SAN LUCAS 4

Chundah ne, tumarande se Dihvo vo Jesucristo

1 Dihvo vo ne, quenun Vaco Ndah yahn Dendiohs ihyan, ne chica ye min ico Jordán. Din Vaco Dendiohs che cuahn ye ya̱hn na̱n che metah duhva. 2 Min quenan ye o raco ro, ne chundah ne, retumarande se ihyan. Nducuahn ro min ne, hua cheh ye, ne chihno min ne, chi cuico ye. 3 Tuhme ra̱hn chundah me ri se ihyan:

―Ndete che Da̱ya Dendiohs ndih ne, cuihquentiyon ne tu cuh che ndaconda̱ pa̱n.

4 Ndahconan Dihvo vo yahn se:

―Na̱n Ndudo yahn Dendiohs a ndirun: “Ndiyu dema̱n nduco pa̱n co conun ico ihyan, te namin rendotenan ye Ndudo yahn Dendiohs.”

5 Tuhme quenda chundah me Dihvo vo a̱ma tingüete ya̱co, ne venchahteno na̱hma se ihyan nducuahn vederihquentiyon che va iyehnse. 6 Ra̱hn se ri se ihyan:

―U té nducuahn vederihquentiyon che tihchan ndih, ndete che dinahn ne che ca̱hmá, te u va tá̱h nducuahn, ne adecoduhno ihyan che náhn ne, co cá̱h ihyan. 7 Ndete che cahntihya ne ná̱n, ndeva ne yavená̱n ne, co yahn ne nducuahn.

8 Ra̱hn Dihvo vo ri ye sa̱hn:

―Cuehn va̱ne chundah, te na̱n Ndudo yahn Dendiohs a ndirun: “Cuendeva yavena̱n Dihve Dendiohs, ne a ihyan min no codinehn che ca̱hma ye.”

9 Tuhme quenda se ihyan tin ya̱co chahte yahn ya̱n Jerusalén, ne ra̱hn se ri se ihyan:

―Ndete che Da̱ya Dendiohs ndih ne, ca̱va ne muhn. 10 Hua dehva co yahn ne, te a ndirun na̱n Ndudo yahn Dendiohs:

Dechuh Dendiohs ángel yahn ye ca̱va che conduco ye ndih,

11 din ye cuda̱do ndih ca̱va che hua dehva co yahn ne.

12 Ra̱hn Dihvo vo ri ye sa̱hn:

―Namin na̱n Ndudo yahn Dendiohs a ndirun: “Hua tumarende Dihve Dendiohs.”

13 Cuahn che chihno tumarande chundah me Dihvo vo ne, cona̱hn se. Quenan rino se nde nda̱ a̱ma ro che nda̱hca̱ ca̱va se.

Dihvo vo Jesucristo ne, cana̱n redin ye ntiyon yahn ye esta̱do yahn Galilea

14 Dihvo vo ne, quenan cuma ye vederihquentiyon yahn Vaco Ndah yahn Dendiohs, ne cona̱hn ye esta̱do yahn Galilea. Nducuahn ya̱n ne, a̱ma chetuhn ndudo yahn vederihquentiyon che quenan cuma ye. 15 Ricuahn ye chete ya̱co, ne rendeva nducoya̱ca ihyan yavena̱n ye.

Ndetenda̱h ihyan Dihvo vo Jesucristo ya̱n Nazaret

16 Nda̱ Dihvo vo ya̱n Nazaret na̱n che chihta ye, ne rahn ye ya̱co ndate ndate, ro che rahte tuhno ihyan. A̱ma ro ne, chenda̱ ye chete ya̱co, ne chandi ye ca̱va che cuahndudo ye Ndudo yahn Dendiohs. 17 Sa̱hn che redin cuda̱do ya̱co me ne, ca̱h se ca̱ca che dirun ihyan profeta Isaías ihyan. Cuahn che nta̱ ye ca̱ca me ne, cahndudo ye na̱n che ndirun tuhca̱:

18 Vaco Dihvé Dendiohs ne, quenun u.

Dechuh Dendiohs u, ca̱va che cacuáhn ndudo ndah yahn ye, cahnevan nducoya̱ca ihyan che necun ye ma̱n,

ca̱va che cuahndudó che va ye vedeyeno che nchahco ye yahn ihyan che nto ino ye nunde yahn ye ma̱n.

