ROMA 9

1 Ni Kristogoc kpeketahema yoac fora deduae, ikoc mi anduae. Nga Tiri Asungo here negen negenna midiu imocngo hepucna anu yofi deduae. 2 Ni nasosoc arengfocna yeneac amma ubahodungtoa nga ubaebicgoc kecduae. 3 Nga neng yeneac do mema sowecac bageau kecma Kristoaru agac kecbadeac negenduae. Neni kisicnina mocgu. 4 Nga yeni Israe areng, yeni manggacac medacyombong kuc nga kibikperaginginagoc kecdae. Yeni dzadzahac nga dedeseriyoacgoc kecma Anutuac womong garenggekecdae. Amma Anutungo wiac yemmeudeac deseriyemmeec, imoc yenearu fedengoc. 5 Nga yeni kisicbangecfocngina negendae, yeneac fingecsaheunac Kristongo ngic siric amma fingerec. Ye Anutunoc, wiac sasawaac engena. Yearu dedengerec nga dedengerec fekengkecbeso, imoc fora.

6 Anutu yoara kuha made, ngeni ifi mi negembisia. Imoc yofi, Israengicngac Israe fingecsaheunac, yenearunac goa Israe yombong mi andae. 7 Imocac siriha yofi, Abrahanggac bangecfora goa yeni Sara kimearunac. Imocac yofi oho ohoya fede,

“Isakaac fingecsahengo geac bangecfocga yombong anggecde.” (Fingec fingec 21:12)

8 Sebiac arennu fingecdae, yeni Anutuac nambaracfora, ifi mi dede. Dedzegeac bageau fingecandae, yeni Abrahanggac bangecfora yombong andae. 9 Ye Abrahang nga Sara yerigoc yoac yofi dedzege anec,

“Ni naso deaimoc imohai habare Sarango medac mong mema kefude.” (Fingec fingec 18:10,14)

Songea arennu meisinnunuude

10 Nga imocsac kpac, Bangecnina Isaka ye Rebekagoc feu yeng fora tombosonga kpenangyuruec. 11-12 Nga medac yeri mi fingecma kecmaecngoc yereac angammemengira gombunga me mangana mong mi femanu Anutungo yereac Rebeka yofi bic edeec,

“Darango muneaac kingang kpeude.” (Fingec fingec 25:23)

Anutungo mong uayaac amma mi meisinggeude, ye songoya nga negen negengaac amma ngicngac kpacyunuande, imoc seria nanudeac ye ifi anec. 13 Imocac yofi oho ohoya fede,

“Ni Yakobo heresongogoc hoanggema Esau ine ubango ukuai.” (Marekai 1:2-3)

14 Ifiac amma yofi denide. Anutungo sing mi segeude. Ye yoara gombunga angande. 15 Yeng Mose yofi edeec,

“Ni monggac wosoefac ammibadeac negemma ye wosoefac ammibade. Nga monggac ubamangang ammibeso negenduae, ye ubamangang ammibade.” (Makekeng 33:19)

16 Ifi anu Anutungo yengena wosoefahaac amma ngic meisinggeude nga ngic ye yengenaocngoc songo meficgeecac me uatoa meecac amma ifi mi fingerude. 17 Mitikibiu yoac oho ohoya fede, imocngo Farao yofi edeec,

“Ni gearu kucna bangeha bangeha edzacyunubade nga kpacna dekperagigec kenu negendacgecdeac amma ge ngictau faiguba genggecde.” (Makekeng 9:16)

18 Imoc yofi, Anutungo mong wosoefac ammibesonga negendeu, imoc ammiude. Amma monggac herea dzegebesonga negendeu, imoc dzegeude.

19 Ge yoacna imoc negemma yofi denade gedang, “Anutuac songo nga negen negeng kpeudeac sing mi fede. Nga sing kpekpe mi febac dede yeng ni kopocsicnagoc naric mi debac.” 20 Bangecngic ge negenna, ge ngicsac, ifi dema Anutuac yoac turunga mi merembesena. Marikibi minginango wiac mong meu wiac maringo memea, imocngo mingina naric mi kpesimiude,

“Ge nocac ni ifia menunec?” (Yesaia 29:16; 45:9)

21 Enangmemengic ye songeaac arennu ua naric meude, ye gbaki mema imocngo enang mong uaya engena meude nga enang mong uaya mamea naric meude.

22-23 Enang goa yeni kuc kperaginginagoc anggecdeac Anutungo warac wosocefac ayemmema mengereyunuec. Ngicngac yeni yeac kuc kibikperagiagoc henggecde, songoya ifi anec. Ye desi desiac fakaya ngicngac edzacyunuudeac nga yeni kuha negenggecdeac enang goa yeni kpedzac kpedzameaac arennu bic faifaia nandae, yeneac amma modzotitia kpac nasoherec tomaingina kecande, ye songea naric modacma ifinoc anude. 24 Imocac nenannoc kpacnunuec. Imoc Yuda arengsac kpac, ye bangec monnunac ngicngac momoc kpacyunuec. 25 Ye profete Hoseaac kibiu ifingoc yofi dede,

“Ngicngac areng mong warac neac ngicngac mi kecgec, yeni neac ngicngac, ifi kpacyunubade. Nga ngac mong heresongogoc mi hoanggeai, ye neac songongac, yeac kpara ifi kpacbade.” (Hosea 2:23)

26 Nga bangec monnunac ngicngac Anutungo yeneac yofi deec,

“Ngeni neac ngicngac kpac.” Amma bangec imohaingoc yofi kpacyunugecde, “Yeni Anutu kekehagoc yeac medacfora.” (Hosea 1:10)

27 Yesaiango ine Israe yeneac negemma yofi kpacma dede,

“Israe ngicngac yeni kpetengina kuneng, imoc kondunggac sangi isoc anudeu ni sifu yenearunac noboha efeanecsac onggongyunuba komoc kpegecde. 28 KEBUNGO bangecfu ngicngac yoacngina bicbic isinggema desiyunuma uaya mesiude.” (Yesaia 10:22-23)

29 Nga Yesaiango kpefingyoac yofi bic deec,

“KEBU Kuctoa Mingina, yeng bangecfocnina noboha goa mi onggongyunuu komoc kpebau debac Sodong nga Gomora yeni isoc ambing.” (Yesaia 1:9)

30 Ni yofi torokpema deduae, bangec monnunac ngicngac, yeneng dindingac kecgecdeac seseriua mong mi mekecma kekec dindingac eng meficgegec. Yeni negensinggegec, imocac amma Anutungo dindingac kpacyunuec. 31 Nga Israe ngicngac yeni ine dedeseriyoacngo kekec dindingacfu faiyunuudeac seseriua mekecgec. Mekecma dedeseriyoacfusing dindingac kekec mi meficgegec. 32 Yeni faka nga angammemenginaac negensima negen negensing fora imoc ine wagec. Yeni hocfu kpondzong heima mayunuec. 33 Imocac yofi oho ohoya fede,

“Negendae, ni Sionnu hoc mong faiba imohai yeni kpondzong heigecde nga peperandziu tifainggema negemmangang meficgegecde. Nga mongngo ye negensinggeudeu ye game kpekpeu mi enude.” (Yesaia 8:14; 28:16)

<- ROMA 8 ROMA 10 ->