Sɑmiyɛɛlɩ I 2

Anɑ sɛɛkɩ Tɑcɑɑ

1 Ḿpʋ́ɣʋ́ Anɑ sɑmɑ Ɩsɔ sɩ:

Mɑ yɔɔlǝɣǝnɑ Tɑcɑɑ wei ɩ wɑɑsɑ-m tɔ.

Ɩ hʋlǝsɑ mɑ lɑŋlɛ.

Ɩ kʋsɑ mɑ nyʋɣʋ, nɑ ɩ́ hɑ-m tomɑ.

Nɑ mɑ nɔɣɔ kuliɣinɑ mɑ kolontunɑɑ.

2 Tɑcɑɑ tike wɛnnɑ tǝnɑŋŋ.

Ɩ tike ntɛ́ kentulu

ɩ pɑɑsi Ɩsɔ nɔɣɔlʋ ɩ fɛɩ tɔtɔ.

3 Ɩ́ yele kɑlɑmpɑɑnɩ,

nɑ ɩ́ yele ɩsǝcɑʋ tɔm.

Tɑcɑɑ nyǝmɑ́ pǝ tǝnɑɣɑ.

Ɩɩ yeki ɩsɑɣɑtʋ nɑtǝlɩ.

4 Tɑcɑɑ cɛpɑ toŋtʋnɑɑ tɔɔŋ.

Amɑ ɑcɑmɑɑ nɑ́ nyɔɔ toŋ.

5 Ɩ tʋ hɑɣɑlɑɑ sɩ pɑ́ pɛɛkɩ mpi pɑɑ yɑnɑ tɔɣɔnɑɣɑ tɔ,

nɑ ɩ́ sʋsɩ kʋnyɔntʋnɑɑ kɛ toŋ.

Ɩ lɑpɑ nɑ kɑɑlʋlɑɣɑ lʋlɩ tɔm nɑɑtosompɔɣɔlɑɣɑ.

Ɩlɛnɑ ɑlʋllʋ nɑ́ɑ́ lɑŋ.

6 Tɑcɑɑ kʋɣʋnɑ, ɩnɩ ɩ feesiɣinɑ.

Ɩnɩ ɩ tisiɣinɑ ɑtɛtǝlɛ tɑɑ, nɑ ɩ́ lǝsǝɣɩ.

7 Ɩnɩ ɩ́ tʋɣʋnɑ kʋnyɔntʋtʋ yɑɑ toŋ.

Ɩnɩ ɩ́ tisiɣinɑ lɛlɑɑ nɑ ɩ́ kʋsǝɣɩ lɛmpɑ.

8 Tɑcɑɑ kʋsǝɣɩ lɑŋlʋ kɛ ɑtɛ mʋsʋɣʋ tɑɑ,

nɑ ɩ́ kʋsɩ kʋnyɔntʋ kɛ hute tɑɑ,

nɑ ɩ́ cɑɣɑsɩ pɑ́ nɑ sɔsɑɑ,

nɑ pɑ́ kɑɑ teeli kumte.

Ɩnɩ ɩ tǝnnɑ tɛtʋ kite,

nɑ tǝ tɔɔ kɛ́ ɩ sɩɩwɑ ɑntulinyɑ.

9 Ɩ tiikiɣi ɩ yǝlɑɑ nɑ ɩ́ kentiɣi pɑ tɔɔ.

Amɑ ɩ yeki nɑ ɑsɑɣɑɑ leki sǝkpɛtʋɣʋ tɛɛ.

Ɩsɔ ɑkɑɩtʋ pɑɑ fɛɩnɑ tɔnʋɣʋ tɑɑ ɑlɑɑfǝyɑ.

10 Tɑcɑɑ kɑ tisi ɩ kolontunɑɑ tɔɔ kɛ́ cɑlɑnɑɑ,

pɑ kɔŋ sɑɑlʋɣʋ kɛ yem kɛ́.

Ɩnǝɣǝlɛ kɑteŋɑ tǝnɑ hʋʋlʋ sɔsɔ.

Ɩ kɑ́ kpɑ wei ɩ lǝsɑɑ tɔɣɔ wulɑʋ, nɑ ɩ́ tʋ-ɩ toŋ.

11 Ḿpʋ́ɣʋ́ Ɩlǝkɑnɑ pɑ mǝlɑ kpente, nɑ pǝyɑɣɑ nɑ́ɑ́ sɑɑlɩ Tɑcɑɑ tǝmlɛ tɑɑ kɛ́ kɔtʋlʋ Ilii kiŋ.