19 Dín che co ro na̱n ihyan che hua ro na̱n ye ma̱n,

ndedeváhn ihyan che yah rahno ye, redin nunde yahn ye ma̱n,

cuahndudó nduhca̱ che yahino Dihvo vo Dendiohs ihyan iyehnse ma̱n.

20 Chihno min ne, ndechetihve Dihvo vo ca̱ca me, neca̱h ye sa̱hn che redin cuda̱do ya̱co me, ne chihnde ye. Nducoya̱ca ihyan che chenun ye chete ya̱co me ne, vateya̱n ye numacuahn vedenecun. 21 Tuhme ra̱hn ye:

―Ma̱n ro cuh ne, a chinahn ndudo che chihno cahndudó, chihnevan nchuhn.

22 Chi yeno nducoya̱ca ihyan nduco Dihvo vo, ne rahn ino ye yahn ndudo ndah che rente ye. Ate cana̱n tumerune ye va̱n ma̱n ye nduco vih:

―¿A ndiyu sa̱hn tih che da̱ya José me?

23 Ra̱hn Dihvo vo ri ye ihyan chahn:

―Cua̱co te nahn ca̱hma nchuhn nducó ndudo cuh: “Doctor, tahque ndah che codique man di. Codin muhn ya̱n vaque vederihno nduhca̱ che din min ya̱n Capernaum.”

24 Quendi Dihvo vo, ne ra̱hn ye:

―Cua̱co rá̱hn rí nchuhn te nde a̱ma ihyan profeta, hua renevahnecun ihyan ya̱n va̱co ye ihyan. 25 Ro mena̱n me ne, a̱ma chihnde cuico, te hua chan co ino nduyo quenan ma̱hn. Ro min ne, a̱ma vate nda̱hta va̱h nación yahn Israel, ne andahre min quenan ihyan profeta Elías, 26 ate hua dechuh Dendiohs ihyan, ca̱va che conan ye nde a̱ma nda̱hta va̱h chahn. Tahque ndah ye ne, dechuh ye ihyan, ca̱va che conan ye a̱ma nda̱hta va̱h yahn ta̱ma nación che va te ya̱n Sarepta, nino ya̱n Sidón. 27 Ta̱ma yune ne, a nación yahn Israel, vate a̱ma ya̱hn ihyan che ndi ye cah che recha̱ yute. Min quenan profeta Eliseo, ne namin hua din ye che ndoyahn nde a̱ma ihyan chahn. Ate din ye che ndoyahn a̱ma sa̱hn nación yahn Siria che duche se Naamán, andahre sa̱hn ta̱ma nación se.

28 Cuahn che chihnevan ihyan che chenun ye chete ya̱co me che tihca̱ ra̱hn Dihvo vo ne, a̱ma chi ta̱n ye. 29 Ndeta̱hno necuan ihyan chahn, ne quenda ye ihyan numacuahn vedeta̱n cua̱hn chihto ya̱n na̱n a̱ma tin ya̱va ya̱co ca̱va che deca̱va ye ihyan. 30 Ate hua chi din ihyan chahn tihca̱, te chuh Dihvo vo va̱n nducoya̱ca ye, ne cuahn ye.

Quenun vaco chihnga̱ a̱ma se

31 Nda̱ Dihvo vo Jesucristo ya̱n Capernaum, esta̱do yahn Galilea, ne ndate ndate, ro che rahte tuhno ihyan, ricuahn ye chete ya̱co. 32 Ihyan che rihnevan ye che ricuahn Dihvo vo ne, a̱ma rahn ino ye, te numacuahn vederihquentiyon yahn ye ricuahn ye.

