Kʋkɑlʋɣʋ 21

Ɩsɛɣɛlɩ nyǝ́mɑ kǝlʋɣʋ kɛ Kɑnɑɑŋ nyǝ́mɑ

1 Ḿpʋ́ɣʋ́ Kɑnɑɑŋ nyǝ́mɑ ɑwulɑɑ tɑɑ lɛlʋ, wei ɩ wɛ Alɑtɩ kɛ ilim mpǝtǝŋ tɔɔ tɔ, ɩ nɩɩwɑ sɩ Ɩsɛɣɛlɩ nyǝ́mɑ tɔŋɑ kɔntɛ nɑ Atɑlim mpɑɑʋ. Ɩlɛnɑ pɑ́ tii pɑ tɔɔ nɑ pɑ́ kpɑ́ pɑ tɑɑ lɛlɑɑ kɛ sɑlǝkɑ nyǝmɑ. 2 Ntɛnɑ Ɩsɛɣɛlɩ nyǝ́mɑ sɩɩ Tɑcɑɑ kɛ nɔɔsɩ sɩ: Ye n tʋ-wɛɣɛ tɑ niŋ tɑɑ, tɩɩ kpiisi pɑ ɑcɑlɛɛ tǝnɑŋnɑŋ.

3 Ɩlɛnɑ Tɑcɑɑ mʋ pɑ kʋsǝlǝmʋtʋ, nɑ pɑ́ kpiisi pɑ ɑcɑlɛɛ ɑnɩ ɑ tǝnɑ. Ɩlɛnɑ pɑ́ hɑ hɔɣɔlʋɣʋ ŋkʋɣʋ hǝtɛ sɩ Hoomɑ. Ncɑɑlɛ kɛ pɑ yɑɑ mpʋ nɑ pɑ tɛ tɑɑ.

Tʋmɑɑ ɑsɑɣɑɑ tɔm

4 Ḿpʋ́ɣʋ́ Ɩsɛɣɛlɩ nyǝ́mɑ kʋlɑ Hoo pʋɣʋ, nɑ pɑ́ kpɑɣɑnɑ sǝsǝncɑɑsɩ teŋku hɔɣɔlʋɣʋ mpɑɑʋ sɩ pɑ cɔlǝɣɩ Ɩtɔm tɛtʋ. Amɑ pɑ kpisɑ kɑntǝlʋɣʋ kɛ mpɑɑʋ tɑɑ. 5 Ɩlɛnɑ pɑ́ niki Ɩsɔ nɑ Moisi kɛ kʋntǝnɑʋ sɩ pepe tɔɔ kɛ́ pɛlɛ pɑ lǝsɑ-wɛɣɛ Icipiti tɑɑ sɩ, pɑ́ sɩ wʋlɑɣɑ tɛtʋ tɑɑ? Tɔɣɔnɑɣɑ yɑɑ lʋm fɛɩ, pǝyele wɑhɑlɑ kʋtɔɣɔʋ Mɑnnɑ nɑ́ lɩɩ-wɛɣɛ sɔŋ.

6 Ḿpʋ́ɣʋ́ Tɑcɑɑ tʋwɑ Ɩsɛɣɛlɩ nyǝ́mɑ kɛ tʋmɑɑ ɑsɑɣɑɑ, nɑ pǝ́ nyɑsɑ pɑ pɑɣɑlɛ nɑ pɑ́ sɩ. 7 Tǝnɑɣɑlɛ yǝlɑɑ lɛlɑɑ polɑɑ nɑ pɑ́ tɔ Moisi sɩ: Tǝ pǝntǝnɑ nyɑnɑ Tɑcɑɑ kɛ timpi tǝ kʋntǝnɑ-mɛ tɔ. Mpʋ tɔ, wiinɑ-ɩ nɑ ɩ́ hɑtǝlǝnɑ-tʋɣʋ tʋmɑɑ mpɛ. Ɩlɛnɑ Moisi nɑɑ sʋʋ-wɛɣɛ sǝlǝmǝnɑʋ. 8 Ntɛnɑ Tɑcɑɑ sɩ: Ɩ́ lu tʋm lɛɛsʋɣʋ kɛ nyǝɣǝlʋɣʋ kʋsɛɛmʋɣʋ, nɑ ɩ́ siki kpɑ́tʋ́ɣʋ́ kʋtɑɣɑlʋɣʋ nyʋɣʋ tɑɑ. Ye pǝ nyɑsɑ wei nɑ ɩ́ kʋsɩ ɩsɛ nɑ ɩ́ nyǝnɩ-kʋ, pɩɩ wɑɑ-ɩ.

9 Ḿpʋ́ɣʋ́ Moisi lɑpɑ ɩsɩɩ Tɑcɑɑ yɔɣɔtʋɣʋ tɔ. Nɑ pǝ́ nyɑsɑ wei nɑ ɩ́ nyǝnɑ-kʋ pǝ wɑɑ-ɩ.