Kɔtʋlʋ Ilii pǝyɑlɑɑ ɩsɑɣɑtʋnɑɑ

12 Ilii pǝyɑlɑɑ kɑ kɛ́ tɛtɛlɑtɑɑ kɛ́, pɑ tɑ pɑɑsǝnɑ Ɩsɔ kɛ́ pɑɑ pǝcɔ. 13 Nti nti pɑ lɑkɑɣɑ sɑmɑɑ tɔɣɔlɔ: Ye nɔɣɔlʋ hɑ Ɩsɔ kɛ́ kʋhɑʋ, kɔtʋlʋ tǝmlɛ tʋ puki sɑɑ wei pɑ tǝsɑ kʋhɑʋ nɑntʋ tɔɣɔ, nɑ ɩ́ tɔkɑ kelɑ tooso lɔɣɔlɑɣɑ sɔsɑɣɑ. 14 Ɩ tɑkɩ ɩlɛnɑ ɩ́ sɔ tiipee tɑɑ, nɑ pǝ sɔpɑ nɑntʋ kɛ ɩsǝnɑ, ɩ lǝsǝɣɩ kɛ́ nɑ ɩ́ ponɑ kɔtʋlʋ. Ḿpʋ́ɣʋ́ pɑ lɑkɑɣɑ Ɩsɛɣɛlɩ nyǝ́mɑ tǝnɑ mpɑ pɑ pukɑɣɑ Silo tɔ.

15 Hɑlɩ tǝmlɛ tʋ puki kɛnɑ pǝ́cɔ́ pɑ́ wɔ tɔtɛ nim, nɑ ɩ́ tɔ́ wei ɩ lɑpɑ kɔtɑɣɑ tɔ sɩ: Cɛlɑ kɔtʋlʋ kɛ ɩ nɑntʋ nɑ ɩ toŋ ɩ tɩ. Ɩɩ cɑɑ kʋtǝsǝtʋ. Lɛŋ kɛ ɩ cɑɑkɩ. 16 Ye kɔtɑɣɑ lɑtʋ tɔmɑ sɩ: Yele nɑ pɑ́ wɔ kpǝntɛ nim ɩlɛnɑ ń cosi timpi n cɑɑkɩ tɔ. Ɩlɛ tǝmlɛ tʋ cɔ sɩ: Aɑɩ, ye n tɑ cɛlɛ-m nɔɔnɔɔ, mɑɑ lɛɛkǝnɑ toŋ. 17 Ɩsɑɣɑtʋ sɔsɔɔntʋ ntǝɣɩ Ilii pǝyɑlɑɑ kʋkɑɣɑnɑ pɑ tɩ tɔm kɛ Ɩsɔ ɩsɛntɑɑ. Mpi tɔ, pɑ nyǝnɑɣɑ Tɑcɑɑ kɔtɑɣɑ kɛ yem kɛ́.

18 Pɑɑ nɑ Sɑmiyɛɛlɩ kɑ kɔɔsɑɑ tɔ, ɩ lɑkɑɣɑ Ɩsɔ tǝmlɛ kɛ́ nɑ ɩ́ suuwɑ kɔtǝlɑɑ tokiyɑ tɑkɑ ŋkɑ pɑ lʋʋwɑ kponkpontu toŋ nyǝntʋ tɔ.

Sɑmiyɛɛlɩ nyǝ́mɑ

19 Ye pǝnɑɣɑ sikɑɑ nɑ Anɑ pɑ puki kɔtɑɣɑ lɑpʋ, ɩ nyɑlǝɣɩ toko kɛ́ nɑ ɩ́ kpɛŋnɑ Sɑmiyɛɛlɩ. 20 Hɑlǝnɑ Ilii kooliɣi Anɑ nɑ ɩ pɑɑlʋ kɛ kʋpɑntʋ sɩ: Tɑcɑɑ ɩ́ lɑ nɑ ń hiki piyɑ nɑ sɩ́ lɛɛtɩ ŋkɑ n hɑ-ɩ ɩsǝntɔ tɔ kɑ lonte.

Ɩlɛnɑ pɑ́ mǝlɩ pɑ tɛ. 21 Tɑcɑɑ wɛ Anɑ wɑɑlɩ, ɩlɛnɑ ɩ́ lɑ teu nɑ ɩ́ lʋlɩ ɑpɑlʋpiyɑ kɛ tooso, nɑ ɑlʋpiyɑ kɛ nɑɑlɛ.

