JOSUE 9

Gabaoʌ̃nebema ume bed̶ea b̶ʌped̶ad̶a

1 Maʌ̃ ewarid̶e hititarãda, amorreorãda, cananeorãda, perezeorãda, heveorãda, jebuseorã sid̶a Canaaʌ̃ druad̶e panabadjid̶aa. Jordaʌ̃ dod̶eba ʌ̃mãdau b̶aebariare jewed̶ad̶e, eyad̶e bid̶a ʌ̃cʌrʌ panabadjid̶aa, idjab̶a jũma Mediterraneo pusa orroare ʌ̃cʌrʌ panabadjid̶aa ab̶a Libanonaa. Ãdji bororãba ũrĩsid̶aa israelerãba Jericora, Hai sid̶a poyasid̶ada. 2 Maʌ̃ carea jũma ãbaa bed̶ea ausid̶aa Josue ume idjab̶a israelerã ume djõne wãni carea. 3 Baribʌrʌ heveorã Gabaoʌ̃nebemada maʌ̃ bororã ume bed̶ea aud̶aẽ́ basía. Ãdjia bid̶a ũrĩsid̶aa Josueba Jericod̶ebemarãra, Haid̶ebemarã sid̶a jũma quenabisida. 4-5 Maʌ̃ba crĩchasid̶aa israelerãra cũrũgad̶ida ãdji quenarãnamãrẽã. Maʌ̃ carea ʌ̃cʌrʌ edasid̶aa israelerãmaa wãnamãrẽã. Ãdjia edaped̶ad̶aba cacuad̶e jʌ̃bada soresorea b̶eada jʌ̃sid̶aa. Ãdjia jĩrũne jʌ̃bada sid̶a capirud̶aid̶a b̶eada jʌ̃sid̶aa. Maʌ̃be Josuemaa wãbʌrʌsid̶aa. Ãdji netata edebadara soresorea b̶eada burro ʌ̃rʌ̃ edesid̶aa. Uva b̶a tʌbada animarã e od̶ara capirud̶aid̶a b̶eada, paʌ̃ zarea ãrĩna sid̶a edesid̶aa. 6 Gilgal ẽjũãne Josue b̶ʌma jũẽnaped̶a Josuéa waabema israelerãa bid̶a nãwã jarasid̶aa:

–Daira drua tʌmʌba zebʌdaa. Quĩrĩã panʌa bãrãra dai ume bed̶ea b̶ʌd̶ida necai duanani carea.–

7 Maʌ̃ne israelerãba nãwã jarasid̶aa:

–Ãĩbẽrã bãrãra dairã caita panʌda jãwã panʌsicada. Mãwãra ¿sãwã bãrã ume bed̶ea b̶ʌd̶i?–[a]

8 Gabaoʌ̃nebemarãba nãwã panusid̶aa:

–Daira bãrã nezocarãa.–

Maʌ̃ne Josueba nãwã iwid̶isia:

–¿Bãrãra cairãda jãwã panʌ? ¿Sãmaʌba ze panʌ?–

9 Ãdjia panusid̶aa:

–Daira drua ãĩba tʌmʌba ze panʌa bãrã Ãcõrẽra trʌ̃ b̶ʌga b̶ʌ bẽrã. Daiba ũrĩsid̶aa idjia sãwã Egiptod̶e osida. 10 Idjab̶a ũrĩsid̶aa sãwã Jordaʌ̃ quĩrãrẽbema amorreo bororãda poyasida. Naãrã Sehoʌ̃, Hesboʌ̃ purud̶ebemada poyasia. Maʌ̃are Og, Basaʌ̃ druad̶ebema Astarot purud̶e b̶ad̶a sid̶a poyasia.[b] 11 Maʌ̃ bẽrã dai bororãba, dai druad̶ebemarã bid̶a nãwã jarasid̶aa: “Ota cod̶ira edad̶aped̶a israelerãmaa wãnadua. Ãdjirãa jarad̶adua dadjirãra ãdji nezocarã bẽrã necai b̶ead̶i carea ãdjirã ume bed̶ea b̶ʌ quĩrĩã panʌda.” 12 Acʌd̶adua, dai zesid̶a ewarid̶e naʌ̃ paʌ̃ra wad̶ibid̶a jʌ̃wʌ̃rʌ̃ã b̶easia baribʌrʌ id̶ira zareacuaped̶a jũma ãrĩcuasia. 13 Idjab̶a za panʌ uva b̶a tʌbada animarã e od̶a sid̶a enesid̶ad̶e wad̶ibid̶a djiwid̶ida b̶easia. Baribʌrʌ jũma dji sore bacuasia. Daiba cacuad̶e jʌ̃badara, jĩrũne jʌ̃ panʌ sid̶a dji sore bacuasia.–

