Marcos 7

Dulemar-gwage-oichoed

(Mateo 15:1-20)

1 Fariseoʼmar, degi, Garda-Narmaked-Dulemar gwen-gwen-Jerusalénʼgi-danimalad, Jesús-walik bukunonimalad. 2 Amar, abar-Jesús-sapingan argan-swilisuli, argan-enuksasuli mas-gunne-dakarmargua, egi sunmakarmalad. 3 Ar Fariseoʼmar, degi, Judíoʼmar-baigan, e-dadgan-igar-mesisadba argan-enuksasulir geg mas gunmalad, ar e-dadgan-ega-igar-metenadedba damalad. 4 Fariseoʼmar ibmar-ukleged-neggi danimalar, argan-enuksasulir geg mas gunmalad. Deginbali, e-dadgan ega igar-bamalad-metenadedba damarbalid, nog-enukedsik, ibmar-simalad-enukedsik, bormomar-enukedsik, degi, megmalad-enukedsik. 5 A-ulale, Fariseoʼmar, degi, Garda-Narmaked-Dulemar Jesúsʼse egichiarmalad:

—¿Ibiga be-sapingan anmar-dadgan-igar-maidba dasurmala? Emide argan-enuksuli mas gunmalad.

6 Jesús, abin-sogded:

—Bemar wagar-darbodaed-dulemalad. Aga Bab-Dummad-gayaburba-barsoged-Isaías, garda-narmaksagu nabir bemarnik sogsagusad, Bab-Dummad weyob sogye:

‘We-dulemar unnila asginbi an-nug odummomalad,

ar e-gwage-ulubgindi, angi gwen binsasurmalad.

7 Ar binsa asginbi an-nug odummodimalad.

E-igar-maid odurdakedi, dulemar-igar-mesisadba bur odurdakmalad.’

Isaías 29:13

8 ”Ar bemar dulemar-igar-mesisadba-damalaga, Bab-Dummad-Igar-Mesisadba dasurmalad.”

9 Jesús sogdebalid:

—Bemar be-dadgan-igar-mamaidgi bur bule binsasoggu, Bab-Dummad-Igar-Mamaid be iedmarsunnad. 10 Ar Moisés sogsagusad: ‘Be-babgi, degi, be-nangi, be binsaed-nikaa damaloye.’ Degi sogsabalid: ‘Dule-gwensak na e-babgi, degi, e-nangi, gaya-ichakwa sunmaksale, a-dule oburgwilegoye.’

11 ”Ar bemardi, odurdakmalad sunna dule-wargwen e-babga, degi, e-nanga sogye: ‘Geg an be-bendake, ar bela an be-bendakega-ibmar-nikadi bato an Bab-Dummadga uksaye.’ 12 Degidbali, mimmi na e-bab-bendaked, degi, e-nan-bendaked, bar be imakega imaksurmalad. 13 Wegi-bemar-daed-odurdakedba, bemar Bab-Dummad-Igar-Maidba geg damalad. Wegi-damalad-baigan bukidar be imakmarbalid.”

14 Geb Jesús dulemarse gannar gochad, ega sogded:

—Bela an-itomalo. We, be magar-itomala: 15 Ibmar-neg-asgi-danikid dulegi-uboder, geg dule-gwage ichoged. Ar gwagegi-ibmar-naid-ainieddi, dule-gwage ichoged. 16 Bemar nue-itobiele, nue itomar.

17 Jesús dulemargi-bangudgu, negyaba dogdapid. Agi e-sapingan ese egichialid:

—Emisgwa be ibmar-burbar-odurdaksigusad, wede ibi nue obare.

18 Jesús e-sapingan-abin sogded:

—¿Amba bemar akusunna itomarmoga? ¿Bemar wissursi, ibmar-neg-asginmalad dulegi uboder, geg dule-gwage ichoged? 19 Ar ade, e-gwagese ubosulid, unnila e-sabanse ubodapdaed, geb gannar ber mileddabalid.