Nɑ pǝyɑɣɑ Sɑmiyɛɛlɩ nɑ́ɑ́ tɔŋnɑ pɩɩʋ kɛ Ɩsɔ tǝmlɛ tɑɑ.

Ilii kɑlǝnɑ ɩ pǝyɑlɑɑ ɑsɑɣɑɑ

22 Ilii kɑ kpɑtǝlɑɑ kɛ́ tǝkuŋkuŋku. Nɑ ɩ́ nɩɩkɩ mpi mpi ɩ pǝyɑlɑɑ lɑkɑɣɑnɑ Ɩsɛɣɛlɩ nyǝ́mɑ tǝnɑ tɔ. Nɑ ɩsǝnɑ pɑ hǝntɑɣɑnɑ ɑlɑɑ mpɑ pɑ lɑkɑɣɑ tǝmlɛ kɛ Ɩsɔ tǝyɑɣɑ nɔnɔɣɔ tɔ. 23 Ɩlɛnɑ ɩ́ tɔ-wɛ sɩ: Pepe tɔɔ kɛ́ ɩ lɑkɩ yɑɑsinɑɑ mpɛ pɑ tɑkɑnɑɑ? Yǝlɑɑ tɑɣɑsǝɣɩ-m mǝ ɩsɑɣɑtʋnɑɑ kɛ́. 24 Aɑɩ, mɑ pǝyɑlɑɑ, ɩ́ yele mpʋ, mǝ tɔmnɑɑ mpɑ Ɩsɛɣɛlɩ yǝlɑɑ heeliɣi-m mpʋ tɔ pɑ fɛɩ teu. 25 Ye yʋlʋ pǝntǝnɑ ɩ tɔɣɔntǝlɛ, ntɑnyɩ Ɩsɔ kɑ wii pʋntʋ. Amɑ ye Tɑcɑɑ kɛ pʋntʋ pǝntǝnɑɑ, ɩlɛ ɑwe sɛɛnɑ ɩ tɔɔ?

Amɑ pɑ tɑ nɩɩnɑ pɑ cɑɑ nɔɣɔ. Mpi tɔ, Tɑcɑɑ kɑ sɔɔlɑɑ sɩ ɩ kʋɣɩ-wɛɣɛ.