Ɩsǝnɑ pɑ tɔmɑ tɔ hɑlǝnɑ Pisikɑ pʋɣʋ

10 Ḿpʋ́ɣʋ́ Ɩsɛɣɛlɩ nyǝ́mɑ tʋ mpɑɑʋ hɑlǝnɑ Opoti. 11 Pɑ kʋlɑ tǝnɑ, ɩlɛnɑ pɑ́ polo Yɛ-Apɑlim kɛ Mowɑpʋ ilim tǝlɩɩlɛ tɔɔ wʋlɑɣɑ tɛtʋ tɑɑ. 12 Pɑ lɩɩ tǝnɑɣɑ nɑ pɑ́ polo Selɛtɩ lɔɔʋ nɔɣɔ. 13 Pɑ kʋlɑ tǝnɑɣɑ nɑ pɑ́ polo Alǝnɔŋ pɔɣɔ ŋkɑ kɑ nyʋɣʋ wɛ Amoni nyǝ́mɑ tɛ, nɑ kɑ́ fɑkɩ wʋlɑɣɑ tɛtʋ hɔɣɔlʋɣʋ, nɑ pǝ́cɔ́ kɑ́ tɑkɩ Mowɑpʋ nyǝ́mɑ nɑ Amolii nyǝ́mɑ pɑ toŋɑ tɔ. 14 Pǝ tɔɔ kɛ́ pɑ yɔɣɔtɑ Tɑcɑɑ yoou tɑkǝlɑɣɑ tɑɑ sɩ: Fɑhɛpɩ kɛ Sufɑ tɛtʋ tɑɑ, nɑ Alǝnɔŋ lɔɔŋ 15 nɑ lɔɔŋ wei ɩ wɛ Alǝnɔŋ hɔɣɔlʋɣʋ tɔɔ kɛ́ Mowɑpʋ toŋɑ tɔɔ tɔ. 16 Pɑ lɩɩ tǝnɑɣɑ ɩlɛnɑ pɑ́ polo Lɔkɔ cɔlɔɣɔ timpi Tɑcɑɑ tɔmɑ Moisi sɩ: Kpeɣeli sɑmɑɑ, nɑ mɑ́ hɑ-wɛɣɛ lʋm tɔ.

17 Wɑɑtʋ ɩnǝɣɩ Ɩsɛɣɛlɩ nyǝ́mɑ mɑpɑ kɑwǝyɑɣɑ sɩ:

Lɔkɔ lʋm ɩ́ lɩɩnɑ kɑwilitɑsɩ.

18 Awulɑɑ nɑ kɑsɑɣɑmpiyɑ hulinɑ-ɩ nɑ pɑ kɑwulɑɣɑ kpɑtǝŋ.

Pɑ lɩɩ wʋlɑɣɑ tɛtʋ tɑɑ, ɩlɛnɑ pɑ́ tɑlɑ Mɑtɑnɑ. 19 Pɑ lɩɩ tǝnɑ nɑ pɑ́ polo Nɑhɑliyɛlɩ, tǝnɑ wɑɑlɩ kɛ́ Pɑmɔtɩ. 20 Pɑ lɩɩ tǝnɑ, ɩlɛnɑ pɑ́ polo Mowɑpʋ tɛtʋ tɛtɛkǝlɛ kɛ

Pisikɑ pʋɣʋ nyʋɣʋ tɑɑ nɑ wʋlɑɣɑ tɛtʋ tɔɔ.

Ɩsɛɣɛlɩ kǝlʋɣʋ kɛ Sihoŋ nɑ Oki

21 Ḿpʋ́ɣʋ́ Ɩsɛɣɛlɩ nyǝ́mɑ tilɑɑ nɑ pɑ́ heeli Amolii nyǝ́mɑ wulɑʋ Sihoŋ sɩ: 22 Yele nɑ tǝ fɑɣɑnɑ nyɑ́ tɛtʋ tɑɑ. Hɑpǝlɛ kɛ tɩɩ siɣisi, hɑlǝnɑ tǝ́ tɛsɩ nyɑ́ tɛtʋ. Tǝ kɑɑ hɛlɩ hɑlǝm yɑɑ lɛsɛŋnɑɑ tɑɑ, yɑɑ tǝ́ nyɔɔ lʋm.