33 A̱ma yune ne, chenda̱ Dihvo vo chete ya̱co me, ne min quenun a̱ma sa̱hn che quenun vaco chihnga̱ sa̱hn. A̱ma dito cah se:

34 ―Ndih, Jesús yahn ya̱n Nazaret, ¿dehco che reca̱hdenun ne yune yahn nuhn? ¿A cochi ne che decuihno ne nuhn ne? U devano duh ndih. Ndih che Da̱ya Dendiohs.

35 Chihquentiyon Dihvo vo vaco chihnga̱ me:

―¡Cuenedihn chende! ¡Cuendiquendah sa̱hn tih!

Ndeta̱hno din vaco chihnga̱ me che chendave sa̱hn min na̱n nducoya̱ca ihyan che chenun ye min. Ate hua dehva chi yahn se, ne ndiquenda̱h sa̱hn. 36 Nducoya̱ca ye ne, a̱ma dihya ye chi, ne rente ye va̱n ma̱n ye nduco vih:

―¡Ama chahte vederihquentiyon quenan cuma ihyan tih! ¡Nde vaco chihnga̱ redinahn ndudo yahn ye, ne rendiquenda̱h!

37 Numachahte esta̱do yahn Galilea, chetuhn ndudo yahn vederihno che redin Dihvo vo.

Din Dihvo vo Jesucristo che ndoyahn inda̱hn Simón Pedro

38 Chihno min ne, ndiquenda̱h Dihvo vo chete ya̱co me, ne cuahn ye ndeva̱co Simón. Inda̱hn Simón ne, quendihte ye, ndi ye cah ihno. Chica ihyan ndeva̱co ye Dihvo vo che din ye che ndoyahn ye. 39 Chahn nda̱ ye na̱n ihyan min, ne chihquentiyon ye che cuavi cah me. Ndeta̱hno ndoyahn ihyan min, ne necuan ye, ca̱h ye, cheh Dihvo vo nduco combiero yahn ye.

Din Dihvo vo Jesucristo che ndoyahn a̱ma ya̱hn ihyan cah

40 Ura che a chehche ya̱hn ne, quenda ihyan nducoya̱ca ihyan cah yahn ye che ndeh na̱n cah ndi ye, cuahn ye na̱n Dihvo vo. Nahn ta̱h ye queri a̱ma ihyan cah chahn, ne ndoyahn ye. 41 Va̱n ihyan cah chahn ne, nduco a̱ma ya̱hn ihyan che chenun vaco chihnga̱ ihyan, ne ndetenda̱h Dihvo vo vaco chihnga̱ chahn. Cuahn che rendiquenda̱h ne, rah:

―Ndih che Da̱ya Dendiohs.

Ate chihco yudo Dihvo vo vaco chihnga̱ chahn, ne hua ca̱h yune ye che ca̱hma duh ihyan ye, te a devano che a ihyan min che a va ca̱de che ndedevahn ye ihyan iyehnse.

Quechica Dihvo vo Jesucristo esta̱do yahn Galilea rahndudo ye

42 Ta̱ma ro cuahn che a chi dave ne, cuahn Dihvo vo a̱ma cua̱n na̱n che metah duhva, ne min cuahn ihyan ya̱n, quenuhn ye ihyan. Nta̱ca ihyan chahn ihyan, ne ra̱hn ye nduco ye che hua nda̱ca ye min, te nahn ihyan chahn che conan ca ye. 43 Ate ra̱hn Dihvo vo ri ye ihyan:

―Va che cá̱hn ya̱n chena̱hn, cacuáhn ndudo ndah yahn vederihquentiyon yahn Dendiohs, te a ca̱va chemin che cochí.

44 Tuhme quechica ye nduh ya̱n nduh ya̱n, esta̱do yahn Galilea, ricuahn ye chete ya̱co.

<- SAN LUCAS 3 SAN LUCAS 5 ->