26 Nɑ pǝyɑɣɑ Sɑmiyɛɛlɩ nɑ́ɑ́ tɔŋnɑ pɩɩʋ, nɑ ɩ wɛ yǝlɑɑ nɑ Ɩsɔ kɛ́ teu.

Ɩsɔ yɔɣɔtɑ Ilii tǝyɑɣɑ nyǝ́mɑ sɑlǝkɑ tɔm

27 Ḿpʋ́ɣʋ́ Ɩsɔ yʋlʋ nɔɣɔlʋ ɩ polɑ Ilii kiŋ nɑ ɩ́ heeli-ɩ sɩ: Tɑcɑɑ yɔɣɔtɑɑ sɩ mɑ hʋlɑ mɑ tǝɣɩ mǝ cɔsɔ Alɔŋ, kɛ wɑɑtʋ wei ɩ́ nɑ ɩ nyǝ́mɑ pɑɑ wɛ Icipiti wulɑʋ tɛɣɛ yomle tɑɑ tɔ. 28 Ɩ́ nɑ ɩ lʋlʋɣʋ nyǝ́mɑ kɛ mɑ lǝsɑ Ɩsɛɣɛlɩ kpekɑ tǝnɑ tɑɑ sɩ, pɑ́ lɑ mɑ kɔtǝlɑɑ, nɑ pɑ́ suuki kɔtǝlɑɑ toko nɑ pɑ́ kpɑɑkɩ mɑ kɔtɑɣɑ tǝlɑtɛ tɔɔ nɑ pɑ́ wɔkɩ tulɑɑlʋnɑɑ. Hɑlǝnɑ mɑ́ hʋlɩ-ɩ timpi ɩ kɑ́ cosi kɔtɑɣɑ ŋkɑ kɔkɔ nyɑɣɑ kɑ tǝnɑ tɔ kɑ kpǝntɛ tɔɔ nɑ ɩ́ tɔɣɔ tɔ. 29 Pepe tɔɔ kɛ́ ɩ́ nyǝnǝɣɩ yem kɛ mɑ kɔtɑsɩ nɑ mɑ kʋhɑʋ ŋku mɑ sɩɩwɑ sɩ pɑ́ lɑkǝnɑ mɑ tǝyɑɣɑ tɑɑ tɔ? Ɩlɛ ɩsǝnɑɣɑ pǝ lɑpɑ sɩ Ilii ń seeki nyɑ́ piyɑ nɑ pǝ́ kǝlɩ mɑ? Nɑ ɩ́ tɔkɩ Ɩsɛɣɛlɩ nyǝ́mɑ tɔɣɔnɑsɩ kʋpɑŋsɩ nsi pɑ lɑpɑ kɔtɑsɩ tɔ, nɑ ɩ́ yooki cǝncǝmǝŋ? 30 Nyǝnɩ Ɩsɛɣɛlɩ Ɩsɔ Tɑcɑɑ mɑ, mɑɑ sɩɩwɑ sɩ, nyɑ́ cɑɑ tǝyɑɣɑ nɑ nyɑ́ lʋlʋɣʋ nyǝ́mɑ tǝnɑ kɑ́ lɑkǝnɑ mɑ kɔtʋɣʋ tǝmlɛ kɛ tɑm tɔɔ. Amɑ pǝnɛntɛ mɑ kʋ́ tǝlɛ. Mpi tɔ, wei ɩ tʋɣʋ-m teeli tɔɣɔ mɑɑ tʋ teeli, nɑ mɑ́ nyǝnɩ yem kɛ́ wei ɩ kpɛɛnɑ-m tɔ. 31 Nn nɑɑkɩ kʋyɛɛŋ tɔŋnɑ kɔntɛ, wei ɩ tɑɑ mɑɑ kpiisi nyɑ́ ɩfepiyɑ nɑ nyɑ́ lʋlʋɣʋ tɑɑ nyǝ́mɑ. Hɑlɩ ɑkpɑtʋlʋ kɑɑ wɛɛ nyɑ́ tǝyɑɣɑ tɑɑ. 32 N kɑ́ nɑ́ kolontu kɔmɑ nɑ ɩ́ cɑɣɑ mɑ tǝcɑɣɑlɛ, nɑ ɩ́ pɑɑlǝnɑ kʋpɑntʋnɑɑ mpɑ Tɑcɑɑ lɑpɑ Ɩsɛɣɛlɩ tɔ. Nyɑ́ tǝyɑɣɑ kɑ́ tɑɑŋǝnɑ ɑkpɑtʋlʋ. 33 Pɑɑ nɑ mpʋ mɑɑ yele nyɑ́ nyǝ́mɑ tɑɑ nɔɣɔlʋ nɑ ɩ ɩsɛ kɛ mɑ kɔtɑɣɑ tǝlɑtɛ, nɑ ɩ́ tɔɣɔ nyɑ́ ɩsɛ nɑ ɩ́ wɑkǝlɩ nyɑ́ lɑŋlɛ. Amɑ nyɑ́ tǝyɑɣɑ nyǝ́mɑ tǝnɑ kɑ́ sǝkǝnɑ pɑ toŋ kɛ́.

34 Kʋyɑkʋ kʋlʋmʋɣʋ kɛ nyɑ́ pǝyɑlɑɑ Hofini nɑ Pɛnhɑsɩ pɑɑ sɩ. Ɩlɛ tǝnɑɣɑ ń kɑ́ nyǝnɑ sɩ tɑmpɑnɑ kɛ mɑ yɔɣɔtǝɣɩ. 35 Mɑɑ kpɑ mɑ tǝɣɩ kɔtʋlʋ kʋpɑŋ, wei ɩ tǝŋǝɣɩ mɑ luɣu tɛɛ nyǝntʋ kɛ teitei tɔ, nɑ mɑ́ hɑ-ɩ lʋlʋɣʋ kʋpɑŋkʋ, nɑ ɩ́ lɑkɩ wulɑʋ wei mɑ lǝsɑɑ tɔɣɔ tǝmlɛ kɛ tɑm tɔɔ. 36 Ye pǝ tɩɩ kɑɑsɑ wei kɛ́ nyɑ́ lʋlʋɣʋ tɑɑ, pʋntʋ kɑ́ hǝntɩ kɔtʋlʋ ɩnǝɣɩ ɑtɛɣɛ sɩ: Hɑ-m liɣitee nɑ tɔɣɔnɑɣɑ. Hɑlɩ ɩ́ sǝlǝmɩ-ɩ tɔtɔ sɩ: Tʋ-m kɔtʋɣʋ tǝmlɛ nɑtǝlɩ tǝ tɑɑ, nɑ mɑ́ hikinɑ mɑ tɔɣɔnɑɣɑ nɑ tǝnɑ.

<- Sɑmiyɛɛlɩ I 1 Sɑmiyɛɛlɩ I 3 ->