A-Jesús sognaisundo, bela Bab-Dummadga mas swilidikidbiye. 20 Jesús sogdebalid:

—Ar dule-gwagegi ibmar-ainiedi dule-ichoged. 21 Ar ade, e-gwagegi binsaed-isgana ainiardaed:

Omegangi-galagwensuli-binsaed,

atursaed, emar-ibloged,

22 ome-dikarba, degi, machered-dikarba-yoleged,

aimar-ibmarbina-soged,

aimargi-isdar-binsaed,

emar-yardaked,

e-itolegedba-galagwensulidaed,

nobgued,

dulegi-gakansaar-sunmaked,

san-dummarba-imaked,

degi, binsaed-satedaed.

23 Bela we-ibmar-isganamar dule-gwagegi ainied, degi, dulemar-ichoged.

Ome-Sirofeniciaʼgined, Bab-Dummadgi-bensulid-nikad

(Mateo 15:21-28)

24 Jesús Genesaretʼgi-gudii, Tiro-yarse, degi, Sidón-yarse, nadegusad. Neg-gwagwengi dogdapid, dule-gwen-e-wisgubisuli abesad, degi-inigwele, geg-duku gusad. 25 Ome-wargwen e-bunolo-niaburba-nikad, Jesúsʼgi sunmakmar-itoargu, Jesúsʼse nonikid, yokorgi asabin sindigar signonikid. 26 A-ome Judío-dulesulid, Sirofeniciaʼginedid. Geb ome Jesúsʼgi wilenaigusad, e-bunologi-nia-maid ega onoye. 27 Jesúsʼdi ome abin-sogded:

—Bina mimmigan-inse mas-gunnega be imake. Ar ade, ibnuedsulid mimmigan-annik mas-sued, degi, achuga a-mas uked.

28 Ome, Jesús-abin sogded:

—Dummad, napira be soge, degi-inigwele, mimmigan-mese-urba-mas-obatemamaid amba achumarse-bakar, gunmogad.

29 Jesús omega sogded:

—Ar weyob be anga sogsad-ular, gwage-bogidikidgi be-negse be nae. Be-bunologi-nia-maid bato nosad.

30 Ome na e-negse mosgua, e-bunolo e-gabedgi-mai dakdapid. Bunologi-nia-maid bato nosad.

Jesús dule-geg-sunmaked, geg-itobalid, nudaksad

31 Jesús Tiro-yargi-gudii gannar alid. Geb Sidón-yarsik-argua, Decápolis-yala-imbaganba Galilea-mata-dummad-naidse nodapid. 32 Agi, dule-uaya-yalliled, degi, naya-naya-sunmakbalid Jesúsʼse senonimalad. Dulemar Jesúsʼgi wilenaigusmalad, a-dule-nudakega argan egi mesye.

33 Jesús a-dule dulesulidba bachikii sesad. Geb Jesús dule-bonigwaled-uaya-yaba e-goo odos imaksad, degi, e-googi wiaksagu, dule-bonigwaled-e-gwabin, e-googi ebus imaksabalid. 34 Geb Jesús niba atakdegu, ise-bunnoar imaksad, geb dule-bonigwaledga sogded:

“¡Efata!” A sogleged: “Be argaye.” 35 Geb dule-bonigwaled yog-magar-ito naded, degi, nued sunmaknadbalid.

36 Jesús dulemarga sogsad, mer dule-baiganga bipisaar sogmaloye. Ar Jesús dulemarga degi-sogdele, aka bur bule dulemar Jesús-barsogde damalad. 37 Dulemar bela-bela geger Jesús-dakmalad, sogdemalad: “We-dule ibmar-nueganbi imaked. Ar dule-uaya-yalliledse-bakar, magar-ito imaked, degi, dule-geg-sunmaked nabir sunmak imakbalid.”

<- Marcos 6 Marcos 8 ->