14 Gabaoʌ̃nebemarãba paʌ̃ eneped̶ad̶ara israelerãba ʌ̃cʌrʌ cosid̶aa. Mãwã cawabisid̶aa Gabaoʌ̃nebemarã ume bed̶ea b̶ʌd̶ida. Baribʌrʌ mãwã od̶i naẽna Ãcõrẽa iwid̶id̶aẽ́ basía. 15 Maʌ̃ne Josuera Gabaoʌ̃nebemarã ume bed̶ea b̶ʌsia necai panani carea. Wãrãneba jarasia ãdjirãra bead̶aẽ́da. Waabema israelerã bororã bid̶a ab̶arida wãrãneba jarasid̶aa.

16 Ewari ũbea bad̶acarea israelerãba cawasid̶aa Gabaoʌ̃nebemarãba ãdjirãra cũrũgasid̶ada. Cawasid̶aa tʌmʌba zed̶aẽ́ basida, ãtebʌrʌ ãdjirã caita panabadada. 17 Ara maʌ̃da israelerãra ãdjirã caid̶u wãsid̶aa. Ewari ũbea babʌrʌd̶e ãdji puru b̶ead̶aa jũẽne wãsid̶aa. (Ãdji purura naʌ̃gʌrã basía: Gabaoʌ̃ araa, Capira, Beerot idjab̶a Quiriat-jeariʌ̃.) 18 Baribʌrʌ israelerãba Gabaoʌ̃nebemarãra bead̶aẽ́ basía, Ãcõrẽ trʌ̃neba dji bororãba wãrãneba jaraped̶ad̶a bẽrã ãdjirãra bead̶aẽ́da. Maʌ̃ carea israelerãba ara ãdji bororãda biẽ́ jara panesid̶aa. 19 Baribʌrʌ dji bororãba nãwã jarasid̶aa:

–Dadji israelerã Ãcõrẽ trʌ̃neba naʌ̃ Gabaoʌ̃nebemarã ume bed̶ea b̶ʌsid̶aa. Maʌ̃ bẽrã ãdjirãra bead̶acara panʌa. 20 Ãtebʌrʌ zocai b̶ʌd̶ia. Dadjirãba wãrãneba jaraped̶ad̶ara ĩjã od̶aẽ́bʌrʌ Ãcõrẽda dadjirã ume quĩrũya.–

21 Maʌ̃ba israelerã bororãba jarasid̶aa Gabaoʌ̃nebemarã zocai b̶ʌd̶amãrẽã. Baribʌrʌ ãdjirãra b̶ʌsid̶aa israelerã itea tʌbʌ b̶ʌá pananamãrẽã idjab̶a baido jue pananamãrẽã. Mãwã israelerã bororãba wãrãneba jaraped̶ad̶ara osid̶aa.

22 Josueba Gabaoʌ̃nebemarãra trʌ̃biped̶a nãwã jarasia:

–Bãrãba ¿cãrẽ cãrẽã dairãra cũrũgasid̶a? ¿Cãrẽ cãrẽã tʌmʌba ze panʌana asid̶a? ¡Bãrãra dairã caita panabadaa! 23 Bãrãba dairãda cũrũgaped̶ad̶a bẽrã dai Ãcõrẽba bãrãra biẽ́ erob̶aya. Id̶iba ʌ̃ta bãrãra dai nezocarãda panania. Dai Ãcõrẽ de itea tʌbʌ b̶ʌá panania idjab̶a baido jue panania.–

24 Ãdjia Josuéa nãwã panusid̶aa:

–Ne wayaad̶eba dairãba mãwã osid̶aa. Cawasid̶aa bãrã Ãcõrẽba idji nezoca Moisea jarasida dai drua bãrãa jũma diamãrẽã idjab̶a dairã jũma quenamãrẽã. Maʌ̃ bẽrã crĩchasid̶aa bãrãba dairãra jũma quenanida. 25 Dairãra bãrã jʌwaed̶a panʌa. Bʌa jipa oida crĩcha b̶ʌ quĩrãca odua.–

26 Mãwã jaraped̶ad̶a bẽrã Josueba israelerãa Gabaoʌ̃nebemarãra idu beabiẽ́ basía. 27 Baribʌrʌ ãdjirãra b̶ʌsia israelerã itea tʌbʌ b̶ʌá pananamãrẽã idjab̶a baido jue pananamãrẽã. Ãcõrẽa animarã babue diabada itea bid̶a mãwã o panesid̶aa. Wad̶ibid̶a mãwã obadaa Ãcõrẽba idji de obid̶ama.

<- JOSUE 8 JOSUE 10 ->