Jisasa Malunya Sakateamo Doko

1 [~1~]Sande yongama wamba utu dokonya, Maria Magadala tange doko Jisasa malu doko kanja pea. Pupala kandeamopa, malu kambu dokonya kaname piti petae doko nyoo kapya latae siamo kandea. 2 Kandatala baa alo pyao pao Saimone Pitapa, disaipolo mende Jisasanya mona setenge dokopa, dolapo lamaiyoo, “Kamongo doko malunya lopao nyalamini-lamo doko, nyoo anja setalamipi lao naimame masala naelyamanona” lea. 3 Dopa lateamopa Pitapa, disaipolo mende dokopa, dolapo sakatatala malu dokonya peambi. 4 Disaipolo dolapo alo pyao malu dokonya tole peambinopa, disaipolo mende dokome Pita nyoo maita pyatala, baa wambao malu dokonya pyakamea. 5 Pyakamatala baa angi kolandala naenya elyo pyao kandeamopa, lapalapa kyeo lapae dupa tata lapae sia. 6 Saimone Pita maitanya epea ipao malu dokonya andakote kolandatala kandeamopa, lapalapa kyeo lapae dupa tata lapae sia. 7 Lapalapa kepapae mende Jisasanya aiyomba yaki pyakamaiyami doko lapalapa yangi dupa-pipa pyasoo nasia. Doko waka mendasa lakapae sia. 8 Dokopa disaipolo mende malunya wambao pea dokome apata malunya kolandao kandatala, kiningi Jisasa baa sakatalame-lamo lao masia. 9 (Jisasa baa kumapala sakatapengena lao Gotenya pii pepa pyapae singi dupa disaipolo dolapome gii dokopa masala naeyambi.) 10 Dopa petala disaipolo dolapo nyakambanya andaka pilyiambi.

Maria Magadala Tange Dokome Kandena Lao Paneamo Doko

11 [~2~]Dokopa akali dolapo pilyiambinopa, Maria baa malu kambu dosa kamaka ee lao katea. Ee lao katao pongatala malunya elyo pyao kandea. 12 Kandeamopa, enjele lapoma yonge pee kyeo lapae pingi mendalapo peteambino kandea. Mende doko Jisasanya aiyomba seteami panda dokonya peteamopa, mende doko moko seteami panda dokonya petea. 13 Dokopa enjele dolapome Maria lamaiyoo, “Enda, emba aipuma ee lelyepe?” leambi. Dokopa baame enjele dolapo lamaiyoo, “Nambanya Kamongonya yonge doko nyalamini-lamo doko, nyoo anja setalamipi lao namba masala naelyona” lea. 14 Dopa latala, baa kapilyetala Jisasa kateamo kandea. Dopaka doko, akali doko Jisasa-lamo lao nakandea. 15 Dokopa Jisasame baa lamaiyoo, “Enda, emba aipuma ee lelye? Emba api kutilyipi?” lea. Dopa leamopa, akali doko ee isingi doko-lamo lao masetala Mariame baa lamaiyoo, “Akali Andake, embame akali dokonya yonge doko nyoo mendasa setateno doko, nambame baanya yonge doko nyoo patoo, embame dosa setalona lao namba langipoko” lea. 16 Dopa leamopa Jisasame baa lamaiyoo, “Maria!” lea. Dokopa Mariame Jisasa enomba maitala lao pituu, “Rabonai!” lea. (Rabonai dokonya tenge doko, Mana lenge.) 17 Dokopa Jisasame baa lamaiyoo, “Nambanya Takange doko katenge ulunya patala naelyona, embame namba minatae sala naenya, emba pupala nambanya kaiminingi dupa lamaiyoo, ‘Nambanya Takange doko, nyakamanya Takangeaka, nambanya Gote doko, nyakamanya Goteaka doko katenge ulunya pelyo’ lelyamona lao lamaiyakala puu” lea. 18 Dokopa Maria Magadala tange doko pupala, Kamongo kanjona lao disaipolo dupa lamaiya. Dopa latala, Jisasame pii lamaina lea dutupa dokaita lamaiya.

Disaipolo Dupame Kandena Lao Paneamo Doko

19 [~3~]Sande dokonya niki landa piamopa disaipolo dupa kambu pyatae peteami. Juu dupa paka kaeyapala, kaitini dupa loko pyanyetala peteami. Peteami kaina dokonya Jisasa ipao kalyu pia. Kalyu petala dokaita lamaiyoo, “Nyakama mona yaepao pilyepape” lea. 20 Dopa latala baanya kingi kombepi, patali kombepi, dupa disaipolo dupame kandena lea. Dokopa disaipolo dupame baa Kamongo doko-lamo lao kandatala auu kaeyami. 21 Dokopa Jisasame dokaita dee lamaiyoo, “Nyakama mona yaepao pilyepape. Takangeme namba puu lea dopaka pyoo, nambame nyakama pupa lelyona” lea. 22 Dopa latala baame dokaita-kisa poo lanya pisetala lamaiyoo, “Oli Spirita doko nyakama nyalapa. 23 [~4~]Nyakamame endakali mendenya koo dupa kame sakamaitamino doko, koo dupa kame setaeyaka katata. Nyakamame endakali mendenya koo dupa pyakilyina kaeyatamino doko, pyakilyetaeyaka katatana” lea.

Tomasame Jisasanya Kombe Dupa Kandatala Tungi Piamo Doko

24 Jisasa epea dokopa, 12 disaipolo dutupanya Tomasa, kenge mende Pakao Mandipae lenge doko disaipolo dupa-pipa napeteami. 25 Maitakao Tomasa epeamopa disaipolo yangi dupame baa lamaiyoo, “Naimame Kamongo kanjemanona” leami. Dokopa baame dokaita lamaiyoo, “Baanya kinginya ŋili kombe dupa nambame kandatala, nambanya kingi kondeme dupa minao, baanya patali doko nambanya kingi kondeme minaowaka napito doko, nambame kiningi-lumu lao masala naeyatona” lea.

26 Yuu gii tukulapo pateamopa, Jisasanya disaipolo dupa andakote peteami. Gii dokopa Tomasa apata peteami. Anda kaitini dupa loko pyanyetae kateaka doko, Jisasa ipao dokaitanya kaina dokonya kalyu petala lao pituu, “Nyakama mona yaepao pilyepape” lea. 27 Dopa latala baame Tomasa lamaiyoo, “Embanya kingi kondeme nambanya kinginya kombe dupa minao kanda. Embanya kingimi nambanya patali kombe doko mina. Minatala embame kiningina lao masepe. Sambona lao masala naeyape” lea. 28 Dokopa Tomasame baanya pii yanu pyakamaiyoo, “Emba nambanya Kamongo, nambanya Gote dokona” lea. 29 Dopa leamopa Jisasame baa lamaiyoo, “Embame kandelyeno dokonya namba tungi pilyipi? Namba nakandao tungi pilyamino endakali dupa Goteme auu pisetae kalyaminona” lea.

Buku Dake Piamo Dokonya Tenge Doko

30 Jisasame baanya disaipolo dupanya enombanya mirakolo longo mendapu pia dupa pitaka buku dakenya pepa pyapae nasilyamo. 31 Dopaka doko, Jisasa doko Gote Ikiningi Kraisa doko-lamo lao nyakamame baa tungi pyatala, baanya kenge dokonya lete katenge doko nyetaminopa lao, mirakolo datupa pepa dakenya pyapae silyamo.

<- Jone 19Jone 21 ->