Génesis 25

Abraham Ceturaʼga mimmigan-baksad

(1 Crónicas 1:32-33)

1 Abraham ome-baid-nikusbalid, a-ome Ceturaʼye nugad.

2 A-omebogwa, mimmigan-nikusad wemalad:

Zimram, Jocsán, Medán,

Madián, Isbac, Súa.

3 Jocsán-e-masmala, wemalad:

Seba, Dedán.

Dedán-e-waganmar, wemalad:

Asurim-dulemar,

Letusim-dulemar,

Leumim-dulemar.

4 Madián-e-masmaladi, wemalad:

Efa, Efer, Hanoc,

Abida, degi, Elda.

Bela-wemala Cetura-e-wagan gumalad.

5 Abraham bela ibmar-nikadi e-machi-Isaacʼga bela uksad. 6 Abraham omegan-baiganba-mimmi-nikusmaladgardi, unnila ibmar ega wis ichesaar binsa uksad. Amba Abraham dula-gudigua, e-mimmigan-baigan e-machi-Isaacʼgi dikasur dad-nakwedsik barmisad.

Abraham-burgwisad

7 Abraham birga-dulabaabak-gakambe-gakatar-sergu (175) megisad. 8 Nue-selebaa-mai burgwisad, ar ade, bato burgwedginmogad. Deyob na e-sergan-burgwarmamaidse megidapmogad. 9 E-masmala, Isaac, degi, Ismael, Mamre-dad-nakwedsik akwasaila-ollor-siid-Macpelaʼye-nugadgi, Abraham-digsamalad. A-nainude, Efrónʼgadinad. Efrónʼde Zohar-machid, Het-duled. 10 We-nainu, Abraham Het-dulemarse baksad. We-akwasaila-ollor-siidgi e-ome-Sara-dikarba Abraham diglesad. 11 Abraham-burgwisad-sorba, Bab-Dummad Isaacʼgi ise-nued binsasad. Isaacʼde dia-naba megidapid. We-diade Lajay-Roíʼye nugad.

Ismael-e-wagan

(1 Crónicas 1:28-31)

12 Ismael, Abraham Agarʼbo-machi-baksadid. Agarʼde, Sara-e-maid, Egipto-duled.

13 Ismael-e-masmala e-gwalulesadba ilemakar naid. Weyob nugmalad:

Nebaiot. A e-machi-dummad,

geb a-yarba, Cedar, Adbeel, Mibsam,

14 Misma, Duma, Massa,

15 Hadar, Tema, Jetur,

Nafis, degi, Cedema.

16 Wemala, Ismael-e-masmala-warambe-gakabogwad-e-nugmalad (12).

Na megismaladgi, e-nugba neg onugsasmalad. Ar wemala, e-sordamar-e-dummadga gusmarbalid.

17 Ismael birga-dulanergwa-gakambe-gakagugle-nikadgi (137) burgwisad. Deyob e-sergan-burgwarmamaidse megidapmogad. 18 Ismael-e-wagana Egipto-yar-asabin, Havila-yar, degi, Shur-yar-abargi, Asiria-yar-igarba, ambikudapmalad. Amba e-gwenadgan egi gwisgunanaigus-inigwele, agi megidapmalad.

Jacob Esaúʼbo gwalulesad

19 Abraham-machi-Isaac-e-igar weyobdo. Abrahamʼga e-machi-Isaac gwalulenonikid. 20 Isaac birga-dulabo-nikadgine (40), Rebeca-nikunonikid. Rebecaʼde, Betuel-sisgwad. E-susdi, Labánʼye nugad. Amarde, Arameo-dulemalad, Padan-Aram-neggweburgi bukwamalad.

21 Rebeca geg mimmi-baked. Degisoggu, Isaac Bab-Jehováʼse ega gochad. Bab-Jehová Isaac-ese-gochad itosad. Agi, Rebeca gurgin-nika gunonikid. 22 Ar warbogwadi amba sapidukugi-mamaiunni, bato gaemamaid. Agi, Rebeca binsaded: “¿Ar ibiga anga weyob gunai? Degisoggu, a-ular, Bab-Jehováʼse igar-aminad gusad.”

23 Bab-Jehová Rebeca-abin sogded:

“Be-sapi-dukugine, neggwebur-sogabo danikid,

amba yoo napnegse-aideged-idu, bato neggwebur-sogabogwad na ebo gae-nanaid.

Gwensak, baidba bur-dutusur guoed,

ia, urba-sogedba nanadii guoed.”

24 Rebeca-e-nugued-ibagan warmaknonikid. Susugwa ega warbo uklenonikid. 25 Gebe-aidenonikidi saila gisii nikad, bela wawaadikid. A-susugwa Esaúʼye onugsasmalad. 26 Geb a-sorba, e-urba e-argan-nailikgi e-ia-maligi-akanai aidenonikid. A-ulale, Jacobʼye onugsasmalad. Deunni, Isaac birga-dulapaa (60) nikad.

Esaú machi-sailaginedga-gued osulosad

27 Masmala-warbogwad dungudmalad. Esaú ibmar-make-duledid. Sapurba-gudiile, yeer-itodaed. Jacobʼdi dule-boo-daedid. Neggi-gudiile, bur-yeer-itodaed. 28 Isaac bur bule Esaú-sabed, ar ade, Esaú-ibmar-maked-gunned yeer-itodaed. Ar Rebecaʼdina bur bule Jacob-sabmogad.

29 Ibagwengine, Esaú sapurba-gudii, nue-geggus nonigua, Jacob ingwa-burwi-gisi-dunai daknonikid. 30 Geb Esaú, Jacobʼga sokalid:

—An ukudmaada itoged, wis be anga we-ibmar-gisi-dunaid be udage.

(A-ulale, Esaú, Edomʼye bilebalid).

31 Jacob abin-sogded:

—Nabirdo. Degiile, ar be machi-sailaginedsoggu, bela-bega-ibmar-uklegoed, be anga udagodo.

32 Esaú abin-sogded:

—An ukudba burgwedanisoggu, anga-bela-ibmar-uklegoed, an bega ukodo. ¿Ar ibiga bar an we-ibmar abesunna? An abesuli.

33 Geb Jacob sogded:

—Emisbinne, ise-sogar be anga sogdo, deyob an bega ibmar ukedseye.

Esaú abin-sogded:

—Ise-sogar an bega sogye, deyob an bega ibmar ukedseye.

Esaú, machi-sailagined-guedgi-bela-ega-ibmar-uklegoed e-urba-Jacobʼga uksad.

34 Geb degine, Jacob, Esaúʼga ingwa-burwi-gisi-dualed madubo ega uksad. Esaú masgunned-bergusgua, degi, gobsabargua, gwisgusad, geb nadegusad.

Weyob, Esaú na machi-sailagined-guedgi bela-ega-ibmar-uklegoedi, baisur-daksad.

<- Génesis 24 Génesis 26 ->