22
Nunmaked-abalagi Bab-Dummad-nug odummoged
David we-namaked narmaksad. Namakmalad-e-iduedga soglesad:
We-namaked Ajelet-Saharʼye-nugadba namaklegoye.
1 Bab-Dummadye, ¿ibiga be an-obacha?
Be an-bendakegala, ¿ibiga be angi dikasur-gunai?
¿Ibiga an-gormaknaid gwen be itosuli?
2 Bab-Dummadye, ibginedba an bese gornadaenad,
gwen be an-abin-imakdasulid.
Mutikidba an bese gornadabalinad,
gwen be an-abin-imakdasurbalid.
An obunnodisulidba nue-geggus itolegusad.
3 Be dule-islidikidid,
Israel-dulemar bega namakmalad.
4 Anmar-dadgan begi bensurgusmalad.
Begi-bensurgusmaladba be bendaknonikid.
5 Bese-gochamaladba be bendaknonikid.
Begi-bensurgunonimargu, be obinge-imaksasulid.
6 An dulesuliyob itoleged,
napa-nus-musgimakdiidyob itoleged.
Dulemar ibmar-dodogedga an-imaknanaid,
bela dulemar isdarsun an-dakmalad.
7 An-dakarmalale, anga alliardamalad.
Anga akar-akar gunanai damarbalid,
nono ege-ege gunanai damarbalid.
Weyob sogmalad:
8 “Bab-Jehováʼgi bensurye-sogdiid,
degite, Bab-Dummad e-bendakdado.
Bab-Dummadgi-wergudiiye-sogdiid,
degite, Bab-Dummad-e-sunnagwad we-ibmargi e-ollor-imakdado.”
9 Bab-Dummadye, sapidukugi-an-maigu, bee be an-odenonikid.
An-nan-nukugi nue-obunnogega be an-imaksabalid.
10 Bab-Dummadye, sapidukugi-an-maigu, be nue an-akwisad.
Amba sapidukugi-an-maigu, bato be an-Bab-Dummadid.
11 Bab-Dummadye, mer wargwen be an-mete,
ar an surbinsa itoged,
ar dule-an-bendaked gwen nikasulid.
12 An-isdarmalad an-ebiris gudimalad,
Basán-moli-bebe-nikad-ursirmaladyobi an-ebiris gudimalad.
13 Igi-achumigur masbina uurmaknagusdae,
igi-san-gasale, ichimaknagusdae,
deyob, an-isdarmalad angi gwisgunonimalad.
14 Dii-napagi-eolenaiyob bela an-san na itoged,
bela an-garmar nue-gwatiris itolebalid.
Igi-baka-gwallu soo-abin daluddae,
deyob, an-ulubgi an-gwage nade an itoged.
15 Dobedba bela an-gaya dinguded.
An-gwabinse-bakale, gege bar banamakgusad.
Napa-urba bato ber an megisayob na itoged.
16 Dule-isganamar achu-soemaladyob an-ebiris gunanaid.
Bela an-argan, an-nag-matarse-bakale, uudu imaksamalad.
17 An-garmar daled daklegusad.
An-isdarmaladi an-indaknanaisulid,
an-ebiris an-dakbukwad.
18 An-mormar mimismarsunnad,
an-mor-suega, egi wilubdaknanai gusmalad.
19 Bab-Jehováʼye, be an-niga-ogannogedid.
¡Mer be angi bangue! ¡Gwae be an-bendakdage!
20 Mer es-suidse-oburgwilegega be an-imake.
Dule-achumaryob-gudimaladgi be an-bendake.
21 Achumigur-nono-wawaadyob-gudimaladgi be an-bendake.
Moli-bebe-nikad-ursirmaladyob-gudimaladgi be an-ollor-imake.
22 Bab-Jehováʼye, an-gwenadganga an begi sunmakoed.
Dulemar-onmaked-abargi an be-nug-odummogoed.
23 Bemar, Bab-Jehová-dobekwaa-gudimalad, Bab-Jehová-e-nug odummomar.
¡Jacob-e-wagan! Bab-Jehová-magar-dakdii nanamar.
¡Israel-e-wagan! Bab-Jehová-e-nug odummomar.
24 Bab-Jehová, dule-wileged-e-naibi-itodiid baisur-daksulid, wagar-biria daksulid.
We-dule-ese-gollalile, abin-imaked.
25 Bab-Jehová, be-dulamar-onmaked-abargine,
be-nug-odummogega be an-imaked.
An bega ibmar-imakoye-sogsadi,
dulemar-be-nug-odummodimalad-asabin an bega imakoed.
26 Dule-wilemalad nue immeledmaloed.
Dule-Bab-Jehová-amidimalad, Bab-Jehová-e-nug-odummodimalad, e-ulubgi weligwar-itodmaloed,
deyob sadegu gudmaloed.
27 Bela we-napneggi-dulemar-yar-baid-baidgi-bukwamalad, dulemar-ablis-akar-akar-bukwamalad-ugakaasega, Bab-Jehová-ebinsadmaloed,
Bab-Jehováʼse gannar aibirnonimaloed, sindigar abin ambikunonimaloed.
28 Ar Bab-Jehová bela we-napneg ganikid,
bela dulemar-bukwad, e-argan-yaurgi gudidiid.
29 Dule burgwesuli geg gued.
Degisoggu, bela we-napneggi ibmar-bukidar-nikagudimalad, dulemar-burgwedani-gudimalad,
Bab-Jehová-asabin sindigar sigmaloed,
e-nuggi iba onomaloed.
30 Bela mimmigan-danimalad, Bab-Jehová-e-nug odummomaloed.
Yoedse-danimalad, Bab-Jehová-e-nug-odummodii gumaloed.
31 Amba-yoo-dulemar-gwalulemaladga soglemogoed,
Bab-Jehová ibmar-innikigwad imakmaiye,