23 Amɑ Sihoŋ tɑ tisi. Ḿpʋ́ɣʋ́ ɩ́ kuu ɩ yoolɑɑ tǝnɑ, nɑ ɩ́ kɑtɩ Ɩsɛɣɛlɩ nyǝ́mɑ kɛ Yɑhɑsɩ wʋlɑɣɑ tɛtʋ tɑɑ. 24 Ḿpʋ́ɣʋ́ Ɩsɛɣɛlɩ nyǝ́mɑ yoonɑ-ɩ. Nɑ pɑ́ lɛɛkɩ ɩ tɛtʋ tǝnɑɣɑ pǝ kpɑɣɑʋ Alǝnɔŋ nɑ pǝtɛɛ tɔɔ, nɑ Yɑpɔkɩ nɑ ɩsɔtɑɑ tɔɔ, kɛ́ Amoni nyǝ́mɑ toŋɑ koluŋɑ nɑ ilim tǝlɩɩlɛ tɔɔ. 25 Nɑ pɑ́ lɛɛkɩ Hɛsǝpɔŋ ɩcɑtɛ, nɑ pǝ cɔlɔ nyǝnɑ sǝkpenɑ nɑ pɑ́ cɑɣɑ. 26 Hɛsǝpɔŋ tǝnɑɣɑ Amolii nyǝ́mɑ wulɑʋ Sihoŋ kɑ wɛɛ. Ɩ kɑ yoonɑ Mowɑpʋ wulɑʋ kʋpǝŋ kɛ́, nɑ ɩ́ lɛɛkɩ ɩ tɛtʋ tǝnɑ. Hɑlǝnɑ pǝ yoosinɑ Alǝnɔŋ. 27 Hɑlɩ yonyoolɑɑ tʋ-tɛ nɑ yontu sɩ:

Ɩ́ kɔɔ Hɛsǝpɔŋ nɑ ɩ́ ŋmɑ́ Sihoŋ ɩcɑtɛ nɑ tǝ koluŋɑ.

28 Kɔkɔ yɑwɑ Hɛsǝpɔŋ.

Kɑ tʋlɑ Sihoŋ ɩcɑtɛ tɑɑ.

Kɑ nyɑɣɑ Aɑ kɛ Mowɑpʋ tɛtʋ tɑɑ.

Kɑ kpɛnnɑ Alǝnɔŋ ɩsɔtɑɑ sɔsɑɑ.

29 Mowɑpʋ, nyɑ́ tɔm wɛ wɑɩyo.

Tʋɣʋ Kemɔsɩ lɑɑlɑɑ mɛ, mǝ lepɑ.

Mǝ pǝyɑlɑɑ sewɑ, nɑ Amolii wulɑʋ Sihoŋ

nɑ́ɑ́ kpɑ mǝ ɑlɑɑ kɛ yomle.

30 Tǝ tɔwɑ Amolii nyǝ́mɑ kɛ nyǝmɑ́.

Tǝ wɑkǝlɑ Hɛsǝpɔŋ tɛtʋ tǝnɑ, hɑlǝnɑ Tipɔŋ.

Hɑlǝnɑ pǝ́ polo Nofɑ nɑ Mɛtǝpɑ tɔ, tǝ kpiisɑ pɑ tǝnɑɣɑ.

31 Ḿpʋ́ɣʋ́ Ɩsɛɣɛlɩ nyǝ́mɑ tɔɣɔ Amolii nyǝ́mɑ tɛtʋ. 32 Nɑ Moisi kʋsɩ feŋlɑɑ nɑ pɑ́ cɔɔ Yɑsɛɛ ɩcɑtɛ. Yoolɑɑ lɛɛkɑ-tɛ nɑ tǝ ɑcɑlɛɛ sǝkpenɑ. Pɑ tɔɣɔnɑ Amolii nyǝ́mɑ. 33 Pǝ wɑɑlɩ kɛ́ pɑ lɑɣɑsɑ mpɑɑʋ nɑ pɑ́ mǝŋnɑ Pɑsɑŋ tɔɔ. Ḿpʋ́ɣʋ́ tǝnɑ wulɑʋ Oki nɑ́ lǝsɑ ɩ yoolɑɑ tǝnɑ nɑ pɑ́ polo Ɩsɛɣɛlɩ nyǝ́mɑ yoonɑʋ kɛ Ɩtǝlei. 34 Ḿpʋ́ɣʋ́ Tɑcɑɑ heelɑ Moisi sɩ: Tɑɑ nyɑnɑ-ɩ. Mɑɑ tʋ ɩ́ nɑ ɩ yoolɑɑ nɑ ɩ tɛtʋ tǝnɑɣɑ nyɑ́ niŋ tɑɑ, nɑ ń lɑnɑ-ɩ ɩsɩɩ n lɑpǝnɑ Amolii nyǝ́mɑ wulɑʋ Sihoŋ wei ɩ kɑ wɛ Hɛsǝpɔŋ tɔ. 35 Nɑ Ɩsɛɣɛlɩ nyǝ́mɑ kʋ Oki nɑ ɩ pǝyɑlɑɑ, nɑ ɩ yoolɑɑ tǝnɑ. Ɩ tɑ yele pɑɑ kʋlʋm nɑ ɩ weesuɣu. Ɩlɛnɑ pɑ́ lɛɛkɩ tɛtʋ.

ƖSƐƔƐLƖ NYƎMA KƐ MOWAPƲ TƐTƲ TƐTƐKƎLƐ TAA

<- Kʋkɑlʋɣʋ 20 Kʋkɑlʋɣʋ 22 ->