baa kandenge. Baame namba isa yuu dakenya puu leamosa epeona” lea. 30 Dopa leamosa Juumanya isingi akali dupame baa anjepenge kaitini kutiamiaka doko, baanya gii doko ipa naeya dokonya, endakali mendeme baa minala naeyami. 31 Dokopa endakali kambu kateami dokonya endakali longome baa tungi pyatala lao pituu, “Kraisa doko ipupala, akali dakeme mirakolo pilyamo dupa ita minao pitape?” leami.

Kutatamiaka Doko Angi Kanja Naeyatamina Leamo Doko

32 Endakali kambu dokome Jisasanya lao kakateame pii leaminopa, Parasi dupame siami. Sepala Parasipi, prisa mupapi dupame pii latala, Juumanya yanda singi mendapuame Jisasa anjoo nyala pena leami. 33 Dokopa Jisasame lao pituu, “Namba nyakama-pipa gii kuki iki katapala, namba puu lea Akali doko kalyamo dokonya patoo. 34 Nyakamame namba kutatamiaka doko, angi kanja naeyatami. Namba katato dokonya nyakama kapa pao naipatamiakana” lea. 35 Dopa leamopa Juu dupame nyakama-lapo laloo pyoo, “Naimame nakanjepale lao baa anja paanya lelya? Naima tata mendapu yuu waka dupanya Giriki dupa-pipa kalyamino dupanya, Giriki dupa mana lamaiya paanya lelyape? 36 Naimame baa kutatamiaka doko angi kanja naeyatamina lelyamo pii dokopa, baa katato dokonya naima kapa pao naipatamina lelyamo pii dokopa, dolaponya tenge doko aipa pyoo lelyape?” leami.

Lete Katenge Endaki Doko Lyoo Ipatana Leamo Doko

37 [~4~]Nee andake nenge dokonya gii etao doko, gii andake mende. Gii dokonya Jisasa toeya katapala puu lao, lao pituu, “Endakali mende endaki nanu kaeyateno doko, namba kalyo dakenya endaki nala ipupi. 38 [~5~]Endakali mendeme namba tungi pyatamo doko, Gotenya pii pepa pyapae singi dokonya lapae singili pyoo, ‘Endakali dokonya mona andaka pituu, lete katenge endaki doko lyoo ipatana’ ” lea. 39 Baa tungi pyatami endakali dupa Spirita doko nyetamina lao masetala, baame lea doko Spirita doko lao lea. Gii dokopa Jisasa baa kenge andake nyepala naeya dokonya, Oli Spirita doko pyandala naeya.

Kraisa Tungi Piamipi Napiamipi Dupa Wakale Pyaloo Piamino Doko

40 Jisasame pii leamo doko sepala, endakali kambu kateami dokonya longome lao pituu, “Kiningi, akali dake Propeta ipatana latae doko-lamona” leami. 41-42  [~6~]Endakali yangi dupame lao pituu, “Baa Kraisa doko-lamona” leaminopa, yangimi lao pituu, “Dapitanya puu dokonya Kraisa doko ipatana lao Gotenya pii pepa pyapae singi dokonya pyapae singi. Baa Dapitanya taono Betelema dokonya manditana lao pepa pyapae singiaka. Dopa lao pepa pyapae singi doko, yuu Galali dokonya Kraisa doko kapa pao manditape?” leami. 43 Dopa latala, Jisasa mambele endakali kambu doko wakale pyaloo piami. 44 Endakali yangi dupame baa anjemana lao masiamiaka doko, dupanya mendaipi mendeme baa minala naeyami.

Juu Dupame Jisasa Tungi Napiamino Doko

45 Dokopa prisa mupapi, Parasipi dupa peteami dokonya yanda singi dupa pilyiaminopa, dokaitame yanda singi dupa lamaiyoo, “Aipuma nyakamame Jisasa anjetala laminao naepelyamipi?” leami. 46 Dokopa yanda singi dupame yanu pyao, “Akali dokome pii lelyamoli pyoo, yuu mendaipi mende endakali mendeme naleana” leami. 47 Dopa leaminopa Parasi dupame dokaitanya pii yanu pyakamaiyoo, “Baame nyakama apata minakaseta aipa? 48 Isingi akalipi, Parasipi dupanya mendaipi mendeme baa tungi pilyamipi? 49 Endakali kambu dakeme Mosesanya loo dupa masala naelyamino dokonya, Goteme dupa koeyasetana” leami. 50 [~7~]Dopa leaminopa Parasi dupanya mende, Nikodimasa lenge doko, kuka gii mendenya Jisasa kanja pea dokome dokaita lamaiyoo, 51 “Endakali mendeme koo pita dupa auu pyoo kandao nyala naenya, baa koeyapya-lamona lapape lao naimanya loo dupanya lapae singipi?” lea. 52 Dokopa dokaitame baanya pii yanu pyakamaiyoo, “Emba apata Galali tangepe? Galali tange propeta mende sakatao kateana lapae nasilyamona, pii pepa pyapae singi dupa itaki pyao kandape” leami. 53 Dokopa endakali dupa pitaka mendai-mendai lao nyakamanya andaka peami.

<- Jone 6Jone 8 ->